OSEA 5 - Nanduk Ngget Tul Pidnak Wene

¹ Nagawan Indo-nen yosolar-e: ”Kit tepan omborak wa-e. Kwara koler-o! Isarael nap wa-e. Kwara yebet ker-o! Kit nagawan-nen wigarak wa-e. Kwara koler-o! Angin worag-e mondok kenpem mbuma-o. Iri mberak puwa iri-ge ndemerer-e kit-nen ap enpem wene mbenarogolar-e, mot mor-et mbenarurag-et nde, kir-e Mispa iri me ap ngonok tak unpurak sabu logo nggal kwat yogolat, Tabot ndobo bem sabu logo nggal kwat yogolat,

² Sitim iri me mbun mondok yubuk tak iri na nggal kwat yili-o. Iri kwatli iri bem-e kit oboksa angin worak kenpem pimin-o.

³ Isarael nap wa-e. An-e kit-nen kwarugwi min kit-nen woragwi kenpage min mondok oboksa naru-o. An nerengen pem-e kit-nen kura burag-e mondok meya-nen yusu-o. Kir-e kugwiwak nak erembel wanogolat, tugup lak an nimin worali buk iri-nen ndowaga kit-nen an nerembel wanurag-e meya-o” luk yij-o.

Kugwiwak erembel wanuwa naru nggomo indidnak wene 5:4-7

⁴ Isarael nap-nen meya kwat tenak worali iri-nen ndowaga, it iri-ge tuguruk nden karuk Enmbal Pem Nagawan eram lobok yurak meya yusu-o. It iri-ge kugwiwak erembel wanugwi iri-nen inggiyapma rak inpidnak worali-o. Iri kwarak woragolat me, Nagawan Indo iri-ge no mende nggal tak ibili-o.

⁵ It enlem Isarael nap-nen inndi-n kek yili-ge mondok nam yosolar-e, it-nen lugudtak kwatli iri bem-et nam yusu-o. It-nen meya kwatli iri-nen ndowaga ir-e unuwok abis pijaksa mbud yogolar-e, Yewura nap min-et totno wosa mbili-o.

⁶ Ir-e Nagawan Indo kore yil mborogolar-e, at amanggim wosa puwokluk lomba min sapi min waruk mbitli-t nde, ereba oboksa-ge ebe lak mende kwat yusu-o. Nagawan Indo-ge ir-e mondok keya inpidnak me, it-nen-e Nagawan Indo-ge mondok kali bug-o.

⁷ Ir-e tugup lak Nagawan Indo-nen yidnak yidnak kwatli buk me, it inlirag-e at ilirag-e lag-o. Iri bem-e it iri-ge yanem-et eneyabu min-et mondok lak tak unpuwa-o.

Yewura nap min Isarael nap min wim mbaridnak wene 5:8-15

⁸ Nggibea-nen ene pu yer-o! Wim nggurak pem yenggerak puwakluk lel kagwi iri na Arama-nen ene lo rak per-o! Mbetel-nen wim nggurak pem kek kok per-o! Mbenyamin nap wa-e. Ndak wim timbiril mberer-o!

⁹ Isarael nap enpem wene mbarurak tarem-e wok ma me, Isarael nab-e mondok lak ma-o. Isarael nap wa-e. Kwara koler-o. Wene iri-ge kwar-et ma-o.

¹⁰ Nagawan Indo-nen yosolar-e: ”It Yewura nap enne kulugwi ereba na-nen-e Isarael nap inmin wim mbarogolat onnggweyak wanogola me, an-e nisilepma enpem pusu-o. Iri bem-e angin worak it enpem posolar-e, yi ebe nggal irit enpem mberak pimin-o.

¹¹ Nde, Isarael nab-e lel mberel inpili-o. Ndemeret it yongga undurag-e meya-t nde, yongga undurak pem mondok eyanggo lak lembesa nggi yogola karuk, onnggweyag-e innggem-nen waniga-o.

¹² Iri bem-e an-nen-e Isarael nab-e yigisa lak tak onposolat, Yewura nap min-et lak tak inpimin-o.

¹³ Nde, it enlem Isarael min Yewura min wat kerak mbogolat, indidnak ud ereba na mbel karug-e, Isarael nab-e Asiut nagawan kek tak-nen yongga unduwakluk yonggo Asiut mbiriga-o. Alat nde, Asiut nagawan iri-nen-e yongga na indigit lak, indidnak ud iri na ambut tak purag-e meya-o.

¹⁴ Singa ndakngge-nen enpem kore yoso nggal an-nen-e Isarael nap min Yewura nap min enpem kore yimin-o. An nondomok-net lebena keya unpuruk, keya inpimin-o. Nde, an-nen nde mberena wok unpuruk mborosola-ge, ap misiger-o luk mbi-nen-e an ninggem-nen ming unpuwa bug-o.

¹⁵ Nde, an nilirag-e mondok keya inpimin-et nde, it-nen meya kwaridnak iri na-nen ndowaga andi bandi kwarat karuk, eneyanggo wat luk, an nogore yogola-net wok inpimin-o. Nde, erep-nen-e it-nen andi bandi kagolat iri-net an nogore yuwa nde ma-o” luk yij-o.