OSEA 7 - Nanduk Ngget Tul Pidnak Wene

¹ Nagawan Indo-nen yosolar-e: ”An-nen-e pempa an nilirak Isarael nab-e ki rak onposolat, tuguruk nanduk-nen woragwi nggal ondolma rak onposolat kwareyekluk yosoma-t nde, an-nen yik kasoma-ge, it-nen lugudtak kwarugwi min meya kwarugwi min nak kasu-o. Ir-e it na it-net enmberam lagolat, yariya wanurak pem ap enma nak nggogolat, tula tula ereba na me-nen ap nak nden enperenak worali-o.

² It-nen peragolar-e: ’Nit-nen meya kwatli oboksa yeba-ge Nagawan Indo-nen-e yebet kasu bug-o’ luk perali-o. Alat nde, it meya kwarugwi ereba-nen muruk tak unpuruk worala me, an-nen-e nam-et nak it meya yidnag-e kasu-o” luk yij-o.

Nagawan wuruwokluk nagawan woraso sa-nen wene mbaridnak wene 7:3-7

³ Nagawan Indo-nen yosolar-e: ”Ap iri me woragwi nap-nen-e meya nak kwarugwi iri na bem nagawan min at eyabu wanugwi nap ereba na min ennesiget enmberam lagolat, enalen tak pili-o.

⁴ It oboksa-ge tugup lak woragwi buk, enmberam lagwi-nen yili-o. Nde, it insilepma-ge oroti worakwi nap-nen oroti omok wosa lid lud tak pidnak ereba na woraguwokluk kan mabugwi iri me mabidnak pakit lak monosolat woraso iri na nggal-nen yusu-o.

⁵ Nagawan-nen nggok sakwi tarem-e it ereba na-nen-e nagawan min at eyabu wanugwi nap ereba na min anggut engen amburu mak ondogolat, inndi nden kasolat, meya indi lak-nen kwarugwi ereba na kwarugwi-o. Iri kwarogolar-e, nagawan iri na-ge lugudtak kwarugwi nap ereba na inmin alin alen poso-o.

⁶ Iri kwarosola-ge, kan mabugwi sa kan mabidnak iri na nggal meya kwarurak peragwi min it-nen insilepma yugwi min-e it enarem-e kanduk nggal kubu-ge pempa kererenak woraso-o. Nde, kuplila-ge, wulok luk pagoso-o.

⁷ Nde, it insilepma bem-e it-nen enne kulugwi nab-e indili-o. Iri nggal kwarogolar-e, it-nen idnak nagawan ereba na ondogolat nak woraiga-o. Iri nggal kwarogolar-et nde, ap misiger-o luk mbi-nen yongga unduwakluk an neram wene pil lagit lak worali-o” luk yij-o.

Isarael nap min ap enlem erep min-nen kwaridnak wene 7:8-16

⁸ Nagawan Indo-nen yosolar-e: ”It enlem Isarael nab-e ap enlem erep it entalu ereba na inmin kondogolar-e, oroti irik tak ponok nggwe nak abu worak yidnak nggal kwatli-o.

⁹ Nde, it-nen-e: ’Nir-e enlem nin nap inmin kondogolar-e, nit nenmawi lak yusu-o’ luk iri nggal-e yebet kali bug-o. Iri kwarogolar-e, it-nen wolmomtag-e poro yusu-t nde, ir-e enaru buk worali-o.

¹⁰ Isarael nap inndi kek tak pili iri na nam-et yenggerak kagolar-e, it-nen meya kwatli iri bem-nen kali-o. Ereba nggal kwarogolar-et nde, ir-e an nogore na yigit lak yogolat, tuguruk it Enmbal Pem Nagawan, Nagawan Indo an neram na lobok yili bug-o.

¹¹ Isarael nab-e towe merepati num kum tak-nen loboklik mbitlik tenak worasu ereba na nggal loboklik mbitlik kwat tenak worali-o. It nap-nen-e nanduk nandug-e yongga unduwakluk Mesira nggi yak indiga-o. Nde, imbirig-e, Asiut nap endam mbiriga-o!

¹² Alat nde, an-nen-e ap-nen towe wuruwokluk abuwok towe wurugwi sum wigarak puruk tenakwi nggal, an-nen-e pempa it loboklik mbitlik yogola, tena onposolat woramin-o. It-nen meya kwarugwi iri bem-e an-nen angin worak enpem pimin-o.

¹³ It iri-ge an keya nibili bem-e mondok enare bili-o. It iri-ge an nimin wim mbatli bem-e mondok lak ma-o. An nindi-nen-e inmiri yurak perasola-t nde, it-nen an nerembel wanogolar-e, ennesiget onmbol nggwe nak-nen kwatli-o.

¹⁴ Ir-e ndemeret inndi-nen an neram tepan yili bug-o. Nde, it-nen nde tepan yuwoklug-e nene yugwi sa mbud luk-nen an nebem inndi angin tubu yugwi buk nap-nen kwarugwi nggal yip tili-o. Nde, it-nen nggandum mbato min anggut min wok unduwakluk tepan yogolar-e, kugwiwak erembel wanugwi nap-nen kwarugwi nggal enambik enaboro logwaril lobok yili-o. Iri kwarogolar-e, mondok an nimin-et ndemeret wim mbatli-o!

¹⁵ It iri-ge an-net nggok tak onposolat, enmawi rak posolat yigi-t nde, ir-e an nuruwokluk wene mbatli-o.

¹⁶ It iri-ge kugwiwak mondok amawi lak ereba na nde langgal luk mbererenak worali-o. It iri-ge san anggare labiyang tak nggal me, inndi enpem wat tak purag-e meya-o. It ennggendumu enne kulugwi nap ereba na-ge inndi kek tak pem yugwi ala karuk, it iri-ge yalawi bem unduwa-o. Mesira nap-nen nda ondogolat kwaruwa-o” luk yij-o.