OSEA 6 - Nanduk Ngget Tul Pidnak Wene

Isarael nap kwara kondok yigit lak yidnak wene 6:1–7:2

¹ Nde, it Isarael nap-nen yogolar-e: ”Yawo-ge tuguruk nden karuk Nagawan Indo eram mburuwog-o. At-net andi bandi rak ninpij-et nde, at-net ki rak nunpuwa-o. At-net mep tak ninpij-et nde, uj-e engga nggitlik nunpuwa-o.

² Nde, o mberen pem, lak, kenan pem, lak ya woragolar-e, at-nen ki rak nunpuwama, at indipma wulmul-o.

³ Iri bem-e, nir-e mondok ndemeret ndemeret Nagawan Indo nenaru yurak pem nenmawi kunduwog-o. Ndemeret Nagawan Indo nendam lobok yosolar-e, o kil poso nggal, o sumbat woraruk, nggaruksa talme nggok mbosolat nggweyak piri rak poso talme nggal irit nendam lobok yuwa-o” luk yiga-o.

⁴ Alat nde, Nagawan Indo-nen yosolar-e: ”Kit Isarael nap min Yewura nap min wa-e. Kit-nen an nabuwa kagwi-ge kuplila o age min lilangen min ndag-et nak lak yusu iri na nggal me, an-e kit kinmin-e ngge nggal kwarimin-o?

⁵ Iri bem-e mondok angin worak kenpem posolat, lak tak konposolat, yurak mbarigi wene yak kundurag-e an-nen-e an nene lomboksa yugwi nap inpil lobok yigi-o. Nde, kit-nen an kwat nuburak nindi perasu-ge mondok nam-et nak yur-o:

⁶ Nde, an namanggim wam wosa pogolat, an namanggim wam wosa kan pogolat kwatli-t nde, an mondok nindingen-e an mondok kwara kenaru yogolat, pempa nabuwa kagolat kwarurak irir-o.

⁷ Alat nde, kir-e Aram-nen kwarid nggal ’Irit kwarul-o’ luk owak mbara yak nirigep iri na ndak ndag-e kwarigit lak yigeb-o.

⁸ O siri Nggileat iri-ge meya kwarugwi nap min ap wurugwi nap min nak kobong tak worali-o.

⁹ Nde, tepan ombo o siri iri me woragwi nab-e ap nden unpugwi nap-nen ap iri nggwe mborogola nden unpurak tulabiyem pak tak ndok worak woragwi nggal-nen yili-o. O marak iri na me mburugwi tulabiyem Sikem-nen na ap ondogolat worali-o! Yi meya ndi meya ereba-ge inndi-net kwarogolat worali-o.

¹⁰ Nde, Isarael iri me-ge an-nen yik kasolar-e, mondok meya nggok misik kwarogola kasu-o. Nde, iri-ge an nilirag-e it ondomok kopkap tobok tak pogolar-e, kugwiwak erembel wanili-o.

¹¹ Yewura nap wa-e. Kit-nen kwatli bem-e an-nen angin worak kenpem purak tarem-e an-nen wat tak pigirik worasu-o” luk yij-o.