WONARIDNAK WENE 24 - Nanduk Ngget Tul Pidnak Wene

¹ Mbileyam-nen lombot pidnggal-e, Mbal Pem Nagawan indi-n perasolar-e: ”Mbileyam iri-ge Isarael nab-et inmbiringgat tak unpurak” eberasu iri na karug-e, Mbileyam na-ge Nagawan Indo-nen tu mirik uburak pem nin me nin me mburusu iri na-ge keya bij-o. Keya burug-e, erengen-e nembaga nggwe yik kagaidnggal-e,

² Isarael nab-e nembaga ereba me enlem pid pud unuwi lije wiril lobok yigarik, eneyagaij-o. Iri yosoma, Mbal Pem Nagawan Indi Mbileyam ebem mbuwasolar-e,

³ wene yu urul pij-o: ”Yu-ge abok-nen kwat momtak yik kaso nap Mbeyot ambara Mbileyam-nen yidnak wene-o.

⁴ Mbal Pem Nagawan-nen yidnak wene eyanggo-nen kolosolat, Mondok Amawi Worak Mbal Pem Nagawan-nen nam tak pidnak kasolat, erengen penggerak-nen tud yosolat yusu iri na-n yidnak wene-o.

⁵ Yakup wa-e. Kuwi lije ereba-ge mondok konag-o. Isarael wa-e. Kat woraso sa-ge mondok konag-o.

⁶ Kat kuwi lije o lid yemarak nggal, yabu yi eyak pem nggal, Nagawan Indo-nen yagidnak e gagaru nggal, yi eyak pem tanggal yidnak e aras nggal woralar-e,

⁷ talme amburu kwarat wanogolat, it-nen uwi yakolar-e, yi kwarat worak sa yagili-o. It-nen idnak nagawan-e at kwara tena uburuk, woralar-e, Nagawan Agak-nen at-nen tenagidnak wi tena woraso nggal-e lag-o. Are, terak minik irit tena wolma-o. At-nen tenagidnak wi-ge kek tak irit puwa-o.

⁸ Mbal Pem Nagawan it wok unpuruk Mesira-nen wasu iri-ge, sapi erengen ke amawi iri nggal it enmanggim wim mbarusu-o. Ap enlem oboksa-nen it inmin wim mbaruwa iri-ge, oboksa urum arem tak onposolar-e, onowag-e mondok ndamera keya bosolat, it enmare-ge kala keya buwa-o.

⁹ It Isarael iri-ge singa kusi min kowak min nggal pak tak mbinggirik anggul ndimirik worasu-o. Ta nggal-nen kwiye lag-et sil kagub-o? Isarael kat imbiringgat tak kibili nab-e, kat-nen imbiringgat tak unpugun-o. Nde, Isarael kat imbiri lamut tak kibili nab-e kat-nen imbiri lamut tak unpugun-o” luk yij-o.

¹⁰ Iri yosola, Mbalak-nen isilepma luk, inggi ndumbuk ambik inggi lel kasolat-nen Mbileyam yak tosolar-e: ”An-e kat wene mbo kibigi-ge, an nuwim nap ereba inmbiri lamut tak unpurak pem wene mbo kibigi na-t nde, kar-e kenan pem-et inmbiringgat tak inpigen-o.

¹¹ Yawo kar-e mondok kama mbiri-o. Onggo wok kururak yigi-t nde, Nagawan Indo nen onggo iri-ge kat wanurag-e lag-o yosola me, mbiri-o” luk yak tij-o.

¹² Yosoloma, Mbileyam-nen onggo yosolar-e: ”An-e ap kat-nen an neram wirik inpigen ereba yak ondosolar-e:

¹³ ”Kat kama woraso emas min perak min oboksa wok nurugun-et nde, an-e Nagawan Indo-nen yak niridnak kwid turuk, an nindi-n pidnak mondok kwarimin-a? An-e Nagawan Indo-nen nebem pidnak nak kwarimin-o’ yak indigi nar-o” yak tij-o.

Worok tak posolat Mbileyam-nen abok-nen kwat momtak urul yidnak wene 24:14-25

¹⁴ Mbileyam-nen Mbalak yak tosolar-e: ”Yawo-ge an-e nelem nap endam mburusu-o. Alat nde, an mbirigit lak ma-net Isarael nap-nen kat kelem nap kwat unpuwa wene mbi yak kereyeg-o” yosoluk,

¹⁵ Mbileyam-nen-e wene yu urul pij-o: ”Yu-ge yik kaso nap Peyot ambara Mbileyam-nen yidnak wene-o.

¹⁶ Mbal Pem Nagawan-nen yidnak wene kolosolat, Kek tak Woraso iri na aru nap, erengen-e penggerak-nen tud yosolat Mondok Amawi Worak Mbal Pem Nagawan-nen nam tak poso mende kasolat kwaroso iri na-nen yidnak wene-o.

¹⁷ An-e ar-e kagi-t nde, yanem-er-e lag-o. Yik kagi-t nde, erepma-nen yik kagi-o. Isarael nap ennggendumu-nen nagawan wonaru abinal worak nggul mbi nam ma-o. Nam yosolar-o, Moap nap yok nggok ndamera keya onposolat, ap Set-nen wigarak yigisa keya onposolat,

¹⁸ Erom nggweyak iri-ge at Isarael-nen kore yosolat, nde, Isarael nab-et mondok enmawi kondogolat wolma-o.

¹⁹ Yakup ebem-nen mondok nagawan misik nam ma-o. Iri yosolar-e, uwim nap erep wolma iri na-ge mondok lak tak unpuwa-o” yij-o.

²⁰ Iri luk, yik kagwi mende iri na bem-nen yik kagaidnggal-e, Amalek nap irit yik eneyagaij-o. Eneyarug-e, abok-nen kwat ma wene yu urul pij-o: ”Yi nap ndi nap oboksa ennggendumu-nen-e mondok amawi worag-e Amalek nap nag-o. Alat nde, it Amalek nap iri-ge abog-e abu abu mondok lak ma-o” luk yij-o.

²¹ Yik kagwi mende iri na bem-net yik kagaidnggal-e, Kain-nen wigarak irit eneyarug-e, wene yu urul pij-o: ”Ndemeret kit worali sa-ge kerep nggok pem wiridnak o nggal mondok tugup lag-o.

²² Alat nde, kit Keni nab-e Asiut nap-nen wim kugun pem wok kunpuruk mborogolat, mondok lak tak kunpuwa-o” yij-o.

²³ Iri luk Mbileyam-nen wene yu min-et urul pij-o: ”Mbal Pem Nagawan-nen iri kwaruwa tarem nde ta-nen nde uruk wolma nab-e mondok enabuwa-o.

²⁴ Alat nde, Sipurus-nen wim koma ereba lobok yosolar-e, Asiut min Ebet min yemndak unpuruk wolma-t nde, abog-e wim koma iri na-ge mondok lak tak puwa-o” yij-o.

²⁵ Iri yosoluk yarig-e, Mbileyam na-ge lid lud tak puruk, ama mborosola-ge, Mbalak na mbirij-er-o.