URUT 2 - Nanduk Ngget Tul Pidnak Wene

Urut-nen Mboas eyapmu nggandum mbato abapno pindigid wene 2:1-23

¹ Nde, Naomi na-ge un Elimelek iri na winde ap misik woragij-o. Nde, ap iri-ge silobulo ombo kek tak irit woragij-o. Nde, ap iri unu-ge Mboas.

² Nde, misik tarem-e Urut-nen Naomi yak tosolar-e: ”Nembab-o. Nggandum mbato mbarugwi kweyap-nen mbarogolat abapno ininggem-nen kapsa mberak pili mbi worasola-ge, yapmu mbirimindik, kapsa mbidnak ereba ndok wereyek-nen mbirimin-o. Mbirimindig-e, an punduguwakluk keya nuburak nab-e mbi worasu-t nde ma-o” yak tij-o. Yosoloma, Naomi-nen onggo yak tosolar-e: ”Nowor-o. Ob-er-o. Mbiri-o” yak tij-o.

³ Yosoloma, Urut na yapmu mberarig-e, nggandum mbato mbarugwi kweyap-nen mbarogolat liring kali ereba na inmbirik pindigil nij-o. Nde, yabu iri na-ge ndemeret Mboas eyabu-o.

⁴ Nggeret mbaril mburukmu-ge, Mboas na-ge Mbetleyem nggwe-nen lobok yosolat-nen nggandum mbato mbatli ereba na wa yak ondosolar-e: ”Nagawan Indo-ge kinmin wolmag-o” yak ondosola, it-nen onggo at wa yak togolar-e: ”Nagawan Indo-ge nonmbo kimin wolmag-o” luk yiga-o.

⁵ Nde, Mboas-nen nggandum mbato mbatli enanggul pem iri na kin wok obosolar-e: ”Kwe iri-ge ta-o?” luk kin wanij-o.

⁶ Kin wanosola, at-nen onggo yosolar-e: ”Kwe iri-ge Moap kwe-o. Naomi imin Moap-nen nggeret lobok yidnag-o.

⁷ Ar-e it nggandum mbato mbatli yeba-nen mbarogolat liring kali yeba pundugurak pem-e ’Yeba an pundugurag-e nunggwirig-o?’ luk an nebem nggi yarik, kuplila-nen pak mbid pindigid pindigid yanem-et marig-et o lije ma ababok kwarusu-o” luk yak tij-o.

^8-9 Yak tosoloma, Mboas-nen Urut yak tosolar-e: ”Kar-e wene yak kirimin yu kwara kuli-o. Kar-e it nin eneyapmu nggandum mbato abapno pindigil-e mbururak pug-o. Are, an neyapmu nggandum mbatombarugwi kweyap yeba-nen an neyapmu yu me mbarogola, kar-e inmin abapno liring kagola pundugurag-o. It keya unpurak pug-o. Alat nde, it mburuwa sa iri-ge kar-e kerengen waruk inmbirik nak nurag-o. Nde, kat-nen nde yi nere ala-ge, an ndegel nubugwi nap-nen yimbe nggok ereba arem yi kenangga pidnak ereba-t norag-o. Nde, an-nen-e it yak ondosolar-e, kat keresa ’Imin-e yi kwatlik ndi kwatlik mondok kwarurak pug-o’ luk yak undukmu-o” luk yak tij-o.

¹⁰ Yosoloma, Urut na Mboas eram erare nggwe tud yosolat-nen yak tosolar-e: ”Nab-o. An-e erem nin kweyab-et me, nabuwa karuk, konak kwat nuburag-e lag-et nde, noluk-nen iri kwat nubusu-o?” luk yak tij-o.

¹¹ Yosoloma, Mboas-nen onggo yak tosolar-e: ”Kat kun wat yamu-nen kun ija kwat obosolat kwarigen wene ereba-ge an-e kuligi-o. Kar-e keid kiya min kuwi nggweyak min keya buruk lobok yigendik, kat eneyaso buk nap inmin worasu yu na an-e naru-o.

¹² Nde, kat-nen konak kwarigen ereba-ge Nagawan Indo-nen onggo puwag-o. Kar-e kimiri yuwakluk at eram lobok yidnak me, Nagawan Indo Isarael nap Enmbal Pem Nagawan-nen-e mondok kat wok kururag-et wok kuruwa iri na-ge wanonog-o” luk yak tij-o.

