SAKARIA 9 - Nanduk Ngget Tul Pidnak Wene

Sakaria ”Nagawan misik lobok yuwa-o” luk yidnak wene 9:9-10

⁹ Sion woragwi nap wa-e. Kenalin kenalen mber-o! Yerusalem woragwi nap wa-e. Kenalen-nen kinni kenne mber-o! Yik ker-o! Kit-nen idnak nagawan-e ombol nggwe luk lobok yusu-o! At iri-ge mot mot nak kwaroso nagawan inmiri yoso elem waruk lobok yusu-o. Alat nde, ar-e indi teberak pem-et wok yosolar-e, kelerai awo mendaso mbi ebem koreluk lobok yusu-o.

¹⁰ Nagawan Indo-nen yosolar-e: ”Eperaim nap-nen idnak wim nggugwi koma-ge an-nen mbo bimin-o. Yerusalem woraso kura wam-e an-nen lak tak posolat, mingin mare oboksa an-nen yigisa keya bosolat kwarimin-o. Kit-nen idnak nagawan-nen-e yi nap ndi nap enlem oboksa inmin kundik lambuksa wolmomtak wene wirik puwa-o. Yi wi ndi wi oboksa min Yi Eperat kuri-nen mberarik, o kuri ap kuri oboksa at-nen nak tena wolma-o” luk yij-o.

Mbal Pem Nagawan ilirak nanduk-nen konak woragwi nggal tuguruk kwarak unpurak wene 9:11-17

¹¹ Nagawan Indo-nen at ilirak yak ondosolar-e: ”An-nen kit kinmin kondosolat urul yak kindigi iri na-ge an namanggim wosa pugwi ereba na eyabi wirik pugwi ndemeret ebe worak tak posolar-e, iri na bem-nen-e yi emnde mbarak yi eberek yidnak arem woragwi nggal kit nap mbo inpidnak sa ereba na me anggun panggun kagolat worali ereba-ge wisirik inpimin-o.

¹² Mbo kinpidnak nap yawo kinndi at ebem mbung mbung tak worali nap wa-e. Tuguruk lobok yer-o! Kit kinmiri yurak sa tuguruk lobok yer-o. Mondok kwara koler-o: Kir-e pempa andi bandi kagolat woragwi bem-e an-nen-e mberen pem nggal nambena imbiringgat tak konposolat woramin-o.

¹³ Nde, Yewura iri-ge san ombo ensan nggal kwat onposolat woramin-o. Nde, Isarael nab-e mare mbising kudtak anggare bem puruk woragwi nggal tak inpimin-o. Nde, Sion woragwi nab-e kabo nggal tak onposolug-e, kabo iri bem-nen Yunani nab-e inmin wim mbarimin-o” luk yij-o.

¹⁴ Nde, Nagawan Indo-ge at ilirak inmbiri bem nam yaga mirik unpuwa-o. At-nen amare mbising kasolar-e, mondok obinel nggal nak mbisingsa pil mburuwa-o. Nagawan Indo Mondok Kek tak iri na-nen-e wim nggogolat-nen pugwi terompet ene nak posoluk, abare ena (selatan) nggwe-nen o wija lobok yoso iri na bem wim pil mburuwa-o.

¹⁵ Nde, Nagawan Indo Mondok Kek tak iri na-nen at ilirag-e inmiri yosola, it unuwim nab-e urugwe nggwe rak unpuwa-o. Inndi nden kaso yi nuruk, urugwe nggwe yugwi nggal wim nggogolat enne sa nggwa mbuwa-o. Wam wosa kan pogolat eyabi wam kan pugwi sa nggilara mbusu iri nggal wim nap eneyabi-ge nggilara mbuwa-o.

¹⁶ Nde, iri kwarurak tarem iri wok yosola-ge, lomba ndugurugwi nap-nen isilepma worak emndam-nen lomba imiri yugwi ereba na nggal-et Nagawan Indo-nen-e at ilirag-e inmiri yuwa-o. It iri-ge abinal worak kerep-nen konidnak topi nagawan-nen enanggul pem pugwi abinal nggal, Nagawan Indo uwi nggweyak pem-e enabinal worak wolma-o.

¹⁷ Nde, nagawan uwi nggweyag-e konak lombok-nen yusu-o! At onggweyak iri-ge konak lombog-e ijar-o! Nde, iri me-ge nggandum mbato min anggut min-e ndag-et nak wigak yosolat, iri-nen ndowaga ap sujwe min kweyap ndugum min na kwarat enmawi worak ma-o.