YEREMIA 23 - Nanduk Ngget Tul Pidnak Wene

”Ndaut isit misik nam ma-o” luk urul pidnak wene 23:1-8

^1-2 Isarael nap Enmbal Pem Nagawan, Nagawan Indo-nen yosolar-e: ”Kit ap lit eneyagwi nap, an nilirak lak tak onpogolat, ndibi ndi rak onpogolat kwarugwi nap wa-e. An nilirag-e kwara ndegel onpogolat wolmomtag-et nde, kir-e kwara yik eneyarok worali buk, nggilara keya inpigepma ndibi ndi yili me, mondok kenabuwa worag-o! Nde, yawo-ge kit-nen meya kwatli bem-e angin worak mende kenpem pimin-o.

³ Alat nde, an nilirak erep minggirig-e, it mbo inpigi sa-nen ndok wat inpimin-o. Ndok wosa wok unpuruk, it unuwi nggweyak pem inpil lobok yumu, it-nen wigarag-e mondok kwarat ma-o.

⁴ An-nen-e it ndegel onpogolat wolmomtak nap lenak inpimin-o. Iri yumu, an nilirak-nen-e kwiye na lak, kwiye-nen lele yugwi na lak irit wolma-o. It ennggendumu-nen ap misiger-o luk tet mondok lak ma bug-o. Nagawan Indo an-net yusu-o” luk yij-o.

⁵ Nagawan Indo-nen yosolar-e: ”Lud tak nak kwaroso nagawan Ndaut-nen wigarak misig-e an-nen nagawan lenak purak tarem-e wog-et ma-o. Nde, nagawan iri-nen-e indi nggat nggat pem-et o tena woralat, o siri oboksa ndemeret lud tak mot mor-et kwarosolat wolma-o.

⁶ Nde, at-nen o tena worala-ge, Yewura nab-e inmiri yosolat, nde, Isarael nab-e kona yamuksa wolma-o. Nagawan iri na imin yogolar-e: ’Nagawan Indo iri-ge nit Ninmiri Yoso Nap-nen yusu-o’ luk yuwa-o” luk yij-o.

⁷ Nagawan Indo-nen yosolar-e: ”Nde, abog-e uruk woraso Mbal Pem Nagawan, Isarael nap Mesira-nen wesera wok unpuruk lobok yigi iri na nowak mbatli ereba na mbarigit lak yurak tarem-e wog-et ma-o.

⁸ Are, Mbal Pem Nagawan nuruk nak woraso, an-nen o abare abam (utara) nggwe-nen na o siri erep nin me nan me it nggilara ndibi ndi rak inpigi sa-nen wesera wok unpuruk lobok yigi Mbal Pem Nagawan an nebem-nen owak mbaruwa-o. Nde, ir-e it ondomok unuwi nggweyak pem-et wolma-o” luk yij-o.

Yeremia-nen ennesiget Mbal Pem Nagawan ene lomboksa yugwi nap ereba na onpok yidnak wene 23:9-32

⁹ An-nen-e ennesiget Mbal Pem Nagawan ene lomboksa yugwi nap onowene-ge yu nggal yusu-o: An-e nindi kala labuk yosolat, wendet yusu-o. Nagawan Indo min at-nen yidnak wene marak iri na min-nen-e an-e anggut engen amburu kwarat nuruk, inndi nden kaso nggal kwarak mubusu-o.

¹⁰ Nit woragwi sa nenma-ge Nagawan Indo-nen yidnak yidnak kwarugwi buk nab-e kwarat kobong tak worali-o. Ir-e meya nak kwat tenak woragolar-e, it-nen ap tena unpuruk woragolar-e, kasa ereba kwat tenak worali-o. Iri kwarogola, Nagawan Indo-nen imbiri lamut tak onposolar-e, tusuangge oboksa umbuk yosola, o oboksa-nen inndi puru bera yogolat worali-o.

¹¹ Nagawan Indo-nen yosolar-e: ”An nene lomboksa yugwi nap min tepan omborak min-e an-nen yidnak yidnak kwatli bug-o. An nama-nen na it iri-ge meya kwarogola, eneyasu-o.

¹² Iri kwatli iri-nen ndowaga it untula-ge oro yosolat, ndamuksa muruk yosolat ma-o. Nde, it mburukmu-ge, unuwok mboloksa wosa mbuwa-o. It enpem angin worak purak tarem wok yosola-net an-nen-e it lak tak unpurak mende enpem pil lobok yimin-o. Nde, Nagawan Indo an-net yusu-o.

¹³ An nene lomboksa yugwi nap Samaria woragwi-nen meya kwatli ereba-ge an-e kasu-o. Ir-e kugwi Mbaal unu bem yogolar-e, an nilirak Isarael nab-e kabak tak inpili-o.

