YAKOBUS 1 - Nanduk Ngget Tul Pidnak Wene

Wa yak indidnak wene 1:1

¹ Mbal Pem Nagawan min Nagawan Indo Yesus Kerisut min ndegel onposo nap Yakobus an-nen kit Yawuri nap kenlem duabelas ap ennggendumu nat karuk worali na wiwa-o yak kundusu-o.

Inndi angin tubu luk, inndi nggat nggat worak wolmomtak wene 1:2-8

² Nowe nowosi wa-e. Kit kinndi ngarurak mende nin tak nan tak iri kenpem mbosola-ge, nir-e imbiringgat tak nunpusu-o luk yebet kudtag-o.

³ Kinndi kayekluk kinndi ngarosola-ge, ninndi unuk lak tak peyekluk-nen yusu-o luk kenaru nar-o.

⁴ Nde, kinndi unuk lak tak pidnak iri-nen-e iminep mbal yobokluk ndak tak konposolat, yi mende ndi mende ukwe lak tak konposolat mag-o.

⁵ Ap mbi kit kennggendumu indi tenggerak elem wanigit lak worala-ge, indi nggat nggat elem na wok tuwakluk Mbal Pem Nagawan ebem nggi yurag-o. Nggi yosola-ge, Mbal Pem Nagawan-nen enabuwa karuk, indi konag-et ap pidsa we wok ondoso me, wok tuwa-o.

⁶ Alat nde, nggi yosolar-e, indi mberen min nggi yurak pug-o. Are, wanimin-o luk indi angin tubu luk-net nggi yurag-o. Nde, indi mberen min-nen nggi yusu nab-e obube puk kil lobok yosolat, yi koma yi nggweyerep nggwayerep lobok yosolat, waruk ponok lel ponok lel waring kasu iri nggal-nen yusu-o.

⁷ Iri nggal kwarusu nab-e ”Nagawan Indo-nen yi mende ndi mende wok nuruwa-o” luk pururak pug-o.

⁸ Nde, indi mberen worak nab-e indi yamuksa worasu bug-o.

Enarengge lak woragwi min enarengge worak woragwi min 1:9-11

⁹ Nde, arengge lak teberak woraso nab-e Mbal Pem Nagawan-nen kek tak obosola-ge, alen min-et wolmag-o.

¹⁰ Nde, arengge worak nap na Mbal Pem Nagawan-nen teberak obosola-ge, alen min-et wolmag-o. Nde, enarengge worak nab-e tusuwangge engen isi lera mbusu nggal, lak ma-o.

¹¹ Mo kona pil wasolat-nen tusuwangge na terabet yosolar-e, isi na-ge lera mbosolar-e, umuruk na lak yoso-o. Iri nggal-et arengge worak nab-e arengge ndogorosoma ereya na-net lak ma-o.

Ap inndi ngarosolat, enarem woraga pil nggosolat yoso wene 1:12-18

¹² At indi ngarosola-t nde, mamak puruk wolma nab-e imbiringgat-nen yusu-o. Nde, indi kayekluk indi ngaruwa-t nde, ombol nggwe yuwa nap iri-ge Mbal Pem Nagawan abuwa kagwi nap enmanggim unlug-et wolmomtak kid kud Mbal Pem Nagawan-nen urul paga pidnak irit wanuwa-o.

¹³ Ap misik nde indi ngarosola-ge, ”Lag-o. Mbal Pem Nagawan-nen nindi ngarusu-o” luk yurak pug-o. Meya kwarugwi mende iri-nen-e Mbal Pem Nagawan mondok indi ngaroso buk me, Mbal Pem Nagawan-nen na ap misiger-o luk tet indi ngaroso bug-o.

¹⁴ Alat nde, at ondomok ukwe ukwe iri na-net ap indi ngarosola, at indi ebem perek turuk, at ondomok ombol pem lasu-o.

