WONARIDNAK WENE 23 - Nanduk Ngget Tul Pidnak Wene

¹ Mbileyam-nen Mbalak yak tosolar-e: ”Kar-e yu me-t wam wosa kan peyek-nen ondoro tuju an namanggim konurag-o. Konurug-e, sapi kusi tuju min lomba kusi tuju min mondok an namanggim waruk lobok yurag-o” luk yak tij-o.

² Yosoloma-ge, Mbalak na-ge Mbileyam-nen yak tid iri na ndak ndag-et kwarij-o. Nde, wam wosa kan purak ondoro konid ereba na bem wosa pogolar-e, ondoro misik pem sapi kusi misik, lomba kusi misik, iri kwasa mberen lombok ondoro ndak wosa kan pil lobok yiga-o.

³ Iri luk, Mbileyam-nen Mbalak yak tosolar-e: ”An-e Nagawan Indo-ge an nimin lambuk ma, lak? luk kil mbirimin-o. Kar-e kat-nen idnak wam wosa kan pigen eralu yeba-t wolmin-o. Nde, Nagawan Indo-nen yak nuruwa wene-ge yak kirimin-o” yak turuk, Mbileyam na arig-et nak ndobo misik pem mbirij-o.

⁴ Mberarikmu, Mbal Pem Nagawan-e Mbileyam eram lobok yosola, Mbileyam-nen Mbal Pem Nagawan yak tosolar-e: ”An-e wam wosa kan purak ondoro tuju konuruk, ondoro irit wosa wam-e sapi kusi misik, lomba kusi misik ondoro irit wosa mberen lombok kan pigi-o” luk yak tij-o.

⁵ Nde, Nagawan Indo-nen-e Mbileyam-nen yurak wene yak turug-e, Nagawan Indo-nen Mbalak amanggim wene wosa Mbileyam ebem pid ereba na yak tuwakluk Mbileyam na-ge Mbalak eram wirik pij-o.

⁶ Iri yamu, Mbileyam na tuguruk mbiridnggal-e, Mbalak na-ge at-nen idnak wam wosa kan pid ereba na eralu-t Moap nap enne kulugwi nap ereba na oboksa inmin mendag-et worasoma, mbirij-o.

⁷ Iri luk Mbileyam-nen abok-nen kwat momtak wene misik yosolar-e: ”O ndobo worak mo luwaso (timur) ambigit o Aram-nen Moap nagawan Mbalak-nen wene mbo nobosolat-nen yosolar-e: ’Yongga norosolar-e, wene yosolat, Isarael nap inmbiri lamut tak onposolat yonok-nen lobok yi-o’ yij-o.

⁸ Mbal Pem Nagawan-nen-e imbiri lamut tak inpigit lak yosola-t nde, an-nen nak imbiri lamut tak unpurag-e ndag-a? Nagawan Indo-nen-e angin worak enpem pigit lak yosola-t nde, an nak-nen enpem wene mbarurag e ndag-a?

⁹ Ndobo ereba anggul pem-nen Isarael nab-e yik iniyil mbirigi-o. Ndobo amun ereba bem-nen eneyagi-o. It iri-ge ap enlem nin nap inmin nat karug-e lak. It nag-et lenak eneyagi-o.

¹⁰ Yakup-nen wigarag-e mondok o liri nggal wonarurak pug-o. Isarael nap enpe-ge mondok wene yurag-e meya-o. An-e ap mot mot nggal-et mot mot woraruk wat yeg-o. An nuruk woralar-e, it iri worali nggal-et worayeg-o” luk yij-o.

¹¹ Yosoloma, Mbalak-nen Mbileyam yak tosolar-e: ”Kar-e an no kwat nubusu-o? An-e kat wok kuburuk lobok yigi iri-ge, an nuwim nap inmbiri lamut tak unpurak kibil lobok yigi na-t nde, kar-e inmbiringgat tak nde unpusu-o” yak tij-o.

¹² Yosoloma, Mbileyam-nen erep nggarosolar-e: ”An-e Nagawan Indo-nen yurak yak niridnak wene nak yimin-o” luk yak tij-o.

Mberen pem tak posolat, Mbileyam-nen abok-nen kwat momtak urul yidnak wene 23:13-26

¹³ Yosoloma, Mbalak-nen Mbileyam yak tosolar-e: ”Nin me nenmberek mburuwog-o. Mburulndik, iri me-nen Isarael nab-e erep nak eneyarug-e, inmbiri lamut tak onponog-o” luk yak tij-o.

¹⁴ Yak turug-e, Mbalak-nen Mbileyam iri na imin luk Piska ndobo bem Sopim karu me imin mbirij-o. Mberarik, iri me-nen wam wosa kan purak ondoro tuju konuruk, ondoro ndak wosa sapi kusi misik lomba kusi misik ondoro ndak wosa mberen lombok kan pij-o.

