YEREMIA 2 - Nanduk Ngget Tul Pidnak Wene

Nagawan Indo-nen Isarael nap enabuwa yidnak wene 2:1-3

^1-2 Nagawan Indo-nen an yak norosolar-e: ”Kar-e mburugundik, Yerusalem woragwi nap yak indi-o. Yak ondosolar-e: ’Yerusalem wa-e. Kundugum woralar-e, kindi-ge an nebem mondok mbitlik woraigenma-o. Nggeret wok kerak mbigerik woragolat-nen nebem kindi kundik woralat, nembaga o uwi yakit lak nggwe-t nde, nimbirik mborosolat kwarigen ereba na-ge an-e nindi yeberak worasu-o.

³ Isarael kar-e an nondomok narengge, nindi pungen, nindi kundugu woraigenma-o. An-nen-e lak tak onposo mende-ge kat andi bandi rak kibiga nap oboksa enpem mberak posolat woragi-o. Nagawan Indo an-net yigi-o’ yak indi-o” luk yij-o.

Isarael nap onmborak-nen meya yidnak wene 2:4-8

⁴ Kit Yakup-nen wigarak, Isarael nap kenlem lombok wa-e. Nagawan Indo-nen yak kundusu wene kwara koler-o.

⁵ Nagawan Indo-nen yosolar-e: ”An-nen-e meya-ge ngge kwarosola-nen kit konmborak neyaruk, keya nibiga-o? Ir-e kugwiwak ebe lak ereba na nde langgaluk mbirigarik, abok nggwe-ge it nde ebe lak mende kwasa labuk yiga-o.

⁶ An-net it iri-ge Mesira-nen lesa wok unpuruk mbirigi-o. Mborosolar-e, nembaga usu nggwarak ereba na nggwe-t inmin mborosolat, o umbuk nggwe tula lalik nggwilik ereba na inmin mborosolat, nggweyak tet umbuk enlengenwak lak yurak, ap na woragwi buk, ap na tu iri nggwe na mburugwi buk nggwe-t wok unpuruk mbirigi-t nde, ir-e insili rak nibiga-o.

⁷ O nggweyak amburu worak iri me yi mende ndi mende konak nak nonggolat wolmakluk wok unpuruk mbirigi-t nde, ir-e an nonggweyak iri me emben to rak pogolat, an narengge ereba na kemesa unmunggum pil kagwi mende rak pogolat kwariga-o.

⁸ Nde, it tepan ombo-nen-e: ’Nit-nen idnak Nagawan Indo-ge ngge me worasu-o?’ luk yak nirigit lak, imiri mbarak pidnak wene kek tak pugwi nap-nen na an-e enaru bug-et woraiga-o. It tena unpuruk woragwi kek tak-nen na an nimin nak wim mbarogolat, it an nene lomboksa yugwi nap-nen na Mbaal kugwi unu bem wene yogolat, kugwiwak ebe lak mende ereba na nde erembel wanogolat woraiga-o” luk yij-o.

Nagawan Indo-nen at ilirak inmin ”Iri nggal kwatli-o” luk onpok pidnak wene 2:9-13

⁹ Nagawan Indo-nen yosolar-e: ”Yawo-ge an nilirak enpem wene posolat, it-nen wigarak enpem-e wene mbenarimin-o.

¹⁰ Yi koma bem mo mboso (barat) ambigit o Sipirus mborogolat, mo luwaso (timur) ambigit o Kendat wi ap wirik unpugupmu, ’Wene yu nggal-e kwar-et yoso, lak?’ luk kwara lombot per-o.

¹¹ Ap enlem mbi-nen mbi it-nen erembel wanugwi iri-ge ndemeret mbal pem nagawan-e lag-et nde, it-nen-e iri na keya buruk, enmbal pem nagawan misik erembel wanugwi bug-o. Alat nde, an nilirag-e unnu kek tak poso Enmbal Pem Nagawan an keya nuburuk, yi kwatlik ndi kwatlik mondok kwaroso buk kugwiwak ereba na an nondolma sa erembel wanili-o.

¹² Iri bem-e, mbal wa-e. Kar-e wi yosolat, kwiye-nen lele yosolar-e, yuk yamok mbi-o!

¹³ An nilirak-nen-e meya-ge erem mberen kwatli-o. Iri-ge: ir-e nggweyakma nap unluk wolmakluk, unluk woragwi yi wok ondoso elem an na-ge enmberam tak nuburuk, it ondomok-nen yi kenanggurak nggweyak emnde mbatli-t nde, mbun porok tak me, yi kobong yurak meya iri emnde mbatli-o.”