¹⁵ Nde, at-nen ukwe ukwe iri na-nen yidnak yidnak kwarosolar-e, meya kwarugwi elem ndagoso-o. Nde, meya na ebe kwarosolar-e, wat yugwi elem irit ndagoso-o.

¹⁶ Nanggamirak kenabuwa worak wa-e. Kit na kit-net konmbol pem lali-ge meyog-o.

¹⁷ We wok ondoso mende konak iminep mbarak oboksa iri-ge teram nggwe-nen mberak pil mbuwasu iri-ge aid arem worasu yaya elem ndak worak pidnak Mbal Pem Nagawan-nen pil mbuwaso-o. Nin yoso buk Mbal Pem Nagawan-e nden karuk, lumurak nonposo buk-nen yusu-o.

¹⁸ At ondomok indi-n pidnak pem-net lud tak nak yoso ene bem-nen-e nit ndak wat nonposolar-e, at-nen ndak worak pidnak tengge oboksa ennggendumu nir-e at indi kundik tak nenpeyekluk, ndak worak ninpij-o.

Kuluruk, iri na-nen yidnak yidnak kwarurak wene 1:19-27

¹⁹ Nanggamirak kenabuwa worak wa-e. Wene yu kwara kinndi yebet ker-o. Ap pidsa mondok ndag-et nak kulurug-et nde, kenne orog-et yogolat, orog-et kinsilepma yogolat wolmomtag-o.

²⁰ Ap-nen insilepma yili iri-ge Mbal Pem Nagawan alen tak purak konak mbi kwatli-ge lag-o.

²¹ Iri bem-e kop kap tobok tak poso mende pidsa min meya kwarat kwarugwi mende oboksa min mbo buruk, Mbal Pem Nagawan-nen kit kinndi arem aid wene yagaid na-ge kinndi teberak pem-nen wanogolat wolmer-o. Aid wene na-ge kit kinmiri yurak pem amawi mondok ndak-nen yusu-o.

²² Nde, kit-nen aid wene iri-ge kulurak nag-e lag-o. Kuluruk, kulidnak iri ndak ndag-et kwarurag-o. Nde, kit-nen iri nggal kwarigit lak yogolar-e, kenambikpebe konmbol pem lali-o.

²³ Ap misik-nen nde aid wene kulurug-et nde, kulidnak iri ndak ndak kwarusu buk ala-ge, at ambik erare papalo arem-nen kaidnak nggal-nen yusu-o.

²⁴ At erare-ge yanem-et lombot pidnak na-t nde, waring kasolat-nen-e ”Nerare na ngge nggal nde kagi-o?” luk kabak tak poso-o.

²⁵ Alat nde, Mbal Pem Nagawan-nen yidnak wene iri-ge ap weserak unpurak amawi worak iminep mbarak wene-nen yusu-o. Nde, wene iri na kwara mbenarogolat, kwara yebet kagolat, kuluruk nak meme rak purak pem-e lag-o, are, iri-nen yidnak yidnak nak kwara kwatli nab-e at-nen kwaroso oboksa iri na bem-e Mbal Pem Nagawan-e imbiringgat tak ubuwa-o.

²⁶ Ap-nen-e ”An-e Mbal Pem Nagawan erembel wanoso-nen yusu-o” luk perasolat-net nde, indi-ge konigit lak, wene-ge we ama bem perek nak yosola-ge, at-nen at ambik ombol pem lasu-o. Mbal Pem Nagawan erembel wanusu iri-ge we kasa ereba-t wanusu-o.

²⁷ Mbal Pem Nagawan erengen pem at erembel wanugwi ndemeret iminep mbarak, marak nak wolmomtag-e yu-o: li mul min kweyap togwe min anggun panggun woragola-ge, yongga ondogolat; iri-nen na nggweyak ma yu-nen meya rak unpuwa naru, it na it-nen kwil kwalsa wolmomtag-o.