YEREMIA 26 - Nanduk Ngget Tul Pidnak Wene

Ap enpem wene mbenarugwi sa-nen Yeremia indi nden penden kaidnak wene 26:1-24

¹ Yosia ambara Yoyakim iri na nggeret Yewura nap nagawan men yosola-ge,

² Nagawan Indo-nen an yak norosolar-e: ”Kar-e mburugundik, an nuwi mborom mendak woralar-e, Yewura woragwi nap an nerembel wanurak iri me lobok yogola-ge, it yak ondonokluk an-nen kat kebem pigi wene-ge oboksa yak indi-o. Mondok mariger-o luk tet keya burak pug-o.

³ Iri yosola-ge, erep-nen-e it iri-ge an-nen yidnak wene kologolat, it-nen meya kwarugwi-ge keya buruk, kondok yogola, an-nen it-nen meya kwaridnak ndak ndag-et it lak tak unpurak yemnak pigi iri na-ge larok yimin nde kwat ma-o” luk yak nirij-o.

⁴ Iri luk, Nagawan Indo-nen-e an-nen it yak undurag-e yu nggal yak nirij-o: ”Nagawan Indo an-nen kit kenpem posolar-e: ’An-nen yidnak yidnak kwarogolat, an-nen iri nggal kwarurag-o luk kenpem pigi ereba na kwarogolat wolmer-o’ luk kenpem pigi-o.

⁵ Iri-nen kir-e an ndegel nubugwi nap an nene lomboksa yugwi nap pempa kundugu kandugu kendam inpil lobok yerenak worasu nap ereba-nen yidnak wene-ge kwara kulurag-et nde, kir-e it-nen yidnak wene-ge kulili bug-o.

⁶ Kit-nen nde pempa an nene tal tenak woragola-ge, an nerembel wanugwi o yu-ge an-nen-e o Silo kwarak pigi nggal tak pimin-o. Iri rak pumu, nggweyakma yu me-nen ap enlem oboksa-nen-e o Yerusalem yu unu-ge imbiri lamut mende yaridnak irit yogolat wolma-o” luk yij-o.

⁷ Nagawan Indo ama-nen yigi wene oboksa-ge tepan ombo min Mbal Pem Nagawan ene lomboksa yugwi nap min ap oboksa min-nen-e kulurug-e,

⁸ Nagawan Indo-nen nebem pid iri na oboksa yak unduruk, ndong yosola ereya na-net it ereba na-ge enne nggasilek luk, an tena nobogolat-nen yogolar-e: ”Kar-e kuruk wolmomtag-e mondok lag-o!

⁹ Kar-e Nagawan Indo unu bem yosolar-e: ’Nagawan Indo uwi yu-ge o Silo kwarak pid iri na nggal kwarak posolat, o siri yu-ge mondok lak tak puwama, ab-e yu me-ge wolma bug-o’ luk yigen yu-ge kar-e kwiye lag-et keyaige-o” yogolug-e, ap kwarat-nen lop lop niriga-o.

¹⁰ Iri kwatli wene iri na kulurug-e, pemerinta yabu winde Yewura nap ereba na-ge nagawan woraso sa-nen yurung wurung wagolar-e, Nagawan Indo ama mbirigarik, Pak Tumende Ngget iri na me kore yiga-o.

¹¹ Koreyak woragola, tepan omborak min Mbal Pem Nagawan ene lomboksa yugwi nap min-nen pemerinta yabu winde min ap ereba na min yak ondogolar-e: ”At yu-ge nit nunuwi siri yu meya rak purak wene-ge at emndam-nen wirik posola-ge, kir-e keneyanggo-nen kuligep irir-o. Iri bem-e at yu-ge mondok wururag-o” luk yiga-o.

¹² Iri yogola, an-nen yosolar-e: ”Nagawan Indo uwi min o siri yu min meya rak purak wene yosola, kit-nen kuligep iri-ge Nagawan Indo-net yurak nebem pamu-nen yigi-o.

¹³ Iri bem-e, kit-nen woragwi kenpage min kit-nen kwarugwi min iri-ge nden ker-o. At-nen kit lak tak kunpurak indi yimnik puruk worasu iri tuguruk larok maklug-e, Nagawan Indo-nen yidnak yidnak kwarer-o.

¹⁴ Nde, an-e kit kininggiyapma-t worasu me, kit-nen konak kwat nobogolat na, meya kwat nobogolat na, iri-ge kit nak-nen-o.

