URUT 4 - Nanduk Ngget Tul Pidnak Wene

Mboas-nen Urut wanidnak wene 4:1-12

¹ Mboas na-ge o siri pak tumende bem ap ndok wurugwi sa mberarik, koreyak worasoma-ge, at-nen indi peragid nap Elimelek ambik owe owot iri na mborosola karug-e, Mboas-nen wene mbo uburuk: ”Nab-o. Yu me kore yil lobok yi-o” yak tosola-ge, ap iri na-ge lobok yarik, eram kore yij-o.

² Iri lug-e, iri me-nen enne kulugwi nap enpe sepulu yonggo enparik, iri na me koreyak unpurug-e,

³ Mboas-nen ap at winde iri na yak tosolar-e: ”Naomi na-ge Moap-nen tuguruk lobok yarik, worasu-o. Nde, yawo-ge at-nen-e nit nentep Elimelek onggweyak ereba na-ge wene wurusu-o.

⁴ An-nen perasolar-e, iri wene-ge kar-e mondok karu wolmomtak ob-er-o. Nde, kat-nen nde nggweyak iri onggo purak ala-ge, naptak koreyak yeba inmbiri bem-et ’Onggo pimin-o’ luk yurag-o. Nde, onggo burak kimbit-nen na nam-et nak yurag-o. Nde, nggweyak iri wene yurag-e nit nenmberek nak worali-o. Alat nde, nandug-et wene yurag-e kar-er-o. An-e abok-nen yurag-o” luk yak tij-o. Yosoloma, ap iri na-nen yosolar-e: ”An-net onggo pimin-o” luk yij-o.

⁵ Yosoloma, Mboas-nen yosolar-e: ”Iri-ge konag-o. Alat nde, kat-nen nde nggweyak iri nde Naomi ebem onggo posolar-e, nggweyak iri-ge nggweyak iri ombo wat yidnak iri na-nen wigarak-net tena wolmakluk, Naomi ambara ogwe togwe Moap kwe iri min-et wanurag-o” luk yak tij-o.

⁶ Yosoloma, ap iri na-nen yosolar-e: ”Iri ala-ge, an-e onggo pimin pug-o. Nde, yawo-ge nggweyak iri wene yurag-e an-et ala karuk, onggo purak yigi na-ge iri wene an-nen mbarurag-e mondok keya bigi-o. Nggweyak iri-ge an-nen onggo purug-e an-nen wigarak-nen winde yurag-e lak me, wewesa onggo purak ala karuk, onggo pimin pug-o. Iri ala kat nde onggo purag-e konag-o” yak tij-o.

⁷ Nde, ereya tarem-e ap-nen nde enarengge mende wene worogolat ala na irit, enarengge nin min nden penden yogolat-nen na irit, iri nggal kwarogolar-e, ”Ndemeret ap enpem onggo wanamu-o” luk enaru yurak pem-e arengge wene wurusu nap iri na-nen-e at ujok sum yonggora keya buruk, onggo pusu iri na endam kegera keya bugwi-o. Isarael nap Isarael iri me-nen nggweyak onggo pogolat, onggo wanogolat kwarogolar-e, iri nggal kwarugwi-o.

⁸ Iri kwarugwi me, ap iri na-nen Mboas yak tosolar-e: ”Kar-et nggweyak iri-ge onggo pi-o” yak tosolug-e, ujok sum-e yonggora Mboas eram kegera pij-o.

⁹ Iri yosoloma, Mboas-nen enne kulugwi nap min ap erep iri me worali ereba na min oboksa yak ondosolar-e: ”Yawo-ge kit oboksa kenlengen pem-et Elimelek ambararak Kilion min Maklon min enarengge oboksa-ge Naomi ebem abu onggo pigi-o.

¹⁰ Ereya min lomboksa-ge Moap kwe Urut Maklon ogwe togwe iri na min-et wanusu-o. Iri nggal kwarosolar-e, nggweyak iri na-ge nggweyak ombo wat yidnak iri na-nen wigarak nggweyag-et wolmag-o. Wat yidnak nap ondolma pimin na o it wok indidnak sa-t onowe onowot ennggendumu-t wolmag-o. Kit kenlengen pem-et kwarusu me, kenaru-t wolmar-o, nap tag-o” luk yak indij-o.

¹¹ Iri yosola, enne kulugwi nap min ap erep ereba me woraiga ereba na min-nen yogolar-e: ”Iri-ge mondok kaige-o. Nde, Nagawan Indo-nen kogwe iri-ge Arakel min Lea min-nen inlirak kwarat Yakup ndet tiga ereya na nggal Nagawan Indo-nen kwarak ubuwag-o. Ap suwon Eperata kennggendumu-nen-e kar-e yi mende ndi mende bem-e ndak worala, Mbetleyem iri me-nen kanggu kobok mburuwag-o.

¹² Kwe ndugum yu ebem-nen Nagawan Indo-nen kilirak wok kuruwa ereba-nen-e kwe Tamat-nen Yewura ndet tid la Peres iri-nen wigarak ereba na nggal kat-nen wigarag-e wigarak mag-o” yak tiga-o.

Mboas-nen wigarak wene 4:13-22

¹³ Yak togolikma-ge, Mboas-nen Urut iri na wanarik worala-ge, Nagawan Indo-nen Urut iri na imbiringgat tak posola-ge, Urut na-ge abila luk, li ap misik ndagij-o.

¹⁴ Ndagamu-ge, kweyap-nen Naomi na yak togolar-e: ”Nagawan Indo nak erembel wanurag-o! La iri obog-e Isarael nap ennggendumu wigak mag-o.

¹⁵ Kambararak tuju-nen wok ketleb-e mariger-et nde, kambara ogwe iri-nen kabuwa karuk, wok kirid iri-ge mondok terak minig-et wok kirij-o. Nde, yawo kombo marik misik wok kirid iri-nen-e kindi yamuk tak posolat, kindi worak yugundik pem ndegel kobosolat kwaruwa-o” yak tiga-o.

¹⁶ Yogola-ge, Naomi-nen-e la iri na wanarik, indi kundik irit woralat, ndegel obosolat woragij-o.

¹⁷ At imin woragwi kweyap ereba na-nen-e la iri na unu-ge Obet yariga-o. Yatluk, ap oboksa yak ondosolar-e: ”Yawo-ge Naomi na-ge li ap misik inggem worasu-o” yak indiga-o. Nde, la Obet yu na abok nggwe-ge Isai eid kwat yij-o. Nde, Isai iri-ge Ndaut eij-o.

^18-22 Nde, yu-ge Ndaut omborak lolo-o. Tel korosolar-e, Peres-nen-e Eseron ndagid. Eseron-nen-e Aram ndagid. Aram-nen-e Aminandap ndagid. Aminandap-nen-e Nagason ndagid. Nagason-nen-e Salmon ndagid. Salomo-nen-e Mboas ndagid. Mboas-nen-e Obet ndagij-o. Obet-nen-e Isai ndagid. Isai-nen-e Ndaut ndagij-o.