WONARIDNAK WENE 11 - Nanduk Ngget Tul Pidnak Wene

O Tabera-nen kwat inpidnak wene 11:1-3

¹ Nde, misik tarem it Isarael nap nen it wolmomtak wene bem anggun enpem mbosola-hen yogolar-e: ”Nir-e inik nggal-o, yu nggal-o” luk Nagawan Indo eram ujwa mbariga-o. Yogola, Nagawan Indo-nen at yak tiga wene ereba na kulurug-e, mondok isilepma luk kanduk enpem mberak pamu, pagosolar-e, o lije wiril lobok yiga ereba na-ge ereb-e kan-nen nuruk keya bij-o.

² Kan nasola-ge, ap ereba na-nen enne nggoksa Musa yak togolar-e: ”Ndak yongga nindi-o” luk yiga-o. Iri yogola, Musa-nen Nagawan Indo emengen mbarosola-ge, kan iri na-ge nigi yij-o.

³ Iri me-nen Nagawan Indo aganduk-nen it pak inpidnak ala karuk, iri me unu-ge Tabera yariga-o.

Musa-nen ap tuju pulu enne kulurak nap len inpidnak wene 11:4-30

⁴ Nde, Isarael nap mbitli ereba na ennggendumu-ge ereb-e erem nin nab-et mbiriga-o. It ereba na-nen ”Uno nere-o” yogola ge, Isarael nap-nen yogolar-e: ”A! Nit na uno nggal neleb-a!

⁵ Nde, nit Mesira woragolar-e, keyane min ngguru min engen kerengen min peri min bawang min bawang puti min onggo lag et nili yeba na-t nde, o, wa!

⁶ Nde, yawo-ge nir-e mana yu nak nok tenak mbot nenmawi lak yusu-o” luk ujwa mbariga-o.

⁷ Nde, mana iri-ge ebe-ge marik komosa-nen loro-net nde, yambembe lengen erare-o.

^8-9 Nde, mana na-ge talme engen min kubu nggilara o lije wiridnak sa ereba na me mbuwagamu, kuplila-ge ir-e ndok wiril niga niga ndamera yigisa tepung mabe nggal tak piga-o. Iri rak purug-e, kuwe kago worak woragil lobok yiga-o. Nde, iri woraiga ereba na undu-ge kuwe e saitun engen amburu min omok wosa woragidnak undu nggal-o.

¹⁰ Nde, it ap ereba na-ge unuwi tu mende bem lombok ndok wiril lobok yigarik, ”Yu nggal-o. Inik nggal-o” luk ujwa kujwa mbogola-ge, Musa-nen kulij-o. Iri yogola, Nagawan Indo isilepma-ge kwiye worak irit it enpem posola karuk, Musa na-ge umud-nen kwiye yosolat-nen

¹¹ Nagawan Indo yak tosolar-e: ”Noluk nen anggun panggun tak nubusu-o? Kar-e an-e kisili rak nubusu, lak? Noluk-nen ap yeba oboksa kar-e an nebem nak pigen-o?

¹² An-nen it yu-ge an narem wok unpuruk nigirik, ndet inpigi-a? Noluk nen kar-e an nebem posolar-e: ’Li yaruk unpuruk nugwi nap-nen li marik yaruk unpuruk nugwi nggal pempa yaruk unpuruk nak an-nen nanduk it onmborak urul yak indigi sa iri na me-t inmin mbiri-o’ yak nirigen-o?

¹³ Yik ki-o. Ir-e ’Uno nere-o’ luk yili yu-ge an-nen-e ap kwarat yu-ge uno-ge ngge me-nen waga mak indimin-o?

¹⁴ Yabu angin worak yu nggal-e an narik nak-nen lek kudtag-e mondok meya-o.

¹⁵ Kat-nen yu nggal kwat neberenak wolmomtak ala-ge, nabuwa kasolar-e, ndag-et nak niri-o. An-e anggun panggun kerenak wolmomtak mondok nimbir-o” yij-o.

¹⁶ Yosoloma, Nagawan Indo-nen Musa yak tosolar-e: ”Kat-nen-e Isarael nap ennggendumu-nen enne kulugwi nap enpe tuju pulu (70) ndok worak unpuruk, an neram nama inmin lobok yugundik, keralu mendak inpi-o.

¹⁷ Nde, an-e iri me mbuwamindik, wene mbarul-o. Amawi kat wok kirigi ereba na-ge ereb-e menggesa it enpem pimin-o. Nde, kat karig-et nak angin pangin iri-ge meya-o. Ap kwarat yu ndegel unpurak yabu iri-ge kat yongga korogolat ereb-e it-nen wanurag-o.

¹⁸ Yawo-ge kat-nen Isarael nap yak ondosolar-e: ”Kup amanggim kir-e mondok mesa lid lud tak puruk wolmomtag-o. Kit-nen: ”Uno no nul-o?” luk yip tigep iri-ge Nagawan Indo-ge kolarik me, yawo-ge uno wok kunduwama uno nunggub-o.

¹⁹ Nde, iri nonggolar-e, misik tarem nak, mberen pem nak, lima bem nak, sepulu bem nak, dua pulu bem nak nunggub-e lag-o.