Isarael nap-nen Nagawan Indo-nen yidnak yidnak kwarigit lak pem kwat inpid wene 2:14-19

¹⁴ ”Isarael iri-ge ndegel unpugwi nab-e lag-o. Iri-nen ap ndegel unpugwi nap-nen wigarak na lag-er-o. Alat nde, ar-e noluk-nen at uwim nap enmena kwat yij-o?

¹⁵ Nde, at uwim nab-e singa ndakngge-nen kwaroso nggal nok ebeyekluk ene arem nusu-o. Nde, at onggweyag-e umbuk le rak paga ebe lak mende rak piga-o. Nde, uwi siri ereba na-ge kan mbela kugun ngguru rak piga-o.

¹⁶ Isarael wa-e. Kat kanggulsu-ge Mempis nap min Tapanes nap min-nen mbara keya kibiga-o.

¹⁷ Iri nggal kwat kibiga iri-ge kat kondomok-nen kwarigen pem-nen ndowaga kwat kibiga-o. Kar-e an-nen kinggi waruk tula mborosola-t nde, kar-e Nagawan Indo Kembal Pem Nagawan an-e kamberam tak nibigen pem-nen kwat kibiga-o.

¹⁸ Nde, kat Mesira mburugundig-e, no lesa wanugun-o? Yi Nil nayekluk mburugun-a? Nde, kat Asiut mburugun iri-ge, no lesa waneyekluk mburugun-o? Yi Eperat nde nayekluk mburugun-a?

¹⁹ Kondomok-nen meya kwaroso iri na-nen ndowaga angin worak kebem posolat, kat Kembal Pem Nagawan an keya nubusu iri na bem-nen andi bandi rak kubusu-o. Kar-e an kek tak nibigit lak, kamberam tak nibigen iri na-ge yawo-ge kumburugwi ngari rak posola, al ngari ki-o. An-e Nagawan Indo Kembal Pem Nagawan-nen yigi-o. An-e Nagawan Indo Mbal Pem Nagawan Namawi Worak Mondok Kek tak-nen yusu-o” luk yij-o.

Isarael nap-nen Nagawan Indo erembel wanurak insili rak pidnak wene 2:20-25

²⁰ Nagawan Indo-nen yosolar-e: ”Kar-e obi-net ndegel nuburak kisili yosolat, an-nen yidnak yidnak kwarurak kisili yosolat, nerembel wanurak kisili yosolat yigen-o. Ndobo kek tak ereba na wolak pem min e engga miri ludtak ereba na erem pem min-e kugwiwak ereba na erembel wanosolar-e, mbabi kwat tenak woraso-o.

²¹ Kar-e anggut konak uwi nggal-et lena wok kuburuk, yak kibigi-t nde, yawo kar-e erambet mbepme tenggal yoso ebe lak mende nde kwat yigen-o.

²² Kar-e kaboro marosolat sabun ondoro rak peleb-et nde, kat-nen meya kwaroso aroro-ge an nerengenma-ge nam-et kaleb-o.

²³ Kar-e kwiye lag-et yosolar-e: ’An-e meya yoso bug-o.’ Iri-nen: ’Mbaal kugwi na langgal luk mboroso bug-o’ yusu iri-ge kar-e wi-t keyagi-o! Kat-nen mbirikmu ereba-nen kwaroso kebage iri yik ki-o. Kat-nen meya kwaroso ereba na kindi yebet karuk, ’Ndemerer-o’ pari-o! Kar-e unta kowak-nen kugut kundurug-e ndumuluk mbururak meya, waring tenak woraso iri na nggal-nen yusu-o.

²⁴ Nde, unta iri na o lid ereba nggosolar-e, kugut ebem wok yosolar-e, mamak purag-e meya yoso-o. Nde, iye naso tarem-nen-e at iri-ge kugut kwindidnak worala me, kusi-nen-e kowak kore-ge noso bug-o.

²⁵ Isarael wa-e. Kar-e kugwiwak langgal luk pong kasu meyog-o. Iri yosola, kuwok ud ma-o. Kugwiwak wene mbo ubusu-ge meyog-o. Iri yosola, yi nere-nen koronggolem umbuk ma-o. Alat nde, kat-nen yosolar-e: ’An nindi-ge kugwiwak ebem kundugu woralat me, imin-et mbirimin-o. Tuguruk lobok yurag-e meya-o’ luk yusu-o” luk yij-o.

Isarael nap it-nen kwaridnak pem-et enpem wene mbaruwa-o 2:26-37

²⁶ Nagawan Indo-nen yosolar-e: ”Yariya wanugwi nap-nen yariya wanukmu tena onpogola, innggiri kali iri na nggal, kit Isarael nap min kit-nen idnak nagawan nagawan min kit-nen idnak yabu nggok tena woragwi nap min tepan omborak min Mbal Pem Nagawan ene lomboksa yugwi nap min-e kit oboksa kinnggiri kagub-o.

