YEREMIA 14 - Nanduk Ngget Tul Pidnak Wene

O kibi nggok kwiye worak mbud yidnak wene 14:1-18

¹ O kibi kwiye worak mbud yurak wene-ge Nagawan Indo-nen-e an-e yu nggal yak nirij-o:

² ”Uwi siri ereba na lak yurak ala karuk, Yewura-ge indi puru kwarat yusu-o. Nde, iri me woragwi nab-e ’Ngge nde kwarul-o?’ yogolar-e, nggweyak pem mbud luk, yane witli-o. Nde, Yerusalem woragwi nab-e yongga unduwakluk, nemengen mbal tenak worali-o.

³ Nde, ap enarengge worak nap ndegel unpugwi nap ereba na-ge yi kore wirik onpogola, nin me nan me mboropgolar-e, yi mbun emnde mbaridnak sa ereba na me kore yil mbitli-t nde, yi-ge eberek yidnak irit kali-o. Iri ala karuk, yimbe waruk mbiriga ereba na-ge embe we waruk lobok yili-o. Iri ala ’Ngge kwarul-o?’ luk, inndi kabak yogolar-e, unmud-nen enanggul tena bili-o.

⁴ Nde, iri me talme mbigit lak yosolat, nggweyag-e umbuk le yosolat, yang mbang mbosola karuk, ’Ngge kwarurag-o?’ luk, inndi kabak yogolar-e, unmud-nen enanggul tena bili-o.

⁵ Iri-nen tusuangge min-et umbuk yidnak me, urusa wam mendaso ija iri na-ge amarik ngget nderak nembaga ereba me keya buruk, mburusu-o.

⁶ Nde, kelerai wam erengen kege ereba na-ge tusuangge lak me, ndobo bem ereba na erengen nak yubun subun tak puruk, serigala ndakngge-nen kwaroso nggal indisep nak kegerenak larok yil lobok yusu-o.

⁷ Iri ala karuk, an nilirak-nen an nemengen mbarogolar-e: ’Nagawan Indo wa-e. Nit-nen meya kwarugwi iri na-nen ninnggiri wurusu-t nde, kat-nen iri nggal-et kwat kinpimin-o luk urul pigen iri na ndak ndak tak posolat, yongga nindi-o. Nit-nen pempa keya keberenak worali iri-ge ndemeret nir-e meya-t kat kimin pem kwat tenak worali-o.

⁸ Lak tak nonposo mende inggem-nen ninmiri yoso, nit Isarael nap-nen ninndi kebem wet tak puruk woragwi-ge kat nag-et nde, kar-e noluk-nen nit nunuwi yu me worasolar-et nde, nin nap nggal yosolat, erepma-nen lobok luk, misiget nak nene luk mburugwi nggal nak kwarosolat worasu-o?

⁹ Noluk-nen kar-e inndi kabak yogolat-nen kwarugwi nggal kwat yosolat, san ombo-nen ap yongga undurak amawi lak yoso nggal kwat yusu-o? Alat nde, Nagawan Indo wa-e. Kar-e ndemeret nit nennggendumu worasu-o! Nir-e kat kilirak-nen yili-o. Kat-nen-e nir-e keya nunpurak pug-o’ yak nitli-o” luk yij-o.

¹⁰ Nagawan Indo-nen ap enlem iri onowene yosolar-e: ”It iri-ge an naye-nen kwiye mbururak na nggok tak pogolat, it-nen kwara kondoksa woragit lak yogolat kwarugwi nap iri-ge an-nen-e nindingen tak unpusu-ge lag-o. It-nen lugudtak kwarugwi-ge an-e mondok meme rak pimin pug-o. It-nen meya kwarugwi bem-et onggo angin worak enpem pimin-o” luk yij-o.

¹¹ Iri luk, Nagawan Indo-nen an yak norosolar-e: ”It iri yongga undurak pem-e kar-e an nemengen mbarurak pug-o.

¹² It iri-ge an-nen yongga unduwakluk, nunggwi mende keya buruk, an nemengen nak mbal tenak wolma-t nde, it enne-ge mondok kulimin pug-o. It-nen an namanggim wam wosa kan pogolat, nggandum mbato pogolat kwaruwa-t nde, ereba puwa ereba-ge nindingen tak pimin pug-o. Alat nde, an-nen lak tak onposolar-e, wim abi bem-nen na, nogoro bem-nen na, kugwi lare bem-nen na lak tak onposolat irit kwarimin-o” luk yij-o.

