PILIPI 2 - Nanduk Ngget Tul Pidnak Wene

Ir-e inndi misiget luk, Kerisut indi teberak nggal inndi teberak wolmakluk nggomo indidnak wene 2:1-11

¹ Nde, kir-e Kerisut ebem woragola, kinndi embem tak pusu-a? At-nen kenabuwa kaso iri-nen kit kinndi yungunik pusu-a? Kir-e Konak Indi ebem misiget nak yili-a? Nabuwa kabuwa yogolar-e, kit na kit-net kunmud kali-a?

² Iri kwatli ala-ge, kir-e an nalen mondok kwarat tak poboklug-e, kit kinndi misiget luk, nabuwa kabuwa yogolar-e, kit kinndi misiget nak woragolat, yebet kagolat na misiget erep nak yebet kagolat woragub-o.

³ Kit kondomok kunnu kek tak purak pem, kit kondomok kentembel wanurak pem-e yi kwatlik ndi kwatlik kwarurak pug-o. Are, kinndi tebe yogolar-e, kit kondomok tebe luk, nin nab-e kek tak irit yik iniyudtag-o.

⁴ Kit kenmanggim nak nggok tak pili-ge meyog-o. Are, nin nap enmanggim irit nggok tak purag-o.

⁵ Kerisut Yesus-nen yebet kaso nggal-et kit-nen na yebet kagolat wolmer-o. At-nen yebet kaso-ge yu nggal-o:

⁶ Ar-e Mbal Pem Nagawan-et nde, ”An nebage Mbal Pem Nagawan imin ndak ndak woraso tena worayeg-o” luk peragir-e lag-o.

⁷ Are, at abage Mbal Pem Nagawan na nggoroksa keya buruk, ndegel onposo nap abage wanuruk, ki nap enaboro worak agaij-o.

⁸ Nde, ki nap enpage nggal luk, ar-e tebe luk, Mbal Pem Nagawan-nen yidnak yidnak kwarogolar-e, wat yekluk ondomok indi wisirik pij-o. Nde, iri-ge e lang pang tak pem wat yid irir-o.

⁹ Iri kwarid pem-e, Mbal Pem Nagawan-nen ndemeret at kek tak uburuk, ap erep unnu-ge tebe rak puruk, at unu mondok kek tak paga wok tij-o.

¹⁰ Iri bem-e, aid arem woragwi nap-nen na, nggweyak ma yu me woragwi nap-nen na, nggweyak urugwe nggwe woragwi nap-nen na, oboksa-nen it endaru yunggusa koreluk, Yesus unu kek tak pogolar-e,

¹¹ it ondomok enmende nggwe-nen para yogolar-e: ”Yesus Kerisut yu-ge Nagawan Indo-nen yusu-o” luk yogolat-nen-e Nineid Mbal Pem Nagawan unu kek tak puwa-o.

Kinmiri yurak elem kore yogolar-e, kenmawi konder-o luk yak indidnak wene 2:12-18

¹² Nenggamirak kenabuwa worak wa-e. Iri bem-e an-e kinmin worala-nen an-nen yidnak yidnak nak kwarogolat woraigep iri-ge ob-et nde, yawo an nebalma-nen na an-nen yidnak yidnak kwarogolat wolmomtak iri perak nde nggulog-o. Kit kondomok kinmiri yurak elem na-ge kwiye min konowak lele min-et wanogolat wolmer-o.

¹³ Nde, Mbal Pem Nagawan-nen kit kenarem eyabu wanosolar-e, at ondomok indi-n pidnak pem-et iri kwarurak kinndi wok kondosolat, iri kwarurak kenmawi wok kondosolat yusu-o.

¹⁴ Yi kwatlik ndi kwatlik kwarogolar-e, ujwagujwa yogolat, ngguno pebe yogolat momtak pug-o.

