WONARIDNAK WENE 20 - Nanduk Ngget Tul Pidnak Wene

O Kandes-nen kwaridnak wene 20:1-13

¹ Waneya nandug-et yarid iri bem-e Isarael nab-e Sin karu me wok yigarik, Kandes iri me woraiga-o. Woragolar-e, Miriam na-ge iri me wat yamu, iri me yapma piga-o.

² Misik tarem-e it o wiril lobok yiga sa yi lak ala karuk, Isarael nab-e lobok yigarik, Musa min Arun min endam lop lop woragolat-nen

³ ujwa mbarogolat-nen yogolar-e: ”Nir-e nennggamirak Nagawan Indo imbiri bem-et wat yiga nggal nit na mondok wat leb-a!

⁴ Noluk-nen kir-e nembaga yu me wok nunpuruk lobok yigeb-o? Nir-e nonowam min yu me pendega lak makluk ninmin lobok yigeb-a?

⁵ Noluk-nen kir-e Mesira-nen yi mende ndi mende uwi yagurak meya, anggun panggun wolmomtak sa yu me ninmin lobok yigeb-o? Yu me-ge nggandum mbato min e ara elem min anggut engen min ndelima engen min na lak. Mondok yi norak min-et lak yu-ge ngge-o?” luk yiga-o.

⁶ Yogola, Musa min Arun min na-ge mbirigarik, Nagawan Indo uwi lije tumende bem men yil mbirigarik, entare nggwe tud yogola-ge, Nagawan Indo abinal-e it mberen yu na inmbiri bem nam yij-o.

⁷ Nagawan Indo-nen Musa yak tosolar-e:

⁸ ”Kar-e wangun urul pidnak wene labu mbarak eralu worasu iri wanuruk, kat min Arun min-nen-e Isarael nap oboksa ndok worak enper-o. Iri rak unpuruk, it oboksa enlengen pem-et kerep nggok iri arem-nen yi pilana womakluk, kar-e mondok kerep nggok iri wene yak ti-o. Iri kwarosolar-e, kerep nggok iri arem-nen yi pilana pil wagunmu, ap ereba min onowam min oboksa yi nujwa-o” luk yak tij-o.

⁹ Yosoloma, Musa-ge Nagawan Indo-nen kwarurak yak tid iri na ndak ndag-et wangun iri na wil mbirij-o.

¹⁰ Iri luk, Musa min Arun min-nen Isarael nap oboksa kerep nggok iri na eralu ndok worak unpuruk, Musa-nen yak ondosolar-e: ”Kit wene tarugwi yu-ge wa-e. Kenmanggim yi kerep nggok yu arem-nen pil wumul, lak?” yak indij-o.

¹¹ Yak ondosoluk, Musa-nen wangun iri na bem kerep nggok iri na mberen pem lel kagaij-o. Lel kagaidnggal, yige amawi worak irit pilana wasolat, ap min wam min oboksa-nen ndak norak irit wagij-o.

¹² Alat nde, Nagawan Indo-nen Musa min Arun min met onposolat-nen yosolar-e: ”Kir-e an namawi na-ge Isarael nap inmbiri bem nam tak pigit lak yigenma me, kit mberen-e it lit unpuruk, o urul yak indigi iri na me nggugup pug-o” luk yak indij-o.

¹³ Iri kwariga iri-ge yi unu-ge Meriba-o. Nde, iri me-nen Isarael nap-nen Nagawan Indo min eyak worogola, Nagawan Indo-nen at-nen marak woraso iri na-ge it inmbiri bem nam tak pamu-o.

O Erom nagawan-nen: ”Isarael nab-e yu nggwe lobok yurak puk” yidnak wene 20:14-21

¹⁴ Nde, misik tarem-e Musa-nen Isarael nap ereb-e o Erom nagawan iri na eram wirik inpij-o. Wirik enpamu, Erom nagawan iri na yak togolar-e: ”Nir-e Isarael nap kat kusuwon-net yili-o. Nab-o. Nit anggun panggun nenpem mbij-e kar-e karu-t nde ma-o.

¹⁵ Nit nonmborak nandug-e Mesira mbirigarik, yi olengen ndi olengen kwarat woragola-ge, nit na irit, it na irit, Mesira nap-nen anggun panggun tak ninpiga-o.

¹⁶ Iri yogola, nit-nen: ’Yongga nindi-o’ luk Nagawan Indo wene mbo obogola-ge, at-nen nene kulurug-e, at-nen aid nap misik pil lobok yamu, aid nap iri na-nen lit nunpuruk Mesira-nen ninmin lobok yarik, yawo-ge kat kuwi nggweyak maksa o Kandes worali-o.

¹⁷ Iri ala karuk, kat kuwi nggweyak nggwe-t mburuwok-nen kebem nggi yak kitli-o. Nit min nonowam min-nen nde kit keneyapmu ala na, kenengen anggut yapmu ala na ereba nggwe kasa mbilaluk mburul pug-o. Kit kinid nunggwi sa na nul pug-er-o. Tula nggok nggwe nak mburul mburul kat kuwi nggweyak nenmberam tak pul-o” luk yak tiga-t nde,

¹⁸ Erom nagawan iri na-nen yosolar-e: ”Kit nit nunuwi nggweyak nggwe mbururag-e mondok lag-o. Kit nde mondok wat tag-et puruk lobok yogola-ge, mondok kundul-o” yiga-o.

¹⁹ Yogola, Isarael nap-nen yogolar-e: ”Nir-e tula nggwe nak nok nok mburul-o. Nit-nen ala na, nonowam-nen ala na, kinid nulndig-e onggo-t pul-o. Nir-e we wit wot nak mburul-o” luk yiga-o.

²⁰ Alat nde, Erom nap nen yogolar-e: ”Mondok lag-o” lug-e, ap kere pugunuruk lobok yogolar-e, Isarael nap unduwokluk yogola karuk,

²¹ Isarael nab-e Erom nap unuwi nggweyak nggwe mbururak ob-o yak indigit lak ala karuk, nden karuk tu nin nggwe mbiriga-o.

Arun wat yidnak wene 20:22-29

²² Nde, Isarael nap oboksa-ge o Kandes-nen mbirigarik, Ot ndobo bem wok yiga-o.

²³ O Erom nggweyak kuri maksa iri me-nen Nagawan Indo-nen Musa min Arun min yak ondosolar-e:

²⁴ ”Yi Meriba iri me-nen kir-e an nene taridnak me, Arun iri-ge wat ma-o. An-nen Isarael nap wok kindimin-o luk urul yak indigi o iri na me-ge Arun iri-ge mondok ngguwa bug-o.

²⁵ Nde, Arun min ambara Eleasat min e Ot ndobo bem wok unpuruk li-o.

²⁶ Larug-e, Arun usum yonggora Eleasat yirik purag-o. Iri rak purug-e, Arun iri-ge iri me wat ma-o” luk yak tij-o.

²⁷ Yak tosoloma-ge, Musa-nen-e Nagawan Indo-nen yak tid iri na-t kwarosolar-e, Musa min Arun ambara Eleasat enmberek min-e Isarael nap oboksa enlengen pem-et Ot ndobo bem laiga-o.

²⁸ Lagola-ge, Musa-nen-e Arun usum na-ge yonggora Eleasat yirik pij-o. Yirik purug-e, Arun na-ge Ot ndobo bem irit wat yij-o. Wat yosoloma-ge, Musa min Eleasat min-e tuguruk mbiga-o.

²⁹ Isarael nap oboksa-nen Arun wat yidnak wene kulurug-e, tabun puruk yip togolat tiga pulu (30) bem woraiga-o.