YEREMIA 18 - Nanduk Ngget Tul Pidnak Wene

Yeremia nggweyak yimbe konoso nap ama mbiridnak wene 18:1-12

¹ Nagawan Indo-nen an yak norosolar-e:

² ”Kar-e nggweyak yimbe konoso nap iri ama mbiri-o. Iri me-nen-e an-nen yak kururak wene-ge yak kirimin-o” luk yak nirij-o.

³ Yosoloma, an-e nggweyak yimbe konoso nap iri na ama mbiriginggal-e, yimbe konoso nap iri na-ge yimbe konugwi mende iri na bem-nen konosola kagi-o.

⁴ Nde, nggweyak yimbe konoso nap iri na-nen nggweyak yimbe konid iri na-ge konak iminep mbarak lak ala karuk, tuguruk at indi-n pidnak ndak ndak irit misik konij-o.

⁵ Iri yosola, Nagawan Indo-nen an-nen Isarael nap yak unduwakluk yak norosolar-e, yu nggal yij-o:

⁶ ”Nilirak wa-e. Mimi nggweyak pem-nen nggweyak yimbe konoso nap iri-nen kwarusu nggal, an-nen kit kwat kunpurag-e meya? Mimi nggweyak yimbe konoso nap inggem worasu iri nggal-et kir-e an ninggiyapma worali-o.

⁷ Nde, misik tarem an-nen wene mbarosola-t nde, ap enlem misik ala na, nagawan misik-nen tenagidnak wi ala na, an-nen tuguruk lesa wanosolat, yigisa keya bosolat, lak tak posolat kwarurak wene mbarak puruk worasoma nde,

⁸ ap enlem iri na-nen nde it-nen meya yugwi keya buruk, kondok yogola-ge, an-nen nindi arem yimnimin iri-ge kwarimin pug-o.

⁹ Alat nde, nin tarem an-nen wene mbarosola-t nde, ap enlem misik ala na, nagawan misik-nen tenagidnak wi ala na, an-nen-e mondok nggok tak posolat, tugup lak tak posolat nde kwarurak wene mbarak puruk worasoma nde,

¹⁰ ap enlem iri na-nen nde an-nen yidnak yidnak kwarogolat, meya kwarogola-ge, an-nen-e it-nen tenagidnak wi nggok tak posolat, tugup lak tak purak wene yigi iri-ge tuguruk lak tak pimin-o” luk yij-o.

¹¹ Nagawan Indo-nen an yak norosolar-e: ”Nde, yawo-ge Yewura nap min Yerusalem woragwi nap min iri yak indi-o. An-e it inmin wim mbarurak nindi konusu-o. Iri yosolar-e, it enpem angin worak mberak purak mende lid lud tak pusu-o. Iri bem-e ndak yak indi-o. It-nen meya kwarugwi iri keya buruk, enpage iri-ge tuguruk nden kujwag-o.

¹² Yak undugun-et nde, it-nen onggo yogolar-e: ’No manggim-nen nit-nen iri kwarugwi keya burag-o? Nir-e nondomok nindi-n pidnag-et kwarogolat wulmul-o! Nit nondomoktak-nen nondomok ninndi-n pidnak meya ereba nag-et kwarul-o!’ yuwa-o” luk yij-o.

Isarael nap-nen Nagawan Indo keya bidnak wene 18:13-17

¹³ Nagawan Indo-nen yosolar-e: ”’Yu nggal-e kwat yoso, lak?’ luk, ap enlem lombok kin wok inpi-o. Isarael nab-e unmunggum lera mboso mende mbi kwariga-o!

¹⁴ Libanon ndobo areyak tup tak pem ndugu ndugu woraso-ge mondok lak yoso bug-o. Pem irit woraso nag-o. Ndobo worak nggwe-nen yi ngaluk mbiridnag-e eberek yoso buk-nen yusu-o.

¹⁵ Alat nde, an nilirak-nen-e an-e meme rak nuburuk, kugwiwak amanggim emben konak mende kan pogolat worali-o. Ir-e nanduk-nen mburugwi tulabiyem-nen unuwok abis pijaksa mbud luk, wal tu nde nduluruk mbitli-o.

¹⁶ O yu-ge it-nen-e unmunggum lera mberak pugwi mende nde kwasa keya biga-o. Nde, pempa posorogolat wolma-o. Ap oboksa tula iri nggwe mborogolar-e, iri karuk, enaboro lera mbosolat, wi yogolar-e, enanggul merel kagolat wolma-o.

¹⁷ Mo luwaso (timur) nggwe-nen o wija lobok yosolat, o liri puk kuruk mburusu iri nggal, an nelem nab-e an-nen inminep weserak pumu, it unuwim nap-nen ndibi ndi rak unpuwa-o. It lak tak unpurak mende lobok yosola-ge, yongga indigit lak, nombol wok indimin-o” luk yij-o.

Yeremia wururak wene mbariga wene 18:18-23

¹⁸ Ap ereba-nen yogolar-e: ”Yawo-ge Yeremia wuruwok-nen wene mbaruwog-o. Nde, Mbal Pem Nagawan imin wene yurak iri-ge at nak ndag-e lak-nen yusu-o. Pempa tepan ombo-nen na nit mul nondogolat, inndi worak nap-nen na nggomo nondogolat, Mbal Pem Nagawan-nen kwarurak nenpem pidnak wene na at ene lomboksa yugwi nap-nen na yak nondogolat worali yebar-o. Ap enpem wene mbenarugwi sa-nen Yeremia indi ngara keya buruk, ’Kat kene-ge kulul pug-o’ luk yuwog-o” luk yiga-o.

¹⁹ Yogoloma, an-nen tepan yosolar-e: ”Nagawan Indo wa-e. An nene kwara kuli-o. An nuwim nap-nen an kwat nuburak yidnak wene-ge kwara kuli-o.

²⁰ Konak kwat onpogola-t nde, onggo-ge meya kwat unpurag-e ndag-er-a? Alat nde, ir-e an mberak nuburak nggweyak emnde mbaril nggwiga-o. Kat kisilepma it enpem mberak pugun naru an-e it enlat mbarosolat enambigit yigi iri na kindi yebet ki-o.

²¹ Alat nde, Nagawan Indo wa-e. Yawo-ge it inlirag-e nere-nen wat yogolat, wim pem ondogolat, kweyab-e ununtak min inlirak min lak yogolat, ab-e kugwi bem-nen wat yogolat, ap sujwe-ge wim pem-nen ondogolat kwaruwag-o.

²² Kat-nen ap nden unpugwi nab-e mimo it endam inpil lobok yugunmu, kwiye-nen enne sa nggwa mbuwag-o. Nde, ir-e an yoboksa mbuwakluk namanggim nggweyak yalil nggogolat, an ngonok makluk nare pogolat kwariga-o.

²³ Alat nde, Nagawan Indo kar-e it-nen an nuruwokluk yimniga-ge kar-e mondok karu-o. Iri bem-e, it meya yidnak kamberam tak posolat, it meya yidnak korak onposolat yurak pug-o. Kat kisilepma unpuruk-nen kwat onposolar-e, wosa mbud tak inpi-o” luk yigi-o.