PILIPI 1 - Nanduk Ngget Tul Pidnak Wene

Wa yak indiduak wene 1:1-2

¹ Pilipi woragwi marak nap oboksa, Kerisut Yesus ebem kinndi angin tubu yigep nap kit min ogore yidnak nap min it yongga undugwi nap min kenmanggim-e Kerisut Yesus ndegel ubugwi nap nit Paulus min Timotius min-nen yili-o.

² Nineid Mbal Pem Nagawan min Nagawan Indo Yesus Kerisut min-nen we wok ondoso elem min lambuksa woragwi elem min kinmin wolmag-o.

Tepan yosolat ”Wiwa-o” luk Mbal Pem Nagawan yak tidnak wene 1:3-11

³ An-e pempa yebet keneyasolar-e: ”Mbal Pem Nagawan wiwa-o” luk yak toso-o.

⁴ Nde, an-e pempa pempa-t kit pidsa kenmanggim tepan yosolar-e, nalen min-et yoso-o.

⁵ An-e iri yoso iri-ge tel kwirigep kuri-net yawo na kir-e aid wene bem yongga norogolat worali bem-nen iri yoso-o.

⁶ Kit kenarem konak eyabu tel kwirid Mbal Pem Nagawan-nen-e eyabu iri na wok tenag-et worasoma, Kerisut Yesus lobok yuwa tarem-nen worok tak puwar-o luk an-e mondok naru worasu-o.

⁷ An-e pempa pempa kit oboksa kenperasu iri-ge, kir-e an narem nggwidnak me, lud tag-et yebet keneyasu-o. Nde, an-e o kubu me worala-nen na, an-e aid wene na imiri alat, tugup lak tak peyekluk yosola-nen na, Mbal Pem Nagawan-nen we wok ondoso mende wok niridnak iri na-ge kir-e an nimin totno wanili-o.

⁸ Mbal Pem Nagawan-e aru-o. Kerisut Yesus-nen kenabuwa kaso nggal, iri nggal-et an-e kit pidsa kenpem nindi mondok kwindik worasu-o.

⁹ An-nen kenmanggim tepan yoso-ge yu nggal kwarobokluk-nen yoso-o: Kit-nen ap enabuwa kagwi min kenaru yugwi min yebet kagwi mende pidsa min iri-ge irit tit, irit tit kwarat mag-o luk yoso-o.

¹⁰ Iri nggal marig-e, kit-nen-e konak mende nak lena wanurag-e ndak ma-o. Iri lena wanogola-ge, Kerisut lobok yuwa tarem-nen-e kir-e mondok marak, meya na kenpem lak irit woragub-o.

¹¹ Nde, Yesus Kerisut ebem-nen lud tak nak kwarugwi engen kwarat pidnak kit kenarem kobongsa wolma iri-ge Mbal Pem Nagawan unu kek tak pogolat, at erembel wanogolat makluk-nen wolma-o.

Paulus o kubu me woralat-nen kinggiridnak wene 1:12-26

¹² Nowe nowosi wa-e. Wene yu kenaru rak peyeg-o. An kwat nibidnak ereba-nen ndowaga aid wene nggulok yusu-o.

¹³ Iri kwat nibidnak pem-e, it nagawan woraso sa woragwi nap oboksa min ap erep oboksa min-nen neberagolar-e, ”Ar-e Kerisut ebem-nen o kubu me ibil nggwiga-o” luk nam-et neyali-o.

¹⁴ Nde, kere kamat nibidnak na bem-nen-e nennggamirak erep kwarat-nen-e Nagawan Indo ebem ala, ebem lud enmawi kunduruk, Mbal Pem Nagawan-nen yidnak wene-ge mondok kwiye lag-et ap yak indili-o.

¹⁵ It erep-nen Kerisut owene yili iri-ge enlengen ale min an-nen yidnak wene eyak wuruwokluk-nen yili-t nde, it erep-nen-e inndi mbek tak pem-et Kerisut owene yili-o.