¹⁴ Alat nde, Yerusalem iri me an-nen kasolar-e, an nene lomboksa yugwi nab-e yi meya ndi meya terak minik nde kwarogola, eneyasu-o. Ir-e ennesiget wene yogolat, unun onkwe worak inmin mbabi yogolat, meya kwaruwakluk yongga ondogolat, iri nggal kwarogolar-e, ap misiger-o luk tet mondok it meya yidnak keya buruk, kondok yili bug-o. Iri nggal kwarogolar-e, it oboksa-nen Sorom min Nggomora min woragwi nap-nen meya kwariga ereba na nggal kwatli-o” luk yij-o.

¹⁵ Nagawan Indo Mondok Amawi Worak iri na-nen yosolar-e: ”It enpem-nen ndowaga o iri me woragwi nap oboksa-nen an kek tak nibili buk me, ennesiget an nene lomboksa yugwi nap Yerusalem woragwi nap ereba-ge an-nen-e ngari worak mende mak ondosolat, ninggis mende bidnak yi mak ondosolat kwarimin-o” luk yij-o.

¹⁶ Nagawan Indo Mondok Amawi Worak iri na-nen Yerusalem woragwi nap yak ondosolar-e: ”Kir-e an nene lomboksa yugwi nap nggal kwasa-nen ebe lak wene yak kindili ereba-ge mondok kulurak pug-o. It-nen yak kondogolat worali ereba-ge an-nen yak indidnak wene-ge lag-o. It ondomok inndi-nen yebet kaidnak ereba na-t mbela yak kondogolat worali-o.

¹⁷ Nde, it ereba-nen ap an nene kulurak insili yili nap yak ondogolar-e: ’Kir-e konak irit woragub-o’ luk yak ondogolat, nde, ap wene kulugwi buk ereba na yak ondogolar-e: ’Kir-e lak tak kunpurak mende-ge kenpem mbuma bug-o’ luk yak indili-o” luk yij-o.

¹⁸ An-nen yak kendeyeg-o: ”Ennesiget ’Iri nggal kwat ma-o’ luk yugwi nap ereba-ge it ennggendumu-nen ap misiger-o luk mbi-nen-e Nagawan Indo-nen yebet kasu indi arem-e aru worasu-ge lag-o. Nagawan Indo-nen yumnusu wene na it-nen-e yebet kagolat, kologolat mbi kwatli bug-o. At-nen yidnak wene na kek tak pogolat, kwara yebet kagolat na mondok kwatli bug-o.

¹⁹ Nagawan Indo isilepma-ge kwegemereya nggal puk kuruk lobok yosolar-e, meya yugwi nab-e yemen unpuwa-o.

²⁰ At-nen ’Irit kwarimin-o’ luk indi-nen yimnik pid ereba na ndegera kwarigit lak ma-ge isilepma-ge yanggo ma bug-o. Iri kwarosola karuk-nen perak Nagawan Indo ilirak-nen-e abok nggwe-nen kwara enaru ma-o” luk yij-o.

²¹ Nagawan Indo-nen yosolar-e ”Ennesiget an nene lomboksa yugwi nap ereba-ge an-nen-e wirik inpigit lag-et nde, ir-e yil mborogolat nak worali-o. An nene it enpem pigit lag-et nde, it-nen-e: ’At unu bem yak kindili-o’ luk yili-o.

²² It-nen nde an nindi arem worasu enaru nggal-nen-e an nemndam-nen wirik pidnak wene-ge an nilirak yak endelepma, an nilirag-e it-nen meya kwarugwi min it enpage meya min ereba-ge mondok keya buruk, kondok yeleb-o.

²³ Mbal Pem Nagawan an-e misik me nak worasu-ge lag-o. Are, nin me nan me oboksa worasu-o.

²⁴ An-e nin me nan me mbal pem-nen na irit, nggweyak pem-nen na irit, oboksa worala me, an nerengen pem-e ap misiger-o luk mbi-nen kurak yurag-e mondok meya-nen yusu-o.

²⁵ Ennesiget an nene lomboksa yugwi nap-nen yili ereba-ge an-e naru worasu-o. An nunu bem ennesiget yogolar-e: ’An neresa-nen nabi bem yak nendamu-o’ luk yili-o.

²⁶ It ennesiget an nene lomboksa yugwi nap ereba-ge it ondomok inndi-nen pidnak wene ereba na nilirak kabak tak unpuwokluk pem irit yak ondogolat wolma-a?

²⁷ It inndi-nen peragolar-e, nanduk onmborak-nen an meme rak nuburuk, kugwi Mbaal erembel waniga ereba na nggal kwaruwag-o luk, it-nen nabi kaidnak ereba na wene an nilirak-nen an meme rak nubuwakluk yak indili-o.

²⁸ Nde, an nene lomboksa yoso nap-nen nabi kasolug-e, ’We nabi kagi-o’ luk yurag-o. Nde, an-nen wene enpem pidnak nap-nen-e enpem pidnak ereba na-t ndemeret yak undurag-o. Nggandum mbato-ge ariwak min ndak ndak tak purag-e meya-o.