¹⁵ Mbileyam-nen Mbalak yak tosolar-e: ”Kar-e kat-nen idnak wam wosa kan pigen ereba eralu wolmin-o. Nde, an-e endeba Nagawan Indo imin lambuk yurak pem mburusu-o” luk yak tij-o.

¹⁶ Yak turuk mberarik, Nagawan Indo-ge Mbileyam imin lambuk luk, Nagawan Indo-nen-e Mbileyam-nen yurak wene yak tij-o. Yak turug-e, Nagawan Indo-nen yidnak wene ereba na Mbalak yak tuwakluk Mbileyam na-ge Mbalak eram ibil lobok yij-o.

¹⁷ Nde, Mbileyam na lobok yidnggal-e, Mbalak na-ge Moap nap ap yok nggok ereba na inmin wam wosa kan pid ereba na eralu-t mendak worasoma, lobok yij-o. Lobok yosola-ge, Mbalak-nen-e: ”Nagawan Indo-nen-e no yij-o?” luk kin wanij-o.

¹⁸ Yosoloma, Mbileyam-nen-e abok-nen kwat momtak wene yu yosolar-e: ”Sipot ambara Mbalak wa-e. Lobok yugundik, an-nen yimin wene-ge kwara kuli-o.

¹⁹ Mbal Pem Nagawan iri-ge ki nap nggal enesiget yoso bug-o. ’O! Niri nera-o’ na yoso buk. Mbal Pem Nagawan-nen nde ’Irit kwarimin-o’ yosolug-e, mondok iri na-t kwaroso-o. Nde, at-nen nde wene yosola-ge, mondok yidnak iri nat kwat yoso-o.

²⁰ Mbal Pem Nagawan-nen inmbiringgat tak unpurak nebem pidnak me, Mbal Pem Nagawan-nen-e Isarael nap inmbiringgat tak onposola-t nde, an-nen nak inmbiringgat tak inpigit lak yurag-e meya-o.

²¹ Yakup ebem-e meya mbi kagit lag-o. Isarael ebem-e anggun worak mbi ebem kasu bug-o. Nagawan Indo Enmbal Pem Nagawan-e it inmin worasu-o. It-nen enne nggok pem yogolar-e: ’Ar-e nit nennggendumu Nagawan-net yusu-o’ luk yili-o.

²² It iri-ge Mbal Pem Nagawan-net Mesira wi-nen wok unpuruk lobok yusu-o. Mbal Pem Nagawan iri-ge sapi erengen kege anggul ambo amawi worak iri na nggal it enmanggim wim nggusu-o.

²³ Kugi amawi Yakup ebem ma-t nde, ebem ma bug-o. Kugi tu mbarugwi amawi worag-e Isarael abuwog-e pak tuwa bug-o. Ap-nen Isarael onpok yogolar-e: ’Mbal Pem Nagawan-nen kwiye worak it ennggendumu kwarusu iri ker-o’ yuwa-o.

²⁴ Isarael iri-ge singa ija nggal men ma-o. Singa kusi nggal nggwelsa men ma-o. At iri-ge emena leraben ninggit lak ma min at nen wiridnak eyabi ninggit lak ma min-e mondok nene-ge yuwa bug-o” luk yij-o.

²⁵ Yosoloma, Mbalak-nen Mbileyam yak tosolar-e: ”Kar-e Isarael nap inmbiri lamut tak unpurak larok yigen iri nak wolmag-o. Alat nde inmbiringgat tag-e mondok unpurak pug-o” luk yij-o.

²⁶ Yosoloma-ge, Mbileyam-nen onggo yosolar-e: ”Nab-o. An-e Nagawan Indo-nen yak nuruwa nak kwarimin-o yak kirigi nar-o” yak tij-o.

Kenan pem tak posolat, Mbileyam-nen abok-nen kwat momtak urul yidnak wene 23:27–24:13

²⁷ Mbalak-nen yosolar-e: ”Iri ala-ge, yawo-ge nin nggwe mburuwog-o. Erep-nen-e an yongga norosolat Isarael nap inmbiri lamut tak onponokluk Nagawan Indo-ge keya kubuwa na kwat ma nde ma-o” yij-o.

²⁸ Yak turug-e, Mbileyam na-ge nembaga nggwe ndobo Peyot anggul pem waruk mbirij-o.

²⁹ Nde, Mbileyam-nen Mbalak yak tosolar-e: ”Wam wosa kan purak ondoro tuju yu me konuruk, sapi kusi tuju, lomba kusi tuju wok niril lobok yi-o” yak tij-o.

³⁰ Yosoloma-ge, Mbalak na-ge Mbileyam-nen yak tid iri na ndak ndag-et kwarij-o. Iri kwarosolar-e, ondoro ndak wosa ondoro misik pem-e mberen lombok sapi kusi misik lomba kusi misik wosa kan pij-o.