WONARIDNAK WENE 14 - Nanduk Ngget Tul Pidnak Wene

Isarael nap-nen Musa ebem yane wiridnak wene 14:1-10

¹ Iri yogola karug-e, Isarael nab-e yip nak sa nggwarenak nak nene yiga-o.

² Iri yogolat-nen Musa min Arun min enpem ujwa mbarogolat-nen yogolar-e: ”Mesira-nen ala na, nembaga yeba-nen ala na wat momtak iri-ge ndak nak-nen yusu-o. Iri ala, nir-e mondok wat mog-o.

³ Nde, nir-e wim pem nunduruk, nonkwela-ge kugun wok unpuruk mburuwa yu-ge no manggim-nen Nagawan Indo-ge wok nunpuruk o urul pidnak iri na me ninmin mburusu-o? Tuguruk nde Mesira mburuwog-o!” luk yiga-o.

⁴ It nak yak kerak mbogolar-e: ”Nir-e tuguruk lit nunpuruk Mesira mbururak ap misik lunuwog-o” luk yiga-o.

⁵ Yogola, Musa min Arun min-e Isarael nap oboksa enlengen pem entare nggwe tud yiga-o.

⁶ Iri kwarogola-ge, it ennggendumu enlengen waruk o yen mbiridnak nap Nun ambara Yosua min Yepune ambara Kalep min inndi puru pera yogolar-e, it unsum ndela bela keya bogolat-nen

⁷ Isarael nap oboksa yak ondogolar-e: ”O nit mbirigerik kil nige iri-ge mondok konak lombog-o. Mondok wene yurag-e meya-o.

⁸ Nde, Nagawan Indo-nen nde indingen tak nonposolar-e, wok nunpuruk mburuwarik, o nggweyak amburu worak, yi mende ndi mende kwarat iri-ge nit wok nunduwa-o.

⁹ Kir-e Nagawan Indo imin wene eyak worogolat, o iri me woragwi nap enaye yili-ge meyog-o. Nit-nen it urugwe nggwe rak unpurag-e, te-nen yusu-o. Nde, it inmiri yoso kugwi-ge mondok keya enpamu-o. Nde, nir-e Nagawan Indo-ge ninmin worasu-o. Iri ala, kir-e kwiye yili-ge mondok meyog-o” luk yak indiga-o.

¹⁰ Iri yogola-ge, Isarael nap oboksa-nen it mberen ya na-ge mondok kerep pem abu enmera mbaruwokluk yiga-o. Iri yukmu, mimo it-nen yik kaiganggal-e, Nagawan Indo abinal-e Nagawan Indo uwi lije iri na bem nam yosola kaiga-o.

Musa-nen lsarael nap enmanggim tepan yid wene 14:11-25

¹¹ Nagawan Indo-nen Musa yak tosolar-e: ”It yu-ge pempa an nimin eyak wat tenag-et wolma? It enlem yu-ge an-nen-e kwiye worak mende it ennggendumu kwarat kwarusu-t nde, noluk-nen an nebem inndi angin tubu yili bug-o?

¹² Iri ala, an-nen perek perek mboroso kugi bem lak tak inpimin-o. Nde, it yu enmawi-ge mariger-et nde, kar-e an-nen up enlem mondok nggok enmawi worak nap misik onmbo rak kibimin-o” luk yak tij-o.

¹³ Yosoloma, Musa-nen Nagawan Indo yak tosolar-e: ”Nagawan Indo wa-e. Kat-nen-e kamawi bem Mesira-nen ninmin lobok yigen-et nde, kat-nen lak tak unpugunmu-ge, Mesira nap-nen kulurug-e,

¹⁴ it-nen o yu me nap yak ondogolar-e, Nagawan Indo kar-e nit ninmin woralat, kat nit lit neneyaruk lobok yosolat-nen ninmbiri bem nam yosolar-e, lengge-ge nggan nggan nggal, nde, kubu-ge kanduk nggal kwasa lobok yusu wene iri yak indikma, kuliga-o.