¹³ Yosoloma, Urut-nen onggo yosolar-e: ”Nab-o. An-e kat keyabu wanugwi yeba nggal ndak ndag-e lag-et nde, kar-e an nimin-e konag-et kwarusu-o. Kat-nen an nimin konak nak wene ndurusu bem-e an nindi kwarat alen tak pusu-o” luk yak tij-o.

¹⁴ Iri luk, nunggwi mende norak panggo yosola-ge, Mboas-nen Urut yak tosolar-e: ”Nunggwi mende nil lobok yi-o. Nde, nunggwi mende amburu rak purak amburu-ge yu-o” yak tij-o. Yosoloma-ge, Urut na-ge nggandum mbato mbarugwi kweyap ereba na inmin nunggwi mende ningga-o. Nonggola-ge, Mboas-nen nggandum mbato wora ereba na min-et wok tij-o. Iri yamu, nunggwi mende-ge imbitsa nuruk, erep minggirik keya bij-o.

^15-16 Nurug-e, Urut na-ge nggandum mbato abapno ereba na pindigil mbirij-o. Mberamu-ge, Mboas-nen nggandum mbato mbarugwi ereba na yak ondosolar-e: ”At-nen nde nggandum mbato ut kamarak ereba nggwe pondogosola-ge, inggiri rak pogolat, kinsilepma ebem pogolat yurak pug-o. Keya nak uburag-o. Kit-nen na kinndi-net nde, ut kamarak pidnak ereba na me-nen siyag-et at-nen punduguwakluk, lesa keya burag-o” yak indij-o.

¹⁷ Nde, Urut na-ge nggandum mbato yapmu ereba na-t pindik tenak worasoma, o keyama agaij-o. Keyama alama-ge, Urut na-ge nggandum engen umbuwak pem-nen lera mbuwakluk ariwak lel kaga lera ligik pidnggal-e nggandum mbato angin-e sepulu kilo irit lera ligik pij-o.

¹⁸ Iri lug-e, nggandum engen lirid ereba na-ge ambap un ija iri na eram waruk mberarik, nuk kagaij-o. Nuk kasolug-e, nunggwi mende nonggolat minggirik ereba na-ge mak tij-o.

¹⁹ Mak tosola, Naomi-nen yosolar-e: ”Kar-e nggandum engen yeba-ge ngge me-nen wanigen-o? Yawo-ge ta eyapmu-nen wanigen-o? Kat konak kwat kibid iri-ge Nagawan Indo-nen imbiringgat tak ubuwag-o” luk yak tij-o. Iri yosoloma, Urut-nen Naomi ndindera yak tosolar-e: ”Nggandum mbato yeba-ge ap misik unu-ge Mboas eyapmu-nen pindiki-o” yosoloma-ge,

²⁰ Naomi-nen yosolar-e: ”Nowor-o. Ap iri-ge nit winder-o. Nit yongga nunduwa nab-e irir-o. At iri-ge Nagawan Indo-nen imbiringgat tak ubuwag-o. Nde, Nagawan Indo-ge unluk worali na irit wat yidnak na irit kwat kinpimin-o luk urul yak undurug-e, urul yak indidnak iri na ndak ndag-et kwaroso-nen yusu-o” luk yij-o.

²¹ Yosoloma, Urut-nen yosolar-e: ”Nembab-o. At-nen yak norosolar-e: ’Kar-e an mbato mbarugwi kweyap ereba inmin pempa an neyapmu nak nggandum mbato-ge pindik tenak irit worasoma, nggandum mbato ese nggaruk yosola-net ndong yurag-o’ luk yak nirij-o” luk yak tij-o.

²² Yosoloma, Naomi-nen yosolar-e: ”Nowor-o. Iri-ge ob-er-o. Kar-e Mboas eyapmu mbato mbarugwi kweyap ereba inmin-et mbal tenak wolmom iri-ge mondok konag-o. Kat nde nin nap eneyapmu nggandum mbato abapno pondogosola-ge, ap ereba-nen tena kibilik nde ma-o” luk yak tij-o.

²³ Iri yak tamu-ge, Urut na-ge pempa Mboas eyapmu mbato mbarugwi kweyap ereba na inmin nak pondogosolat woragij-o. Iri kwarosolat Urut na ambap min woralar-e, nggandum mbato anggul mbariga kuri-nen ese nggaruk yid kuri iri-ge nggandum abapno-ge Mboas eyapmu ereba nag-et pindik tenak worasoma, nggandum mbato ese nggaruk yij-o.