YAKOBUS 5 - Nanduk Ngget Tul Pidnak Wene

Enarengge worak nap nggomo indidnak wene 5:1-6

¹ Kenarengge worak nap wa-e. An-nen yak kundusu yu koler-o. Andi bandi mende kenpem mbuma na yebet karuk, yip togolat, tabun puruk wolmer-o.

² Kenarengge na lebe yosolat, kunsum-e sil-nen nasolat yij-o.

³ Kit-nen idnak emas posid min perak posid min-e pase pij-o. Nde, pase pidnak iri-nen-e kit kenare posolat, kan-nen nok onposo nggal kunnuno nujwa-o. Kit kinsilobulo-ge i worok tak purak tarem yu ndok worogolat woraigeb-o.

⁴ Kir-e kit keneyabu wanili nap iri onggo wok indili bug-o. Iri ala karuk, nggi kererenak worali iri koler-o. Kunmburu kenmanggim ndakwi nap-nen-e: ”Wok nender-o” luk kum mbo bili iri-ge Mbal Pem Nagawan Amawi worak Nagawan Indo na eyanggo ma nggwij-o.

⁵ Kir-e nggweyak ma yu me kenarengge worak woragolar-e, kenalin kenalen min woraigeb-o. Nde, kundurak pem kondomok ndet yogolat worali-o.

⁶ Kir-e meya kwarigit lak nap enpem wene mbarogolat, ondogolat yigeb-et nde, ir-e onggo kindigit lag-o.

Mamak puruk woragolat, tepan yurak wene 5:7-20

⁷ Iri bem-e nanggamirak wa-e. Kir-e mamak puruk irit worakmu, Nagawan Indo lobok yuwag-o. Yabu wanoso nab-e at-nen yabu wanidnak iri yik karok worasoma, ebe kwarat makluk mamak puruk woraso iri ker-o. Mamak puruk irit worasolar-e, isi poso talme min lera mboso talme min yik karok woraso-o.

⁸ Kit na irit mamak puruk wolmer-o. Nagawan Indo lobok yurak tarem panggo yid me, kinndi tugup lak wolmer-o.

⁹ Nanggamirak wa-e. Mbal Pem Nagawan-nen kit kenpem wene mbaruwa naru, kit na kit-net nobokpe kobokpe yurak pug-o. Yebet ker-o. Ap enpem wene mbaroso nab-e lobok eyekluk ijok tumende bem pil wagarik worasu-o.

¹⁰ Nanggamirak wa-e. Mbal Pem Nagawan ene lomboksa yugwi nap-nen Nagawan Indo unu bem wene yogola, andi bandi rak onpogola, mamak puruk woraiga iri na nggal-et kwarer-o.

¹¹ Ir-e mamak puruk woraidnak me, ir-e imbiringgat-nen yili-o luk nir-e yugwi-o. Ayub-nen mamak puruk woragaij-e kir-e kulugwi nar-o. Nagawan Indo iri-ge mondok enabuwa kaso, indi konak me, abok nggwe-ge Ayup na imbiringgat tak pid iri-ge kenaru nar-o.

¹² Nanggamirak wa-e. Wene nggok lombog-e yu-o: Owak mbarogolar-e, mbal min nggweyak min yi mende ndi mende mbi min unu luk owak mbarurak pug-o. Mbal Pem Nagawan-nen kenpem wene mbaruwa naru, ”Ye” yurak ala-ge, ”Ye” nak yurag-o. Nde, ”Lag-o” yurak ala-ge, ”Lag-o” nak yurag-o.

¹³ Kit kennggendumu nde ap mbi anggun panggun worasolar-e, tepan yuwag-o. Nde, ap mbi alen pem woralar-e, Mbal Pem Nagawan erembel wanosolat, ndawi yosolat wolmag-o.

¹⁴ Kit kennggendumu ap mbi kugi worak woralar-e, lambuk tak inpidnak nap-nen idnak ogore yidnak nap yonggo unpuwag-o. It-nen Nagawan Indo unu bem amburu anggul pem kilik puruk tepan ubuwak-nen.

¹⁵ Nde, inndi angin tubu yogolat-nen tepan yogola-ge, kugi worak nap iri kugi lak tak puruk, Nagawan Indo-nen ki rak puwa-o. Nde, at-nen meya kwaridnak mbi worala-ge, amberam tak puwa-o.

¹⁶ Iri bem-e, kit ki rak kunpuwaklug-e, kit na kit-net meya yidnak pal kerak mbogolat, kit na kit-net tepan pegerak mbogolat wolmer-o. Lud tak nak kwaroso nap-nen indi angin tubu yosolat-nen tepan yusu iri-ge amawi kwarat-nen yusu-o.

¹⁷ Elia iri-ge ki nap nit nggal-et nde, talme mbigit lak makluk at-nen ”Kwar-et ma-o” luk keresa tepan yid pem-e olengen kenan tak puruk, waneya enam irit talme mbigit lak nak woragaij-o.

¹⁸ Iri luk, at-nen tuguruk tepan yosoloma-ge, mbal pem-nen talme mberak pil mbuwasola-ge, nggweyak pem ya woraso mende na ebe rak pij-o.

¹⁹ Nanggamirak wa-e. Kit kennggendumu ap mbi-nen ndemeret wene na keya buruk, nin tula mburuwa-t nde, ap mbi-nen tuguruk nden yaga ibil lobok yosola-ge,

²⁰ engga wene yu kinndi yebet yebet tak wolmer-o: Ta-nen nde meya yoso nap iri na meya tulabiyem-nen nden yaga ibil lobok yosolar-e, meya yoso nap iri na-ge at wat momtak sa-nen indi imiri yosolar-e, at meya yidnak kwarar-et nde, lak tak ubuwa-o.