YAKOBUS 2 - Nanduk Ngget Tul Pidnak Wene

Ap enpage lumbunurak pug-o 2:1-13

¹ Nanggamirak wa-e. Nit-nen idnak Nagawan Indo Yesus Kerisut, Unu kek tak Pidnak Nagawan iri ebem kit kinndi angin tubu yidnak iri na bem-nen ap enpage-ge lumbunurak pug-o.

² Nde, kit tepan yogolat ndok worak worakmu, arengge worak nap mbi amanggo emas-nen konidnak min usum konak nak yirik ngguruk worasoma, imbirik arengge lak nap mbi usum na ndelep pelep yirik nggosola-ge,

³ kit-nen nde sum konak yiridnak nap iri na kwara kek tak obogolat-nen yak togolar-e: ”Nab-o. Kar-e konak ma ya-t kore yi-o” yak togolar-et nde, arengge lak nap iri yak togolar-e: ”Kat ereya mendak wiri-o”, are, ”An nijok eralu kune bem ya kore yi-o” yak togolat yugup iri-ge,

⁴ iri nggal kwarogolar-e, kit na kit nab-et nde, enpage lombonogolar-e, kinndi-nen meya yebet kagwi bem-nen ap enpem wene mbatli-a?

⁵ Kenabuwa worak nanggamirak wa-e. Wene yu koler-o. Nggweyak ma nap-nen enarengge lak eneyali nab-e Mbal Pem Nagawan-nen len onposolar-e, inndi angin tubu yugwi elem kwara winde rak unpuruk, Mbal Pem Nagawan abuwa kagwi nap enmanggim urul pidnak at-nen tenagaidnak wi na winde rak enpeyekluk len inpij-o.

⁶ Alat nde, kit-nen-e enarengge lak nab-e no yik kidnak nggal tak inpili-o. Nde, kit teberak konpogolat, kenpem wene mbarugwi sa lit keneyaruk mbitli nab-e enarengge worak nap-net kwat kinpili yu kali bug-a?

⁷ Nde, kit kunnu konak Mbal Pem Nagawan-nen yaridnak iri na-ge it iri-net meya rak pili-o.

⁸ Imiri mbarak pidnak wene owak ndum Mbal Pem Nagawan engga bem-nen yosolar-e: ”Kat kambik kabuwa kasu nggal-et kat keralu nap na enabuwa ki-o” luk iri yidnak iri na-t kwatli ala-ge, ob-et kwatli-o.

⁹ Alat nde, kit-nen ap enpage limbinili ala-ge, meya irit kwatli-o. Iri kwaridnak pem-e, imiri mbarak pidnak wene-nen kit kenpem wene mbarosolar-e, wene tarugwi nap tak kunpusu irir-o.

¹⁰ Imiri mbarak pidnak wene pidsa kwarogolar-et nde, misiget nak kuruk togola-ge, wene pidsa kwid tili-o.

¹¹ ”Mbabi yurak pug-o” luk yid nap iri na-nen wene misik yosolar-e: ”Ap wururak pug-o” luk yij-o. Nde, kat-nen mbabi yigit lag-et nde, ap worosola-ge, kar-e imiri mbarak pidnak wene pidsa kuruk toso nap-net yusu-o.

¹² Nde, kit-nen wene yogolat na, yi kwatlik ndi kwatlik kwarogolat na, ”Ap wisirik onposo imiri mbarak pidnak wene iri bem-nen an nebem wene mbaruwa-o” luk kwara wolmer-o.

¹³ Ap enabuwa kagwi buk nap enpem wene mbarosolar-e, enabuwa lag-et enpem wene mbaruwa-o. Alat nde, ap enabuwa kagwi nab-e nenpem wene mbaruwa-o luk unmud kudtak pug-o.

Inndi angin tubu yugwi min ininggi-nen kwarugwi min 2:14-26

¹⁴ Nanggamirak wa-e. Ap mbi-nen yosolar-e: ”An nindi angin tubu yigi-o” yosolar-et nde, ininggi-nen kwarugwi mende bem-e kwarigit lak ala-ge, no manggim ”An-e nindi angin tubu yusu-o” luk yusu-o? Nde, iri nggal kwasa indi angin tubu yidnak iri-nen inmiri yoso-a?