¹⁵ Nde, kat-nen nde kat kelem nap yu oboksa undugunmu-ge, kat kobok mborosola, kulili nap-nen kat kimin yogolar-e:

¹⁶ ’At elem nab-e ap lak ma ereba-nen lit unpuruk urul yak indidnak sa inmin nggurak amawi lak ala karuk, indij-o’ luk yak kuruwa-o.

¹⁷ Iri bem-e, Nagawan Indo wa-e, nab-o. Kat kamawi-ge nit mirik nonposolat, kat-nen ’Kwarimin-o’ luk urul pigen-e mondok kwari-o. Kat-nen yosolar-e:

¹⁸ ’An-e ndag-et nisilepma yoso bug-o. An-e pempa mondok kenabuwa kwarat kasolat, an nimin eyak wurugwi nap min meya kwarugwi min-nen meya yidnag-e namberam tak pimin-et nde, ineidtak-nen meya kwarugwi bem onggo posolar-e, it inlirak-nen ndaguwa kuri-nen ap tap mberen pem min ap tap kenan enpem min-et onmborak-nen kwaruwa onggo-ge pimin-o’ yigen iri nar-o.

¹⁹ Nde, Nagawan Indo wa-e. Yawo-ge kar-e mondok enabuwa kundugu kasolat, kat-nen urul pidnak iri na ndak ndag-et kwarosolat yoso me, kat-nen it Mesira keya bogola kuri-nen it meya yidnak kamberam tak pigen iri nggal-et it meya kwatli-ge kamberam tak pi-o” luk emengen mbarij-o.

²⁰ Yak tosoloma-ge, Nagawan Indo-nen wene erep nggarosolar-e: ”Iri ala-ge, kat-nen yigen irit kwarosolat, it meya yidnag-e namberam tak pimin-o.

²¹ Alat nde, an nondomok nunu min nuruk nak worasolat o yu tena worasu yu nggal-o. Mondok yak kereyeg-o.

²² It ap yu-ge nabinal kagolat, Mesira-nen na irit ap lak ma yeba-nen na an-nen kwiye worak mende kwarat ennggendumu kwarosola-ge, kagotlat-net nde, an-nen yidnak yidnak kwarigit lak, an nak nindi ngal tenak woragola me, an-nen onmborak urul yak indigi o iri na me-ge mondok ngguwa bug-o.

²³ Iri ala karuk, ir-e o iri me-ge mondok ngguwa bug-o. It ennggendumu an nimin eyak wurugwi nab-e ap misiger-o luk tet o iri na me-ge unuwok puwa bug-o.

^24-25 Alat nde, ndegel noboso nap Kalep perak nde pempa an-nen yidnak yidnak nak yoso me, at nak perak wok uburuk o at ujok pid sa iri na me imin nggwimin-o. Nde, o nggweyak yamuk tak iri me-ge yawo-ge Amalek nap min Kanaan nap min iri me-ge worali-o. Alat nde, o iri me-ge an ndegel noboso nap Kalep-nen wigarak-nen ombo ma-o. Nde, kub-e nden karuk Yi Koma Akaba ambigit nembaga nggwe mberer-o” luk yij-o.

Isarael nap-nen: ”Ju nggal-o, iri nggal-o” luk Nagawan Indo ebem yane worogola, angin worak enpem pidnak wene 14:26-38

²⁶ Nagawan Indo nen Musa min Arun min yak ondosolar-e:

²⁷ ”It meya yugwi nap ereba-nen an nebem ’Yu-o, iri-o’ luk yane wat tenak worali iri-ge, mepme tarem-nen keya buwa-o? It-nen yane witli ereba-ge an-e abu kulusu-o.

²⁸ Kit-nen-e wene onggo-ge yu nggal yurag-o. Nagawan Indo-nen yak kondosolar-e: ’An nuruk woraso nggal-er-o, Kit-nen an nebem nggi yili mende-ge mondok kwar-et kinpimin-o. Nagawan Indo an-nen yusu-o.

²⁹ Kir-e an nebem kwarat ”Yu-o, iri-o” yogolat yane witli me,

³⁰ kir-e nembaga yeba wat yugupmu, konowag-e yeba me-t nggilara mbuwa-o. Kalep min Yosua min it nak o an-nen urul yak kindigi iri na me-ge mburuwa-o. Nde, kit erep erep olengen dua pulu ombol nggwe woraidnak iri-ge nggugup pug-o.