²⁰ Alat nde nok tenak waneya misik woragolat, kenabiru nggwe werek ma-o. Iri kwarogolar-e, sok worogolat kugwi kunduwa-o. Iri kwarugup iri-ge Nagawan Indo kennggendumu worasu iri keya ibigep iri-nen ndowaga kwarugub-o. Nde, ereb-e kit-nen at eram yip togolat-nen yogolar-e: ”Noluk-nen Mesira keya buruk lobok yige-o” yili iri-nen ndowaga kenpem mbuma-o’ yak indi-o” yak tij-o.

²¹ Yosoloma, Musa-nen Nagawan Indo yak tosolar-e: ”Ap enlem an-nen lit unpuruk lobok yusu yu ge lambuksa wonarag-e enam ratus ribu (600.000) yu-t nde, kat nen an yak norosolat: ’Uno inmbitsa nonggolat waneya misik wolmomtak’ yigen yu-ge ngge-o?

²² Inmbitsa mak undurak sapi min lomba min kwarar-e ngge me worasu-o? Keyane yi koma arem worasu ereba oboksa waga mak undugun-et nde, ndag-et nujwa?” yij-o.

²³ Yosoloma, Nagawan Indo-nen erep nggarosolar-e: ”An namawi-ge marig-et kasu-a? Kerengen wolmin-o. An yak kirigi iri-ge kwat yigit lak yosola kagun, lak?” yij-o.

²⁴ Yosoloma, Musa mborosolar-e, Nagawan Indo-nen yidnak wene ereba na-ge Isarael nap yak indij-o. Yak undurug-e, Musa-nen it ennggendumu enne kulugwi nap tuju pulu (70) ndok worak unpurug-e, at-nen it yak ondosolar-e: ”Nagawan Indo uwi iri na lop lop wosa men yer-o” yosoloma, men yogola-ge,

²⁵ Nagawan Indo-ge nggan nggan arem mbuwagarik, Musa wene yak tij-o. Nagawan Indo-nen-e amawi Musa wok tid ereba na-ge ereb-e menggesa ap tuju pulu ereya na wok indij-o. Iri yamu, Nagawan Indo Indi it enpem mbuwasola, Mbal Pem Nagawan ene lomboksa yugwi nap-nen enne nggoksa yugwi nggal yogolat woraiga-t nde, pem yik tenak woragit lag-o.

²⁶ Nde, ereba kwarogolar-e, ap tuju pulu ereba na ennggendumu ap mberen, Elndat min Melndat min-e it erep inmin Nagawan Indo uwi iri na me-ge mbirigit lak, it ondomok unuwi lije ma nak woragola, Mbal Pem Nagawan Indi-ge o lije wiridnak sa it mberen iri na enpem mbuwasolar-e, it-nen na Mbal Pem Nagawan ene lomboksa yugwi nap-nen enne nggoksa yugwi nggal yiga-o.

²⁷ It mberen ereya na-ge iri kwarogola-ge, ap sujwe misik Musa eram wene waruk mberarik, Musa yak tosola-ge,

²⁸ Nun ambara Yosua iri-ge li ap pem-net Musa yongga woroso iri na-nen Musa yak tosolar-e: ”Iri kwatli iri-ge ’Mondok larok mer-o’ yak indi-o” yak tij-o.

²⁹ Yak tosola, Musa-nen yosolar-e: ”Kar-e an-nen iri yurak neberasu-t nde, an-nen-e Nagawan Indo-nen at Indi at elem nap wok ondosola, it oboksa-nen at ene lomboksa yugwi nap kwat momtak irit perasu-o” luk yak tij-o.

³⁰ Yosolug-e, Musa na-ge Isarael nap-nen enne kulugwi nap tuju pulu ereya na inmin luk unuwi lije ma mbiriga-o.

Nagawan Indo-nen towe wok indidnak wene 11:31-35

³¹ Nde, mimo Nagawan Indo-nen o wija nggok yi koma nggwe-nen puk yaga pil lobok yosolar-e, o wija iri na-nen-e towe min puk kuruk lobok yosola, towe-ge yubu nggweyak nggwe tebesa lobok yosolar-e, o lije wiril lobok yiga sa ereba na me yebetsa mborosolar-e, o aptusa misik tarem mburugwi ndak ndak irit yimiksa mbirij-o.

³² Iri yamu, it-nen tenakolar-e, aptusa lengge mberen kubu misik kenan tarem-e tenakolat woraiga-o. It enariktak-nen tenaiga angin-e seribu (1000) kilo nggal iri tenagil lobok yiga-o. Nde, tenagil lobok yiga ereba na-ge le yuwakluk unuwi mborom liring kil lobok yiga-o.

³³ Nde, towe ereba na-ge nonggolat erep na worasoma-t, Nagawan Indo isilepma enpem posolar-e, kugwilare nggok misik enpem pij-o.

³⁴ Nde, it-nen uno bem nimi nomosa nenggarik iri na-nen ndowaga o iri na unu-ge ”Uno bem nimi nomosa nenggarik yapma inpidnak sa-o” luk yariga-o.

³⁵ Nde, iri me-nen-e it na-ge Aserot wi nggwe mbirigarik, iri me-t woraiga-o.