¹⁶ Nde, iri yili iri-ge, an-e aid wene na elat mbarurak nebem pidnak na enaru me, an nabuwa-nen yili-o.

¹⁷ It erep iri-nen Kerisut owene yili iri-ge, it inndi mbek tak pem-nen yili-ge lag-o. Are, it ondomok kek momtak pem nak yogolat, o kubu me worala, anggun worak mende nebem puwokluk-nen yili-o.

¹⁸ Alat nde, iri yili iri-ge ereba mag-o. Kerisut owene wigarogolar-e, ir-e enaboro nak-nen ala na, ir-e ndemeret inndi-nen ala na, Kerisut owene wigarak pili me, an-e nalen kasu-o. Ye. Nde, an-e yu bem nalen pempa kasolat woramin-o:

¹⁹ Kit-nen namanggim tepan yili bem-e Yesus Kerisut Indi-nen an yongga norosola-ge, an nimiri-t yuwa-o luk naru woralat nalen kasu-o.

²⁰ Nde, an-e neyabu wanidnak pem ninggiri lag-et teyeg-o luk, nindi kundugu nindi bem mbung mbung tak worasu-o. Alat nde, nanduk woragi kuri, yawo-nen na an nebe yu bem-nen Kerisut unu kek makluk, nuruk wolmomtak na, wat momtak na, an-e mondok kwiye lag-o.

²¹ Nde, an namanggim-e nuruk wolmomtag-e Kerisut ebem-net nuruk worasu-o. Nde, an wat yurag-e mondok konak lombog-o.

²² Alat nde, an nebe yu nuruk woralar-e, an neyabu konak mbi wanosolat wolmomtak ala-ge, ngge nde kwarimin-o? Nuruk woramin, lak? Wat yimin, lak? luk naru bug-o.

²³ Wene mberen iri bem-e an kabak yusu-o. An-e mbirimindik, Kerisut imin totno wolmomtak iri-ge nindingen kwarat yusu-o. Iri momtak perak nde mondok konak lombog-o.

²⁴ Alat nde, kit kenmanggim ala, an-e yu me nuruk wolmomtak na nggok-net yusu-o.

²⁵ Iri-ge mondok nindi yebet kagirik me, nurug-et woramin-o luk naru yusu-o. Kit kinndi angin tubu yidnak pem kwara woragolat, kenalen kwarat kabokluk, kit pidsa kinmin woramin-o.

²⁶ Iri bem-e an tuguruk kit kendam wok yosola-ge, an-nen yidnak pem Kerisut Yesus unu mondok kwarat kek tak pogolat woragub-o.

Iri nggal-et enmawi kunduwakluk nggomo indidnak wene 1:27-30

²⁷ An lobok yimindik-nen-e keneyasolat, nde, lobok yigit lak-nen-e konpok kolosolar-e: ”It inndi tugup lak luk, it inndi misiget luk lambuksa woragolat, inndi angin tubu yugwi aid wene amanggim enmawi kundili-o” luk konpok kuleyek-nen kit-nen yi kwatlik ndi kwatlik kwarogolar-e, Kerisut-nen idnak aid wene iri na-nen yidnak ndak ndak nak kwarogolat wolmer-o.

²⁸ Kit kinmin sirid nap-nen-e mondok kwiye rak kunpuwa bug-o. Kir-e it enaye kagit lak yogola-ge, ”E! It yu-ge nit lak tak nunpuwa-o” luk yenggerak kunpuwa-o. Nde, Mbal Pem Nagawan-nen perak nde kit kinmiri yuwa-o.

²⁹ Nde, Mbal Pem Nagawan-nen wok kondosolar-e, we Kerisut ebem kinndi angin tubu yurak iri nak wok kindigit lag-o. Are, at amanggim andi bandi kudtak min-et wok kendamu-o.

³⁰ Kir-e an totno wim misiget erep mbatli-o. Nde, nanduk an wim mbarosola neyaigep iri-ge yawo na wim-e iri nggal-et mbarusu-o luk nobok kulili-o.