³¹ Kit-nen yogolar-e: ”Ninlirag-e wim kugun pem wok unpuruk mburuwa-o” yigeb-et nde, it irit an-nen wok unpuruk, o kit-nen keya bili iri me-t wok unpuruk mburumu, o iri-ge it unuwi nggweyak kwat ma-t nde,

³² kir-e ap lak ma yeba-t wat yugub-o.

³³ Nde, kinlirak-nen nembaga yeba waring tenak woragolar-e, olengen empat pulu irit wolma-o. Kit-nen an-nen yidnak yidnak kwarugwi buk iri-nen ndowaga kinlirag-e anggun panggun irit kerenak worakmu, kit kennggendumu kenanggul mbilit iri na-t tigisa wat yogola-nen perak o iri na me ngguwa-o.

³⁴ Kit-nen meya kwarigep onggo-ge olengen empat pulu woragub-o. Kit-nen o yen nogolat empat pulu bem woraidnak me, misik tarem woraigep ndak ndag-e olengen misik woragub-o. Iri nggal kwasa empat pulu bem woraigep ndak ndak olengen empat pulu woragub-o. Nde, iri woragup iri-ge Nagawan Indo-nen onggo posolar-e, ”Abur-e iri kagi” luk kenaru yobokluk-nen woragub-o.

³⁵ Mondok Nagawan Indo an-nen owak mbarosolat-nen yosolar-e: ”Meya kwarugwi nap kit-nen an nebem mbud yurak pem wene mbatli iri-ge an-nen yigi iri-ge kwar-et kinpimin-o.” Mondok Nagawan Indo an-nen yusu-o’ luk yigi-o” yak indij-o.

^36-37 Nde, Musa-nen o yen wirik inpid ereba na lobok yogolar-e, o limbiniga iri na wene-ge ndemeret mot mot waruk lobok yigit lak yiga iri na-nen ndowaga Isarael nab-e ”Yu nggal, iri nggal” yogolat, Nagawan Indo ebem yane wiridnak me, Nagawan Indo-nen onggo posolar-e, kugi lengga enpem pamu wat yiga-o.

³⁸ Ap duabelas o limbinil mbiriga ereya na ennggendumu-nen-e Yosua min Kalep min nak wat yigit lag-o.

O iri na me nandug-et inmin wim mbarugwi tel kwiriga wene 14:39-45

³⁹ Nagawan Indo-nen Isarael nap kwat unpurak wene ereba na Musa-nen yak ondosola-ge, Isarael nab-e inndi kalok luk yip yuk nguk tenak woraiga-o.

⁴⁰ Nde, nene luk kub-e ndobo bem ludtak lid lud tak pogolat-nen yogolar-e: ”Ndemeret nir-e meya kwarige-t nde, yawo-ge Nagawan Indo-nen mirik ninpid sa iri na me mbururak pem lid lud tak pili-o” luk yiga-o.

⁴¹ Alat nde, Musa-nen yosolar-e: ”Noluk-nen yawo kir-e Nagawan Indo ene tarurak yili-o? Kit mbururak yili iri-ge ombol nggwe yugub-e mondok lag-o.

⁴² Iri ala, mondok larok yer-o. Nagawan Indo-ge kinmin mburuwa buk me, kunuwim nap-nen urugwe nggwe rak kunpuwa-o.

⁴³ Kit nde Amalek nap min Kanaan nap inmin wim nggogolar-e, mondok urugwe nggwe rak kunpuwa-o. Kir-e Nagawan Indo-nen yidnak yidnak kwarugwi buk me, ar-e mondok kinmin mburuwa bug-o” luk yak indij-o.

⁴⁴ Musa min urul pidnak wene labu mbarak iri na min-e o lije wiridnak sa ereba na me woragola-t nde, Isarael nab-e ndobo anggul pem lorak irit mondok wat tak puruk, laiga-o.

⁴⁵ Amalek nap min Kanaan nap min ereba na-nen-e Isarael nap na-ge ondogolat langgara muk yaga o Koroma inpil lobok yiga-o.