²⁷ Kit-nen e pok tak misik yak togolar-e: ’Neij-o’ luk wene mbo obogolat, nde, kerep misik yak togolar-e: ’Niya-o’ luk yak togolat kwarugwi bem kir-e kinnggiri kagub-o. Nde, ndemeret kir-e an-e kenmberam tak nobogolat, mondok kunlugwe-ge an nambigit mot tak pugwi bug-o. Alat nde, anggun panggun enpem mbosola tarem-e kit kinmiri yuwakluk an wene mbo nibili-o.

²⁸ Kat kinggi-nen konidnak kugwiwak ereba na-ge ngge me worasu-o? Yewura wa-e. Anggun panggun kebem mbosola-ge, kimiri yurak kugugwiwak nde ndak ala-ge, ’Nimiri yer-o’ luk enmengen mbari-o. Kat kugugwiwag-e kwarat, kuwi siri nggal-et kwarat worasu-o.

²⁹ Kir-e an nebem-e no mende nggal kinsili peraruk-nen kir-e an nimin wim mbatli-o?

³⁰ Kir-e an-nen nggomo kindidnak iri na wanigit lak yili me, wewesa-t an-e angin worak kenpem pusu-o. Singa ndakngge-nen isilepma yoso nggal, kir-e Mbal Pem Nagawan ene lomboksa yugwi nap undugwi-o.

³¹ Isarael nap wa-e. An-nen yusu wene yu kwara koler-o. An-e kit kenmanggim-e nembaga usu nggwarak nggal kwat yosolat, nggweyak ndamuk mom ndirik nggal kwat yosolat yigi-a? Alat nde, kit-nen yogolar-e: ’Nir-e weserak nindi-n pidnak yeba-t nul-o. At eram tuguruk mbururag-e ninmbir-o’ yili iri-ge noluk-nen yili-o?

³² Kwe ndugum-nen-e at umurug-e meme rak poso-a? Ap wanurak kwe-nen-e ap wanosolat-nen yururak sum-e meme rak poso-a? Alat nde, kir-e obi-net an-e meme rak nibigeb-o. Meme rak nuburuk woragolat-nen woraigeb-e wonarurag-e meya-o.

³³ Kit-nen kinndi-nen enpem pugwi ereba na inndi wanogolat-nen kwarugwi-ge kir-e mondok kenaru lombog-o. Kweyap terak waring kagwi-nen na kit-nen kwatli-ge kwara enaru yili-o.

³⁴ Kit kunsum eyabi ngin yusu-ge yariya wanugwi nap-nen yariya wanukmu, tena inpidnak eneyabi-nen kik yidnag-e lag-o. Are, insilobulo lak nap eneyabi min meya kwarugwi buk nap eneyabi min-nen kik tak pidnak worasu-o. Kunsum-e iri nggal-et nde,

³⁵ kit-nen yogolar-e: ’Nir-e meya yugwi buk me, Nagawan Indo-nen-e isilepma nenpem puwa bug-o’ yili-o. Alat nde, kit-nen-e: ’Nir-e ndemeret meya-t kwarugwi-o’ luk para yili buk pem-e Nagawan Indo an-nen-e angin worak mende kenpem pimin-o.

³⁶ Kir-e mondok ndag-et nak nin nap unkugwiwak ereba na eram yongga kunduwakluk mbitli-o! Nde, ’Asiut-nen yongga nunduwa-o’ luk yigeb-et nde, yongga kindigit lak, kinndi si lud yigep iri nggal-et Mesira-nen na iri nggal-et kwat kunpuwa-o.

³⁷ Kit-nen-e Mesira nap keya onpogolar-e, kinndi abi si lud yogolat, kinnggiri kagolat yugub-o. Nagawan Indo an-nen-e kit-nen: ’Ninmiri yuwa-o’ luk kinndi ebem wat tak puruk worali ereba na-ge keya inpimin-o. Iri rak onposola-ge, it-nen-e kir-e konak mbi kwat kunpuwa-ge lag-o” luk yij-o. 3:1–6:15 Pasal yeba arem-e Yewura nap-nen kugwiwak erembel wanidnak pem-e met inpidnak wene mbarak worasu-o. Nde, Isarael iri na me-ge ap anggun panggun tak onpogolat, enpem wene mot mot mbarigit lak yogolat kwarugwi bem-e abok-nen enpem angin worak purak wene obok yak indidnak wene mbarak worasu-o.