YEREMIA 1 - Nanduk Ngget Tul Pidnak Wene

Yeremia

¹ Engga yu arem mbarak worasu-ge tepan ombo misik Yeremia Ilkia ambara iri na Mbenyamin nap onnggweyak pem o Anatot woraso iri na owene mbarak worasu-o.

² Nde, Yewura nap nagawan Yosia Amon ambara iri na-nen Yewura wi tena woralat olengen tiga belas tak posoma tarem-e Nagawan Indo-nen-e Yeremia imin wene yij-o.

³ Iri na kwatluk ombol nggwe-ge Nagawan Indo-nen-e pempa kundugu yak terenak woralar-e, Yosia ambara Yoyakim nagawan men yid kuri iri-net kundugu iri-net Yosia ambara Sendekia iri na nagawan men yarik, olengen sebelas wok yij-o. Nde, olengen iri arem waneya lima rak pukmu-ge, Yerusalem woragwi nab-e kamat unpuruk mbiriga-o.

Yeremia wene mbo ibidnak wene 1:4-10

^4-5 Nagawan Indo-nen yosolar-e: ”Kat kiya arem awo kwarak kibigit lak ma, iri-nen kat awo ndet yigit lak ma-net ap enlem oboksa enmanggim an nene lomboksa yoso nap woranokluk len kubukmu-o” luk yij-o.

⁶ Yosoloma, an-nen onggo yak tosolar-e: ”Nagawan Indo Mondok Kek tak wa-e. An-e li awo mendaso me, an-nen wene yurag-e mondok meya-o” luk yigi-o.

⁷ Alat nde, Nagawan Indo-nen onggo yak norosolar-e: ”Kat-nen yosolar-e: ’An-e li awo mendaso’ luk yusu-ge meyog-o. An-nen nde ap endam wirik kobosola-ge, mondok mburugun-er-o. Nde, an-nen ’Mondok yak undurag-o’ luk kebem pimin-e mondok oboksa yag-et undurag-o.

⁸ An-e kat nggetlel kuburuk woramin me, kar-e it enaye yurak pug-o. An-e Nagawan Indo-net kimin wene yusu-o” luk yij-o.

⁹ Iri lug-e, Nagawan Indo inggi mberak parik, nemnde tena buruk-nen yosolar-e: ”Kwara kuluruk, an-nen yusu wene yu ap inmbiri bem yi-o.

¹⁰ Ap enlem oboksa tena unpurak amawi min nggweyakma yu me-nen tenagidnak wi tenagurak amawi min mbud tak purak amawi min tud tak purak amawi min lembera nden yaga keya burak amawi min lak tak unpurak amawi min mendak purak amawi min uwi yagurak amawi min-e o yawo yu-net an-nen kinggem pusu-o” luk yak nirij-o.

Nabi nggal pem mberen kagaid wene 1:11-19

¹¹ Nagawan Indo-nen an yak norosolar-e: ”Yeremia wa-e. Kar-e no kasu-o?” yak norosoloma, an-nen onggo yosolar-e: ”Nagawan Indo wa-e. An-e e mbandam inggi kasu-o” luk yigi-o.

¹² Yosolakmu, Nagawan Indo-nen yosolar-e: ”Iri-ge ndemerer-o. An-nen yusu wene oboksa ebe-t kwat makluk, an-e mondok yik karok irit worasu-o” luk yij-o.

¹³ Iri yosoluk, tuguruk Nagawan Indo-net an kin wok nobosolar-e: ”Misig-e no mende kasu-o?” luk yak nirij-o. Iri yosoloma, an-nen onggo yosolar-e: ”Abare abam (utara) nggwe togolwak misik arem kenanggo-nen embem-nen yok mbok mbosola, yu nggwe landoksa nggilara lobok yekluk lande rak worala kasu-o” yosolakmu,

¹⁴ Nagawan Indo-nen yosolar-e: ”Lak tak onposo mende-ge abare abam (utara) nggwe-nen lobok yosolar-e, o yu me woragwi nap enpem mbud yekluk kobong yosolat nggilara mbuma-o.

¹⁵ An-nen abare abam (utara) nggwe woragwi yonggo unpumu, it nagawan nagawan ereba na lobok yuwarik, Yerusalem yemndak puruk, o iri me kerep pak leget min kerep pak tumende ereba na min Yewura iri me o siri oboksa min it-nen mengga ombo luk wolma-o.

¹⁶ An nilirak-nen an-e abu onmbol nggwe rak nuburuk, ir-e meya nak kwat tenak woragolar-e, kugwiwak ereba na amanggim wam wosa kan pogolat, kugwiwak ut memera ndak worak puruk, erembel wanogolat kwatli iri bem-e an-nen angin worak enpem pimin-o.

¹⁷ Iri bem-e, Yeremia wa-e. An-nen kebem pusu wene yeba oboksa it yak indil mbururak pem lud tak wolmin-o. Kar-e it endam wok yosola, an-nen kwiye ijak wosa keya kibimin naru, kar-e it enaye-ge mondok yurak pug-o.

^18-19 Yeremia wa-e. Wene yu kwara kuli-o! O yu me woragwi oboksa, Yewura nap nagawan nagawan min ap yok nggok ereba min tepan omborak min we nap min it-nen-e kebem-et mbud yogolat wolma-o. Alat nde, yawo-ge kat-nen it enpem kore yurak amawi irit wok kurusu-o. Kar-e o siri kerep pak leget wa nggal kwat yosolat, mbesi o owak nggal kwat yosolat, tembaga-nen wiridnak kerep pak leget nggal kwat yosolat irit yugun-o. An-e kimin woralat, nggetlel kuburuk woralat kwarimin me, it-nen-e kar-e urugwe nggwe rak kubuwa bug-o. Nagawan Indo an-net wene yu yusu-o” luk yij-o.