¹⁵ Kit kennggamirak ap ala na, kwami ala na, yururak sum min it norak nunggwi mende min lag-et woragola-t nde,

¹⁶ kit misik-nen it yak ondogolar-e: ”Embem sum ob-et yiri-o. Nde, nunggwi mende na ob-et min-o” luk yak ondogolar-et nde, it-nen ukwe peraidnak mende wok indigit lak ala-ge, iri-ge no manggim yak undurag-o?

¹⁷ Nde, inndi angin tubu yugwi-ge iri nggal-nen yusu-o: nir-e ninndi angin tubu yul-et nde, nininggi-nen kwarugwi mende nde kwarigit lak ala-ge, nit ninndi angin tubu yidnak na-ge wat yidnak-nen yusu-o.

¹⁸ Alat nde, ap mbi-nen yosolar-e: ”Kar-e kindi angin tubu yidnak worasu-o. Nde, an-e ininggi-nen kwarugwi mende kwaroso-o” luk yosola-ge, an-nen onggo yosolar-e: ”Ininggi-nen kwarugwi mende kwarigit lak, kindi angin tubu yigen iri mirik nibi-o. Nde, an-nen-e ininggi-nen kwarugwi mende kwaroso bem-nen nindi angin tubu yidnak mirik kibimin-o.”

¹⁹ ”Mbal Pem Nagawan-e misiget nak-nen yusu-o” luk kindi angin tubu yusu iri-ge kar-e ob-et yusu-t nde, kugi-nen na Mbal Pem Nagawan ebem inndi angin tubu luk, kwiye-nen onowak lele-t yili-o.

²⁰ Kar-e wid indi worak-nen yusu-o! Inndi angin tubu yogolar-et nde, ininggi-nen kwarugwi mende kwarigit lak iri-ge ebe lak mende-nen yusu-o luk mirik kuburak kindingen-a?

²¹ Nit nenlawingga Abaram iri ker-o. Wam wosa purak sa iri na me at ambara Isak na-ge Mbal Pem Nagawan amanggim wosa peyekluk yid iri bem-e Mbal Pem Nagawan-nen Abaram na-ge lud tak nak tak ibid irir-o.

²² Iri kwarid iri bem yenggerak pili-o. Inndi angin tubu yogolar-e, ininggi-nen kwarugwi mende min-et kwarurag-o. Nde, iri nggal kwarogola-ge, inndi angin tubu yidnak na iminep mbal yusu-o.

²³ Iri kwarid iri-ge, engga wene misik-nen yidnak ndak ndak tak pij-o. Engga wene iri-nen yosolar-e: ”Abaram na-ge Mbal Pem Nagawan ebem indi angin tubu yid iri bem-nen Mbal Pem Nagawan-nen at lud tak nak tak ibij-o.” Iri bem-nen Abaram na unu misik yogolar-e: ”Mbal Pem Nagawan anggam-o” yugwi-o.

²⁴ Iri bem-e, ap lud tak nak tak onposo-ge inndi angin tubu yidnak pem nak-nen-e lag-o. Are, ininggi-nen kwarugwi mende bem min-net lud tak nak tak onposo-o.

²⁵ Iri nggal, ndumu terak yebugwi kwe Arakap iri-nen kwarosolar-e, enlengen waruk wirik inpidnak nap na kubu unpuruk, tu nin nggwe wirik inpid iri bem-e Mbal Pem Nagawan-nen Arakap na-ge lud tak nak tak ibid irir-o.

²⁶ Nde, enpe worala-t nde, inndi nde lak-nen-e wat yidnak-nen yusu-o. Iri nggal-et inndi angin tubu yili-t nde, ininggi-nen kwarugwi mende nde kwarigit lak yogolar-e, inndi angin tubu yidnak iri-ge wat yidnak-nen yusu-o.