²⁹ An-nen yidnak wene-ge kanduk min ndonggwid kereb-et nde ndamoroso iri na min nggal-nen yusu-o.

³⁰ Ennesiget an nene lomboksa yugwi nap-nen it inmin yabu misiget erep wanugwi nap-nen yak indidnak wene ereba na nde an-nen yidnak wene nggal kwasa ap yak undugwi nab-e mondok inmin wim mbarimin-o.

³¹ Iri-nen it ondomok inndi-nen yebet kaidnak ereba na ap yak ondogolar-et nde, it-nen yogolar-e: ’An neresa-nen yidnak wene-o’ luk yak indili nap ereba na inmin-et wim mbarimin-o.

³² Ennesiget an nene lomboksa yugwi nap nggal kwatluk, ennesiget wene kobong tak nabi kaidnak ereba na ap yak indili nab-e Nagawan Indo an-nen inmin wim mbarimin-o. Ir-e ennesiget amburu lebarogolar-e, an nilirag-e kabak tak inpili-o. It iri-ge an-nen-e wirik inpigit lag-o. It iri-ge an nilirak kwat yurag-e mondok ebe lak mende-nen yusu-o. Nagawan Indo an-net yusu-o” luk yij-o.

Nagawan Indo-nen angin tak inpidnak wene 23:33-40

³³ Nagawan Indo-nen an yak norosolar-e: ”Yeremia wa-e. An nilirak ennggendumu ap misik ala na, an nene lomboksa yoso nap ala na, tepan ombo ala na-nen nde kat kin wok kobogolat nde: ’Nagawan Indo-nen-e no kebem pij-o?’ luk kin wok kobogola-ge, kat-nen onggo yak ondosolar-e: ’Nagawan Indo angin tak poso nab-e kar-er-o. Iri bem-e kar-e mondok mbo kubuwa-o’ luk yak turag-o.

³⁴ Nde, an nilirak ennggendumu ap misik ala na, an nene lomboksa yoso nap ala na, tepan ombo misik ala na-nen nde Nagawan Indo-nen enpem angin tak poso iri na wene nde yosola-ge, at min ogwela inmin-e angin worak enpem pimin-o.

³⁵ Are, it-nen ndemeret yurag-e yu-o. It-nen ennggamirak min ondomok enma woragwi ereba na min kin wok onpogolar-e: ’Nagawan Indo-nen wene onggo-ge no yij-o?’ Are, ’Nagawan Indo-nen-e wene-ge no nggal yij-o?’ luk perak yurag-o.

³⁶ It-nen wene yogolar-e: ’Nagawan Indo-nen angin worak nenpem pidnag-o’ nak yili iri-ge keya buwag-o. It-nen nde wene iri nggal iri nde kundugu-t woragola-ge, an-nen yidnak wene-ge mondok ndemeret at amanggim-e angin worak tag-et pimin-o. Ap-nen yogolar-e: ’Nagawan Indo-nen angin worak nenpem pidnag-o’ yogolar-e, iri-ge Enmbal Pem Nagawan uruk nak woraso, Nagawan Mondok Namawi Worak nene iri na nden kagolat-nen yili-o.

³⁷ It-nen an nene lomboksa yugwi nap kin wok onpogolar-e: ’Nagawan Indo-nen-e wene onggo-ge no yak kindij-o? Nde, Nagawan Indo-nen-e no wene nggal yij-o?’ kin wok unpurak iri nag-o.

³⁸ It-nen nde an-nen enpem pidnak wene iri na nde ndak ndak kwarigit lak yogolat-nen nde yogolar-e: ’Nagawan Indo-nen angin tak ninpij-o’ luk yogola-ge,

³⁹ an-nen-e it iri-ge pendaga wanimindik, mondok erepma mbising mbesang eneyamin-o. Iri kwarosolar-e, it enpe min-et unuwi siri it min onmborak min wok indigi o siri min-et iri kwarak inpimin-o.

⁴⁰ It iri-ge pem irit iri kwarak wolmakluk an-nen kwat onposolar-e, no mende nggal kwasa innggiri elem nak ijak wosa keya unpumu, it-nen woragwi enpage iri na-ge ap-nen-e mondok meme rak puwa bug-o” luk yij-o. 24:1–25:38 Pasal mberen ya arem-e Yeremia-nen-e: ”Yewura nap enpem angin worak mende mberak puwa-o” luk olengen kwarat pem urul posolat woragid wene iri na ndak ndak tak purak tarem-e panggo yusu wene mbarak worasu-o. Nde, Nagawan Indo-nen at ilirak enpem angin worak mende mberak purak iri-ge Mbabel Nagawan Nebukatnesat ebem-nen kwat ma-o. Iri-nen Nagawan Indo-nen-e ap enlem oboksa enpem angin worak mende mberak purak wene min-et mbarak worasu-o.