¹⁵ Alat nde, kwara yebet ker-o. An-e Nagawan Indo-nen wene iri kit kinndi yeberak kunpuwakluk nibil lobok yidnak me, kit-nen nde an nurugup nde ala-ge, meya kwarigit lak ma abare bem nurugup iri-ge meya-ge kit min o siri yu me woragwi nap min kenpem wolma-o” luk yigi-o.

¹⁶ Yosoloma, pemerinta yabu winde min we nap min-nen tepan ombo min Mbal Pem Nagawan ene lomboksa yugwi nap ereba na min yak ondogolar-e: ”At yu-ge nit Nenmbal Pem Nagawan, Nagawan Indo-nen ebem pidnak wene-t yak nindij-o. At wururag-e meya-o” luk yiga-o.

¹⁷ Iri Yogolikma-ge, it ennggendumu-nen it enlem iri-nen enne kulugwi nap ereba men yogolat-nen ap ndok wiriga ereba na yak ondogolar-e:

¹⁸ ”Isikia iri na Yewura iri me nagawan menluk worala-ge, Mbal Pem Nagawan ene lomboksa yoso nap Moresyet-nen lobok yid nap Mika iri na-nen Nagawan Indo Mondok Amawi Worak-nen ebem pidnak wene-ge yu nggal ap oboksa yak indij-o: ’Yabu wanogolat-nen kwarugwi nggal Sion-e nggweyak yala nden yaga keya bosolat, Yerusalem siri-ge nggurusa yud tud mbosolat, ndobo Nagawan Indo uwi worak worasu iri na-ge wal kwat ma-o’ luk yij-o.

¹⁹ Alat nde, Nagawan Isikia min Yewura nap min-nen-e Mika iri na-ge wirigit lak yiga iri nar-o. Iri yosola, Isikia perak Nagawan Indo aye yosolat, ’Nabuwa ki-o’ luk Nagawan Indo emengen mbarid iri nar-o. Iri yosola-ge, Nagawan Indo-nen-e it lak tak unpurak yimnid iri na-ge tuguruk larok yamu-o. Nde, yawo-ge mondok lak tak nunpurak nenpe-nen komo nggogora nondomok nenpem pil lobok yili-o” luk yiga-o.

²⁰ Iri nggal-et ap misik-nen na an kwarusu yu nggal-et Nagawan Indo-nen ebem pidnak pem-et o siri yu min ap enlem yu min lak tak unpurak wene kirimbi yamu-o. Nde, ap iri unu-ge Uria, Semaya ambara o Kiriyat-Yeyarim nap iri nar-o.

²¹ Iri yosola, Nagawan Yoyakim min at-nen idnak san ombo min pemerinta yabu winde min-nen wene iri emndam nggwe-nen Uria-nen wirik posola karug-e, Nagawan Yoyakim-nen-e wereyekluk yij-et nde, Uria-nen at wururak obok kulurug-e, kwiye-nen Mesira mbirij-et nde,

²² Yoyakim-nen-e Akmbot ambara Elnatan min ap erep min-e Uria inggi wil Mesira wirik inpij-o.

²³ Wirik enpamu, mbirigarik, tuguruk inggi waruk Nagawan Yoyakim eram pil lobok yikma, nagawan-nen-e ”Wururag-o” yamu, wosa yigarik, ap oboksa yapma unpugwi sa iri na me mbo ibiga-o.

²⁴ Alat nde, Sapan ambara Aikam-nen nambigit yosola, Yeremia an-e nuruwakluk kegera ap ininggem nibigit lak yiga-o. 27:1–30:24 Empat pasal ya arem-e Nagawan Indo-nen Yeremia yak tosolar-e: ”Nebukatnesat o Mbabel nagawan iri na amawi bem ap enlem oboksa min Yewura nap min teberak unpurak amawi ut memera kar-e kendak pem angin worak mende mbi pi-o” luk yak tij-o. Nde, Yeremia-nen iri nggal kwarosola, enesiget Mbal Pem Nagawan ene lomboksa yoso nap misik-nen at ebem ngin yosola, ap iri na onggo ebem angin worak posola-ge, wat yij-o. Yeremia-nen-e kugun Mbabel wok unpuruk mbiridnak nap nggomo endaga engga mbarosolar-e: ”Kir-e iri me woragolar-e, olengen kwarat woragub-et nde, abog-e kenma tuguruk lobok yugub-o” luk urul yak indidnak wene mbarak worasu-o.