URUT 3 - Nanduk Ngget Tul Pidnak Wene

Urut un wanidnak wene 3:1-18

¹ Siyak woraruk, misik tarem Naomi-nen Urut yak tosolar-e: ”Kar-e ap wanuruk kalen pem-et woranok-nen an-e tu kore yimin-o.

² Kar-e pempa nggandum mbato-ge Mboas eyapmu nggandum mbato mbarugwi kweyap inmin wanusu iri nar-o. Nde, Mboas iri-ge nit winder-o. Iri ala-ge, kwara kuli-o. Yawo kubu-ge Mboas iri-ge nggandum mbato aboro wanugwi sa eyapmu iri me engen wanuwa-o.

³ Iri ala-ge, kar-e kaboro matluk, emben konak amburu ndatluk, kusum na konak yutlug-e, eyapmu Mboas mbato engen wanusu sa iri me mbiri-o. At-nen keyagu-o luk mbik mboksa wolmomtag-o. At nde yi min nunggwi mende min nasoluk,

⁴ at nene yuwa iri kerengen wanurag-o. At nde nene yosola karug-e, embem sum leksa ujok unggutmu mbiring yil nggurag-o. Iri kwarosola-ge, at-nen-e kat-nen kwarurak iri-ge mondok yak kuruwa-o” luk yak tij-o.

⁵ Yak tosoloma, Urut-nen yosolar-e: ”Nembab-o. Ob-o. Kat-nen yak nirigen irit kwarimin-o” yij-o.

⁶ Yosolug-e, Urut na mberarik, nggandum mbato engen lurugwi sa iri na me wok yosolar-e, ambap-nen at-nen kwarurak yak tid ereba na ndak ndag-et kwarij-o.

⁷ Nde, Mboas na-ge nunggwi mende min yi min ereba na nuruk yarig-e, ar-e ukwe laksa indi alen luk yarig-e, nggandum mbato oro ligik ereba na eralu nene yij-o. Nene yosola-ge, Urut na-ge tip tap ene lak-nen nak embem sum iri na leksa keya buruk, ujok unggutmu mbiring yil nggwij-o.

⁸ Nde, kubu nggiringgendumu Mboas na indi luk luk, urugwe nden kagaidnggal-e, kwe misik at ujok unggutmu mbinggirik karuk, wendet yij-o.

⁹ Wendet luk, Mboas-nen yosolar-e: ”Kar-e ta-o?” yosoma, at-nen yosolar-e: ”Nab-o. Urut an-o. Kar-e nit min kundik me, kar-e an nimin wolmomtag-e ndak-net yusu-o. Iri bem-e, nab-o, wok nibi-o” yak tij-o.

¹⁰ Yosoloma, Mboas-nen yosolar-e: ”Nara-o. Nagawan Indo-nen imbiringgat tak kubuwag-o. Nde, kat-nen kun ija abuwa kaigen min yawo-nen kwarusu yu min ndak ndak tak pogolar-e, yawo-nen nenabuwa kasu-ge mondok terak minig-et kwarusu-o. Nde, ap kore yurak ala-ge, ap enarengge worak ennggendumu ala na, enarengge lak nap ennggendumu ala na, ap sujwe nggal mbi kore yurag-et nde, kar-e iri-ge kwarusu bug-o.

¹¹ Iri bem-e, Urut wa-e. Kar-e kumud kasu-ge meyog-o. O yu me nap oboksa-nen kar-e mondok kindi worak konak iri-ge enaru-t me, kat-nen yigen iri-ge oboksa kwar-et kibimin-o.

¹² An-e kat kun imin kundik me, an-nen kat kwat kuburak iri-ge an nebem-et nde, kun ambik owe owot perak misik worasu-o. At iri-nen kat kimin wolmomtak perak ndag-o.

¹³ Yawo kubu yu-ge kar-e yu me nak wolmin-o. Kup o nda yosola-nen an-nen-e ap iri yak timin-o. At winde nap ondolma purak pem kat kimin wolmomtak iri-ge at-nen kwarurak eyabu-t me, yak timin-o. Yak tosoma nde, ’Ob-o’ yosola-ge, iri-ge ober-o. Nde, ’An-e lag-o’ yosola-ge, Mbal Pem Nagawan uruk nak woraso iri na unu bem owak mbarusu-o. An-net kimin woramin-o. Kup nak-nen konurak me, yawo-ge yu me-t nene yi-o” yak tij-o.

¹⁴ Yosoloma-ge, Urut na-ge Mboas ijok unggutmu iri na me-t nene yij-o. Nde, kub-e Mboas-nen perasolar-e: ”Urut na Mboas eram lobok yarig-o” luk ap-nen enaru yurak iri-ge isili me, Urut na-ge ap-nen kujwa naru kubu kabu irit men yij-o.

¹⁵ Nde, Mboas-nen Urut yak tosolar-e: ”Kusum abak iri-ge yonggora yu me ndamak pi-o” yak tosoloma-ge, Urut-nen-e usum abak iri na-ge yonggora keya buruk, iri na me ndamak pij-o. Ndamak posoloma, Mboas-nen-e nggandum mbato angin-e dua pulu kilo irit sum ndamak iri na bem puruk, kudsa Urut endak pem pij-o. Iri rak ebamu-ge, kwe na-ge o silmu nggwe mbirij-o.

¹⁶ Urut na mberarik, o ma wok yosola-ge, Naomi-nen yak tosolar-e: ”Nowor-o. Ngge kwarag-o?” luk yak tosola-ge, Urut-nen-e Mboas-nen kwat ibid wene ereba na oboksa kerengga yak tij-o.

¹⁷ Iri-nen Urut-nen wene erep min-et yak tosolar-e: ”Nggandum mbato yeba na ’Kat-nen kambap eram we mbururag-e meya-o’ luk at-net wok neramu-o” yak tij-o.

¹⁸ Yosoloma, Naomi-nen yosolar-e: ”Nowor-o. Wene yu-ge abog-e ngge kwat ma-o? Karok kindiyabu nak wolmin-o. Nde, Mboas iri-ge yawo-ge wene yu lak tak pigit lak ma-ge indiyabu wolma bug-o” yak tij-o.