¹⁵ Irit kwarugup ala-ge, kir-e meya mbi kwarugwi na lak, kinndi mot mor-et woragolar-e, lugud tak kwarugwi nap min nden penden kwarugwi nap min ennggenggerak-nen kir-e Mbal Pem Nagawan ilirak meya na yugwi buk nap irit woragub-o. It ennggenggerak-nen-e kir-e wonaru nggal, nggweyak ma yu me yaya rak pogolar-e,

¹⁶ unlug-et wolmomtak wene iri-ge it yak ondogolat woragub-o. Kit nde iri nggal kwarugup pem-e, an-nen pong kasolat woragi min anggun panggun kasolat woragi min-e ebe lak mende yigit lak, are, Kerisut-nen idnak Tarem-nen kit kenpem-e an nalen kamin-o.

¹⁷ Alat nde, Mbal Pem Nagawan amanggim wam wosa bidnak nggal, at amanggim pidnak nggal, kit kinndi angin tubu yidnak pem an neyabi nde wirik purak ala-ge, an nalen kasolat, kit pidsa kinmin na nalen kasolat yeleb-o.

¹⁸ Nde, kit na iri nggal-et kenalen kagolat, an nimin na nenalen kaleb-o.

Timotius min Epapororitus min 2:19–3:1a

¹⁹ Nagawan Indo Yesus ebem an-e Timotius na-ge kit kendam ndag-et nak ibil lobok yurak perasu-o. Kit-nen kwatli wene kuluruk yimindig-e, an nindi yek yurak pem-nen yigi-o.

²⁰ Ninndi misiget yebet kagwi nap at nggal mbi ap misiger-o luk tet an nimin-e lag-o. Timotius nak woraso me, kit-nen kwarurak mende bem at-net ndemeret yebet keneyaso-o.

²¹ It ereb-e inndi-ge it ondomok-nen kwarurak nak nggok tak pogolar-e, Yesus Kerisut owene-ge marik tak pili-o.

²² Timotius-nen mot mot nak kwaroso na lombot pukmu-ge, aid wene bem an yongga norosolar-e, ambara-nen eid yongga woroso nggal yongga nirid iri kenaru nar-o.

²³ Iri bem-e, an kwat nuburak wene naru lug-e, at iri na-ge kit kendam ndag-et nak ibil lobok yurak perasu-o.

²⁴ Alat nde, Nagawan Indo ebem-nen an-nen perasolar-e, an-et ndag-et nak kendam lobok yurak irit perasu-o.

²⁵ Nandug-er-e an nanggam yabu misiget erep wanogolat, wim misiget erep tomborogolat yoso nap, nonowot Epapororitus na-ge kit kendam ibil-et lobok yimin-o. At iri-ge an yongga nuruwakluk kit-nen ibil lobok yigep nar-o.

²⁶ At iri-ge kit oboksa kiniyudtak pem indingen kwarat kasu-o. Nde, at iri kugi wiridnak kuligep na bem at indi andi kwarat agaij-o.

²⁷ Ndemerer-o. At iri-ge kugi kwarat wiridnak pem wat momtak nggal yij-et nde, Mbal Pem Nagawan-nen at ubud kagaij-o. Nde, at ubud nak kagaij-e lag-o. Are, an min ebem lud nindi puru ma naru, an nubud na kagaij-er-o.

²⁸ Iri bem-e, an-e ndag-et nak kit kendam ibil lobok yimin-o. Iri ala-ge, kit-nen at karug-e, kenalen kwarat kagola-ge, an nindi puru yidnak na-ge lak ma-o.

²⁹ At iri-ge Nagawan Indo ebem-et kit konowot tak pidnak me, kenalen min-et wok uburag-o. Nde, at min at-nen kwaroso nggal kwarugwi nap oboksa min-e unnu kek tak pogolat wolmer-o.

³⁰ At-nen kwaroso-ge yu-o: At iri-ge Kerisut eyabu wanosolar-e, at ondomok indi wisirik pidnak me, kit-nen ndegel nuburak nggal at kondolmasa ndegel nebeyekluk yosoma, komo wat yurak nggal yij-o.