¹³ Yosoloma, an-nen yosolar-e: ”Nagawan Indo Mondok Kek tak wa-e. Kat kene lomboksa yugwi nap-nen it yu me woragwi nap yak ondogolar-e: ’Nagawan Indo-nen-e o yu me-ge yamuksa konak nak woragub-o luk tul pidnak me, abok yu me-ge wim min nogoro min-e mondok mbud ma bug-o’ luk yak indili iri-ge kar-e karu worasu irir-o” luk yigi-o.

¹⁴ Yosolakmu, Nagawan Indo-nen onggo yosolar-e: ”It iri-ge an-nen yidnak nggal kwasa enesiget yili-o. It iri-ge an-nen na wirik inpigit lak, ’Iri nggal yurag-o’ luk enpem na pigit lak, inmin na wene yigit lag-er-o. It-nen nabi nggal pem kaidnak kiringgili ereba-ge an-nen mirik inpidnag-e lag-o. ’Iri nggal kwat ma-o’ luk yili ereba-ge it ondomok inndi-nen yebet kaidnak ebe lak ereba na yili-o.

¹⁵ It ondomok-nen an-nen yidnak nggal kwasa yogolar-e: ’O yu me-ge wim min nogoro min-e mbud ma bug-o’ luk yili iri-ge ndemeret an-nen yidnak pem yili-ge lag-o. Nagawan Indo an-nen wirik inpigit lak nap ereba kwat unpurak perak nde Yeremia kat yak kereyeg-o. An-nen it ondosolar-e, wim pem-nen na, nogoro bem-nen na lak tak inpimin-o.

¹⁶ Ennesiget an nene lomboksa yugwi nap ereba-nen ennesiget ’Iri nggal kwaruwa-o’ luk yiga ereba na wanugwi nab-e it ereba na lak tak inpimin nggal kwasa-t lak tak inpimin-o. Ontogwag-e ap-nen yapma inpigit lak, Yerusalem iri me tula tula ereba mbo unpuwa-o. Iri nggal kwasa it min inlirak min onkwela min-e onowak ma-o. It-nen meya kwarugwi onggo irit kwat inpimin-o” luk yij-o.

¹⁷ Nagawan Indo-nen an yak norosolar-e: ”Kat kindi puru yusu wene-ge an nelem nap iri yak indi-o” yij-o. Yosoloma, an-nen-e yu nggal yigi-o: ”An-e mondok yip kundugu lengge-nen kubu-nen pok tak pigit lak, yib-e nguk tenak nak worayeg-o. Nde, an yip tusu iri-ge an nelem nab-e ondogolat eneyabi wirik pidnak me, andi bandi kagola-nen yip tusu-o.

¹⁸ Nde, an nde yapmu mborosolar-e, wim pem indidnak nap ontogwak kasu-o. Nde, o silmu-ge ab-e nogoro-nen wat yogolat, yane worogola eneyasu-o. Nde, tepan omborak min Mbal Pem Nagawan ene lomboksa yugwi nap min-e it-nen kwara yebet kagit lak-nen it eneyabu ereba na-ge wok tenak worali-o” luk yigi-o.

Isarael nap-nen enabuwa yuwakluk Nagawan Indo nggi yak tidnak wene 14:19-22

¹⁹ Nagawan Indo wa-e. Kar-e Yewura nab-e mondok mbo inpigen, lak? Sion woragwi nab-e abu kisili rak inpigen, lak? Noluk-nen kar-e iri nggal kisilepma min nindigenma, nir-e mondok ki yurak meya yusu-o? Nit-nen yamuksa wolmomtak kore yili-ge wewesa kore yili-o. Ki rak nunpurak ninndi wat tak woraige-t nde, nenpem mbud tenak nde worali-o.

²⁰ Nagawan Indo wa-e. Kat kerengen pem-et nir-e meya kwarugwi-o. Iri ala, nir-e nit-nen meya yugwi min nit nonmborak-nen meya yugwi min patli-o.

²¹ Kat-nen urul yak nindigen wene ereba na kindi yebet ki-o. Kat-nen-e kisili rak nunpurak pug-o. Kat-nen nit ninmin ”Irit kwat kinpimin-o” luk urul pigen iri na-ge lak tak purak pug-o. Nde, Yerusalem kat koreyak woraso kondoro mondok abinal worak woraso sa yu-ge kar-e unu emben to rak purak pug-o.

²² Nde, enlem nin nap unkugwiwak-nen-e talme nggweyakma yu me mberak pil mbumomtag-e meya-o. Mbal-nen na at ondomok amawi bem-nen talme mberak pil mbumomtak na meya-o. Nagawan Indo Nenmbal Pem Nagawan wa-e. Nit ninndi-ge kat kebem nak mbung mbung tak worali-o. Ereba oboksa-ge kat nak-nen kwarak posola-nen kwat yusu-o.