WONARIDNAK WENE 6 - Nanduk Ngget Tul Pidnak Wene

Nasit nap-nen kwarurak wene 6:1-21

^1-2 Nagawan Indo-nen Musa ebem posolar-e: ”Kwarurak mururak yeba-ge Isarael nap yak indi-o. Kwami-nen ala na, ap-nen ala na, it-nen yogola-t nde: ’An-e Nagawan Indo amanggim nak Nasit nap woramin-o’ luk nde owak mbarosolat urul posola-ge,

^3-4 it iri na-ge anggut amburu min enanggul nden kaso engen amburu min-e norak pug-o. Indi nden kaso mende anggut-nen konidnak amburu min iri mende erep min-nen konidnag-e mondok norak pug-o. Anggut engen konak na, lerak na, engen kerengen arem woraso min aboro min mondok norak pug-o.

⁵ At-nen: ’Nagawan Indo amanggim lenak woramin-o’ luk owak mbatluk woralar-e, anggulsu min ondoksu min mbarigit lak, mor-et keya burag-o. At-nen ’Irit kwarimin-o’ luk owak mbaridnak iri na bem-et woralar-e, anggulsu min ondoksu min-e mot makluk keya burag-o. Iri kwasa woraruk larok yurak yidnak iri na bem wok yosola-net larok yurag-o.

^6-7 Nde, anggulsu mot iri karug-e, ’Ar-e Mbal Pem Nagawan amanggim nak lenak worasu-o’ luk yenggerak purag-o. Nde, at-nen ’Irit kwarimin-o’ luk lenak woralar-e, mbilaro ngin yaga wanuwa naru, at iri na-ge ap lugwinikmu entalu wok yurak puk. At ondomok eid ija owe owot wat ma-t nde, mondok inmin-e ebem yurak pug-o.

⁸ At iri-ge Nasit nap woralar-e, Nagawan Indo amanggim nak lenak wolmomtag-o.

⁹ At Nasit nap iri na eram-nen nde mimo ap misik wat yosolat imin ebem yosolat anggulsu Nagawan Indo amanggim mot woraso iri na mbilaro ngin yosola-ge, tuguruk mat momtak anggulsu mbarurak pem-e tuju bem woraruk, ndak yosola-ge, anggulsu min ondoksu min mbarurag-o.

¹⁰ Nde, delapan pem tak posolar-e, towe merepati nggwende nggal misik ala na irit, towe tekukut misik ala na irit, tepan ombo endam towe mberen ereya na waruk Nagawan Indo uwi tumende bem mbarurag-o.

¹¹ Nde, towe ereya na-ge misig-e at iri meya yidnak korak purak pem wosa kan purag-o. Nde, misig-e at mbilaro ngin yidnak iri na lak tak purak pem wosa kan purag-o. Iri rak puruk, iri na tarem-et anggulsu-ge tuguruk Nagawan Indo amanggim lenak purag-o.

¹² Iri na kwatlug-e, Nagawan Indo amanggim tuguruk Nasit nap lena labuk momtag-o. Nde, at Nagawan Indo amanggim lenak woralat-nen wolmomtak kuri mbarak pidnak iri na-ge mbilaro ngin mende at ebem mbosolat owak mbarid iri na ndak ndak kwarigit lak me, onggo-ge lomba amarik olengen misik woraidnak mbi Nagawan Indo amanggim purag-o.

¹³ Nasit nap-nen owak mbatluk wolmomtak kuri pidnak iri na ndak yosola-ge, yu nggal kwarurag-o. Ap iri na-ge mondok Nagawan Indo uwi tumende bem waruk mbutlug-e,

¹⁴ lomba ebem kopkap lak kenan min-et waruk mbururag-o. Mbutlug-e, lomba kusi olengen misik woraidnak misig-e wosa kan purag-o. Nde, kowak olengen misik woraidnak misig-e meya yidnak lak tak purak pem wosa purag-o. Nde, lomba kusi misig-e Nagawan Indo min kundurak pem wururag-o.

¹⁵ Iri yogolar-e, oroti saitun amburu min omok wosa oroti lomboroso mende min pigit lak kumbungensa woraidnak mul sum misik min oroti leplepsa woraidnak saitun amburu yugurik min nggandum mbato ngget mbarak min anggut engen amburu min-et purag-o.

¹⁶ Ereba oboksa-ge tepan ombo-nen-e Nagawan Indo eram waruk mbutluk, at meya yidnak lak tak pogolat, emben wok togolat kan purag-o.

¹⁷ Oroti mul sum misik iri na min-e lomba kusi iri na-ge Nagawan Indo imin kundurak pem wosa kan purag-o. Iri-nen nggandum mbato ngget mbarak min anggut engen amburu min-et Nagawan Indo amanggim purag-o.

¹⁸ Iri kwarogolar-e, Nasit nap iri na-ge Nagawan Indo uwi tumende bem-nen anggulsu mbarurag-o. Mbatluk, mbarak iri na-ge Nagawan Indo imin kundurak pem wam kan nasu iri na me mbo bil nggurag-o.

¹⁹ Iri rak purug-e, lomba iri na aring iri na nde saguruk, tepan ombo-nen-e oroti kumbungen woraidnak ereya na misik, oroti leplep wora misik mul sum arem-nen waga wam aring sa iri na min lomboksa Nasit nap iri na inggem purag-o.

²⁰ Iri rak purug-e, tepan ombo iri na-nen-e nunggwi mende ereba na-ge Nagawan Indo imbiri bem nuk karuk, Nagawan Indo wok turag-o. Iri yidnak iri-ge tepan ombo nak-nen norag-o. Nde, ereb-e lomba kusi iri na abaripwak min awak min-e iri mende kwarogolat-nen kwarugwi ndak ndag-et tepan ombo wanurag-o. Iri rak purug-e, at Nasit nap iri na-ge anggut engen amburu-ge norag-o.

²¹ Nasit nap-nen nde: ’Mbal Pem Nagawan amanggim-e yu nggal-et pimin-o luk, owak mbatluk nen pugwi ndak ndag-e lak. Are, terak menna ombol nggwe-t pimin-o’ luk urul pidnak ala-ge, mondok iri na ndak ndag-et kwarurag-o” yij-o.

Tepan ombo-nen ap imbiringgat tak unpugwi wene 6:22-27

^22-23 Musa-nen Arun ilirak inmin yak unduwakluk, Nagawan Indo-nen Musa bem wene wosa posolar-e, it-nen Isarael nap imbiringgat tak onpogolar-e, yu nggal yurag-o:

²⁴ Nagawan Indo-nen imbiringgat tak konposolat, ndegel konposolat wolmag-o.

²⁵ Nagawan Indo-nen-e kenabuwa kwarat karuk, kit kinmin-e indi konak wolmag-o.

²⁶ Nagawan Indo-nen kenabuwa karuk, yamuksa wolmomtak wok kunduwag-o.

²⁷ Nagawan Indo-nen yosolar-e: ”Isarael nap imbiringgat tak onposolat, an nunu it enpem posola-ge, an-nen-e imbiringgat tak inpimin-o” luk yij-o.