WONARIDNAK WENE 21 - Nanduk Ngget Tul Pidnak Wene

Kanaan nap urugwe nggwe rak inpidnak wene 21:1-3

¹ Nde, o Arat iri-ge o Kanaan-nen-e abare ena nggwe (selatan) o Arat nagawan iri-nen kulidnggal, ”Isarael nab-e tu Atarim nggwe lobok yili-o” yogola kulurug-e, mbirigarik, Isarael nap inmin wim mbarogoluk, Isarael nap ennggendumu ap ereb-e wim kugun pem wok inpiga-o.

² Nde, Isarael nap-nen Nagawan Indo imin owak mbarogolat-nen watsa yogolar-e: ”Kat-nen nde ap enlem yu nit nininggem kegera pugunmu-ge, mondok unuwi siri min lak yaga keya unpul-o” yiga-o.

³ Yogolikma-ge, Nagawan Indo-nen kulurug-e, yongga ondosolar-e, Isarael nap-nen-e Kanaan nap iri na-ge mondok pinik ondogolat, unuwi siri min lak tak unpuruk, o iri na unu-ge Koroma yariga-o.

Posid tembaga bem waro ndak wiridnak wene 21:4-9

⁴ Nde, Isarael nap na-ge ndobo Ot keya buruk Erom nggweyak wonggot kagolar-e, Akaba Koma ambigit nggwe mbiriga-o. Mborogolar-e, tundumu it-nen mamak purak mondok meya yogolar-e,

⁵ it-nen Mbal Pem Nagawan min Musa min insilepma enpem pogolat-nen yogolar-e: ”Noluk-nen Mesira-nen ninmin lobok yigeb-o? Yu me-ge yi min nunggwi mende min mondok lak yu-ge nir-e nembaga yu me-nen nundurak ninmin lobok yidnak, lak? Nir-e nunggwi mende undu lak yu nak nok tenak yu-ge mondok ninsili-o!” yiga-o.

⁶ Iri yogola, Nagawan Indo-nen waro mondok eyak worak Isarael nap ennggendumu kwarat pamu, waro ereba na-nen yilik onposola, ap kwarat wat yiga-o.

⁷ Iri ala, Isarael nap Musa eram lobok yogolat-nen yak togolar-e: ”Nir-e kat min Nagawan Indo min met kinpige iri-ge, ndemeret meya kwarige-o. Waro yeba nit nenndam-nen lak tak puwak-nen kat-nen Nagawan Indo emengen mbari-o” yogolikma, Musa-nen ap ereba enmanggim Nagawan Indo emengen mbarosoloma,

⁸ Nagawan Indo-nen Musa yak tosolar-e: ”Waro misik posid tembaga bem ndak worak puruk, e sindik puruk, e iri bem perena keya bi-o. Iri yugunmu ta-nen nde waro-nen yilik posola erengen nde waro iri yik kasola-ge, war-e ma bug-o” luk yak tosoloma-ge,

⁹ Musa-nen waro misik posid tembaga bem ndak wosa, e sindik puruk, e iri na bem perena keya bamu, ap ondomoktak-nen waro-nen yilik onposola, enlengen waro tembaga bem ndak wosa pidnak iri na yik kagola-ge, ki yiga-o. 21:10-35 Ayat ya arem-e Isarael nap na-ge Kanaan mborogolat waring kagolar-e, ena nggwe ambigit (selatan) min luwaso ambigit (timur) min wok yiga wene mbarak worasu-o.