YEREMIA 20 - Nanduk Ngget Tul Pidnak Wene

Yeremia-nen tepan ombo Pasiut imin ngino nggwidnak wene 20:1-6

¹ Nde, tepan ombo Imet ambara Pasiut iri na-ge Nagawan Indo uwi iri na me yabu wanugwi nap enanggul pem woragij-o. Worasoma, an-nen wene ereba na kuluwakluk yosola-ge,

² Nagawan Indo ama-nen abam nggwe ambigit Pak Tumende unu Mbenyamin iri na me-nen norogolat, posid kere bem kamat nobogolat kwaruwakluk ap yak indij-o.

³ Nde, nene luk kub-e Pasiut-nen wisirik nebamu, an-nen at yak tosolar-e: ”Nagawan Indo-nen kat kunu yarosolar-e, Pasiut iri na-ge lag-o. Are, ’Nin me nan me oboksa kwiye nak kagwi-o’ luk yarij-o.

⁴ Nagawan Indo at-nen yosolar-e: ’An-nen-e kar-e kat kondomok kamanggim na irit, kat kanggamirak enmanggim na irit, kwiye kagwi elem kwarak kibimin-o. Kat kimbiri bem-et it iri-ge unuwim nap-nen unduwa-o. Yewura nap oboksa keya unpumu, Mbabel nagawan-nen yemndak unpuwa-o. Nde, it ennggendumu ereb-e kamat unpuruk Mbabel wok unpuruk mburuwa-o. Nde, ereb-e mondok unduwa-o.

⁵ It unuwim nap-nen o yu me woraso silobulo oboksa min enarengge mende oboksa min-et kugun mberena waruk Mbabel mburuwakluk keya inpimin-o. Iri-nen Yewura nagawan-nen idnak insilobulo min-et waruk mburuwa-o.

⁶ Kat Pasiut min-et kogwela min-et kamat kunpuruk, Mbabel wok kunpuruk mburuwa-o. Iri yuwama, kar-e Mbabel wat yugunmu, ereba me yapma kubuwa-o. Iri nggal-et kat kanggamirak kat-nen amburu ndorosola kulugwi nab-e oboksa iri nggal-et kwat unpuwa-o’ yij-o” luk yak tigi-o.

Yeremia arem-nen yane worosolat Nagawan Indo yak tidnak wene 20:7-18

⁷ Nagawan Indo wa-e. Kat-nen an namberam lasola, an-e namberam lanokluk, larok yigi-o. Kat kamawi-ge ombol nggwe terak minig-et me, an-e kat keram teberak nibigen-o. Ap oboksa-nen an pesel nobogolat, enlengenma nggal tak nobogolar-e, kuplila-nen tel kwiridnak, keyama yusu-o.

⁸ Pempa an wene yosolar-e, nene nggoksa yosolar-e, nene nggalnu oboksa-nen wirik posolar-e: ”Insilepma-nen enlengen lamburak kwarugwi mende-o! Lak tak onposo mende-o!” irit wirik pusu-o. Nagawan Indo wa-e. Kat-nen yidnak wene iri na yak indidnak pem pempa an-e pesel nobogolat, enlengenma nggal tak nobogolat worali-o.

⁹ Alat nde, an nindi arem-nen yebet kasolar-e: ”Nagawan Indo iri-ge meme rak posolat, at unu bem an-nen at-nen yidnak wene yusu iri-ge mondok keya beyeg-o” luk yebet kasolar-et nde, kat-nen nebem pidnak wene-ge kanduk nggal kererak an nindi arem worasu-o. Narem nak wolmakluk mamak pusu-t nde, an-nen mamak purag-e meya yusu-o.

¹⁰ An-nen kolosolar-e, ap-nen nin me nan me yagap yagap wene bem yogolar-e: ”Kwiye nak ijak wosa labuk yusu-o! Iri ala-ge at owene-ge amawi worak nap iri nak yak til mburuwog-o!” luk yili-o. An nanggamirak nimin kundik woragwi nab-e an wosa mbuwa-o luk yik neyarok worali-o. It-nen yogolar-e: ”Erep-nen-e at iri-ge ombol pem lagolar-e, at-nen kwat nonposo ereba na kemnggo pogolar-e, at nde urugwe nggwe rak pul nde ma-o” luk yili-o.

¹¹ Iri yili-t nde, Nagawan Indo wa-e. Kar-e an nambigit nggwe yusu-o. Kar-e kwiye lak, kamawi worak-nen yusu-o. Nde, it an muk neyagolat, yemndak nobogolat kwatli nab-e urugwe nggwe rak onposola, enmawi yuwa bug-o. It-nen ”Iri kwarul-o” luk yimnik pidnak ereba na-ge ebe lak yosolat, it-nde pem irit innggiri kagolat wolma-o. It-nen innggiri kujwa mende iri na-ge meme rak pigit lak irit wolma-o.

¹² Alat nde, Nagawan Indo Mondok Kamawi Worak wa-e. Nggweyakma nap inndi min it-nen yebet kagwi min-e kar-e mondok karu-o. Kat-nen it inndi ngarosolar-e, ndemeret mot mor-et ngaroso-o. An nowene-ge kat keram nak kebera pigi bem-e wim nap-nen meya kwarugwi ereba na bem kat-nen kemnggo onposola, an-nen kayeg-o.

¹³ Meya kwarugwi nap ininggiyapma-nen ab-e wisirik inpidnak pem-e ndawi-ge Nagawan Indo ebem nak ngarogolat, at nak erembel wanogolat wolmomtag-o.

¹⁴ An ndesa mbigi tarem iri-ge imbiri lamut mag-o! An niya-nen ndet nibid tarem iri-ge ebe lak mende mag-o!

¹⁵ An ndesa mbosola, wene waruk mberarik, neid yak tosolar-e: ”Kambara ndesa mbij-o!” yosola, neid alen tak pid nap iri na imbiri lamut mag-o.

¹⁶ Wene waruk mbirid nap iri-ge Nagawan Indo-nen-e o siri abuwa lag-et yigisa lak tak pid nggal-et kwat ubuwag-o. Nde, ar-e kuplila-ge andi-nen enne nggwa kolosolat, lenggesilmu wim nggogolat enne nggu kolosolat wolmag-o.

¹⁷ Iri ma iri-ge, an niya arem worasola, at-nen nirigit lak yid iri bem-nen ma-o. Niridnggal-nen-e an niya arem-e an yapma nibidnak sa kwatleb-o.

¹⁸ Noluk-nen an-e ndet nibij-o? Anggun panggun min andi bandi min nak kudtak nderak nibij-a? Ninggiri lem nak kobong tak woraruk, lak makluk-nen ndesa mbigi-a? 21:1–22:30 Pasal mberen ya arem-e Yeremia-nen-e wene tarugwi Isarael nap min Yewura nap ennggendumu nagawan mendak inpidnak nap min yak ondosolar-e, Nagawan Indo-nen it enpem angin worak mende mberak posolat, lak tak unpuwa wene min mbarak worasu-o. Nagawan Indo-nen-e ap enlem oboksa enpem wene mbarosolat, enpem angin worak mende puwa wene na mbarak worasu-o.