URUT 1 - Nanduk Ngget Tul Pidnak Wene

Urut Elimelek ogwela inmin Moap wi mbiridnak wene 1:1-5

^1-2 Nde, nanduk Isarael nap ennggendumu nagawan mendak unpugwi lak woragola tarem-e Kanaan wi-ge nogoro mondok kwiye worak irit mbud yij-o. Nde, iri tarem-e ap misik unu-ge Elimelek irit woragij-o. At iri-ge Eperata nap, Yewura nggweyak pem o Mbetleyem woragij-o. Nde, iri me mondok nere kwiye worak mbud yosola-ge, ogwe Naomi min enmbararak mberen Maklon min Kilion min inmin Moap wi mberarik, ereba me worakmu-ge,

³ Elimelek na-ge wat yamu-ge Naomi ambararak mberen inmin nak woragij-o.

⁴ Nde, ambararak mberen ereya na-ge Moap kweyap unnu-ge Oropa min Urut min waniga-o. Nde, olengen sepulu worarug-e,

⁵ Naomi ambararak Maklon min Kilion min ya na-ret wat yikma, Naomi na-ge arik irit woragij-o.

Naomi min Urut min tuguruk Mbetleyem mbiridnak wene 1:6-22

⁶ Nde, siyak woraruk, Naomi-nen kulidnggal-e, ”Nagawan Indo-nen Isarael nap inmbiringgat tak pamu, nunggwi mende konak nak mbatli-o” yidnak wene kulurug-e, ilirak onkwela togwe mberen ya na inmin Moap-nen mburuwokluk yiga-o.

⁷ Iri lug-e, it ya na Yewura nggweyak pem mburuwokluk mborogolat, tundumu wok yogolar-e,

⁸ Naomi-nen ilirak onkwela togwe ereya na yak ondosolar-e: ”Kir-e tuguruk kiniyarak endam mberer-o. Kit-nen an min it wat yiga ereya inmin konak nak kwat ninpigep nggal-et Nagawan Indo-nen na kit kinmin-e konak nak kwat kunpuwag-o.

⁹ Li iniya kwat yobok-nen Nagawan Indo-nen ap mbi wok kunduwag-o” yak ondosolug-e, Naomi-nen ngonok endarik, wa yak indij-o. Alat nde, Oropa min Urut min na-ge sa nggwa mbogolat-nen

¹⁰ Naomi yak togolar-e: ”Mondok lag-o, nenmbab-o. Nit totno-t kelem nap endam mburul-o” yiga-o.

¹¹ Iri yogola, Naomi-nen it yak ondosolar-e: ”Nowot tag-o. Mondok lag-o. Kir-e tuguruk mberer-o. No manggim an nimin mburugub-o? Kit wok kunpurak an-nen tuguruk li ndagurag-e mondok meya yu neyali bug-a?

¹² An-nen ap misik wanurag-e abu nindi worak me, nowot tag-o. Mondok mberer-o. An nde siyak namawi min nggal-nen nde yawo kubu ap misik wanuruk, li ap mbi ndet enpelepnggal-e,

¹³ nggok yuwakluk kir-e yik eneyarok irit wolmomtag-e ndag-a? Iri kwasa woragolat, ap nin wanigit lak yeleb-a? Nowot tag-o. Kit yu nggal kwatli-ge meyog-o. Nagawan Indo-nen angin worak an nebem posolat kwaridnak me, kit-nen woragolat anggun panggun kagup iri bem-e an-e nindi puru kwarat yusu-o” yak indij-o.

¹⁴ Iri yak ondosola-ge, Urut min Oropa min-e yip kujwe mba yiga-o. Iri lug-e, Oropa na-ge Naomi na ngonok tarik, yip mak turug-e, ama mbirij-o. Alat nde, Urut na-ge ambap iri na ngonok turuk, lembe yij-o.

¹⁵ Iri ala karuk, Naomi-nen Urut yak tosolar-e: ”Yik ki-o. Kanggam na-ge tuguruk elem nap min ugugwiwak min endam mbirij-o. Iri ala-ge, nowor-o. Kat min-et imbirik mbiri-o” yak tij-o.

¹⁶ Alat nde, Urut-nen onggo yosolar-e: ”Nembab-o. Kat keya kuburuk mburuwakluk ’Mbiri-o’ yak nurusu-ge meyog-o. Nembap kat kimin-et mbirimin-o. Nembap kat mburugun sa an na iri me-t mbirimin-o. Kat woragun sa na an na iri me-t woramin-o. Nembap kerem nap ereba-ge an nerem nap-net ma-o. Kat-nen erembel wanoso Kembal Pem Nagawan iri na an-nen na erembel-et wanimin-o.

¹⁷ Kat wat yugun sa na an na iri me-t wat yumu, yapma nubuwa-o. Nde, an-e Nagawan Indo imbiri bem-et owak mbarusu-o. Mondok wat yogolat-net keya kibimin-o” luk yij-o.

¹⁸ Iri ala, Naomi-nen yik kagaidnggal-e, Urut na indi-ge at imin mbururak wat tak pidnak ala karuk, wene erep min yak turag-e larok yij-o.

¹⁹ Iri luk, it enmberek na mbirigarig-e, Mbetleyem wok yiga-o. It wok yogola-ge, o iri me woragwi nap-nen-e ”At eresa lobok yij-o” luk enne-ge nono mbirij-o. Iri yogolat-nen iri me woragwi kweyap ereba na-nen yogolar-e: ”Iri-ge ndemeret Naomi-t, lak?” luk yiga-o.

²⁰ Iri yogola, Naomi-nen yosolar-e: ”Kir-e an nunu Naomi yili iri-ge meyog-o. Nagawan Indo Amawi Worak iri na-nen keya nebamu, an-e nengari kobong tak me, an nunu yogolar-e, Mara luk yurag-o.

²¹ An nanduk yu me-nen mborosolar-e, mondok abu ndak mbirigi-t nde, yawo Nagawan Indo-nen tuguruk wok nuburuk lobok yosolar-e, mondok nusu nggwarak lobok yigi-o. Iri bem-e, Nagawan Indo Amawi Worak iri na-nen angin worak nebem posolar-e, andi bandi mende kwarat nebem pidnak me, kir-e an nunu Naomi-o yak nitli iri-ge meyog-o” luk yak indij-o.

²² Iri nggal kwasa Naomi na-ge Moap wi-nen Moap kwe Urut ambara ogwe iri na min lobok yiga-o. Nde, it mberen Mbetleyem wok yiga-ge nggandum mbato anggul mbarugwi tarem irit wok yiga-o.