OSEA 4 - Nanduk Ngget Tul Pidnak Wene

Nagawan Indo-nen: ”Isarael nap kir-e iri nggal kwatli-o” luk yak indidnak wene 4:1-3

¹ Nde, Nagawan Indo-ge o yu me woragwi nap enpem wene pusu-o. Isarael wa-e. At-nen yusu wene-ge kwara kuli-o. At-nen yosolar-e: ”O yu me-ge tugup lak yidnak yidnak kwarugwi elem min enabuwa kagwi elem min-e mondok lag-o. Iri-nen yu me woragwi nab-e an nimin-e ’Ar-e nit Nenmbal Pem Nagawan-net yusu-o’ luk para yili bug-o.

² Ir-e ’Irit mul-o’ luk owak mbatli-t nde, owak mbaridnak iri na ndak ndag-e kwatli bug-o. Ir-e ennesiget yogolat, ap worogolat, yariya wanogolat, mbabi kwarogolat, yi meya ndi meya kwarat kwarogolat, ap nak ebem lud lud wat tenak woragolat worali-o.

³ Iri bem-e o yu-ge amburu lak yosolat, yi mende ndi mende worasu-ge mondok wat ma-o. Urugup worak mende towe min nggweyak lok lok noso min yi koma arem woraso min oboksa wat ma-o” luk yij-o.

Nagawan Indo-nen: ”Tepan ombo kir-e iri nggal kwatli-o” luk yak indidnak wene 4:4-10

⁴ Nagawan Indo-nen yosolar-e: ”Kit tepan ombo wa-e. An-e kir-et meya-o luk yak kundusu me, an nilirak meya rak onpogolat, insilepma enpem pogolat yurak pug-o.

⁵ Kir-e kubu-nen lengge-nen meya nak kwat tenak worali-o. An nene lomboksa yugwi nap na iri nggal-et meya-t kwatli-o. Iri ala karuk, kiniya Isarael iri-ge lak tak pimin-o.

⁶ Tepan ombo kit-nen-e an-e no mende nggal kinsili rak nibili-o. Iri kwarogola-ge, an nilirak-nen na an-e no mende nggal tag-et nibili me, enlengenwak lak yili-o. Kir-e an-nen mul kindidnak wene mondok keya bili-o. Iri yogola karuk, an-nen na kir-e keya konposolat, kit kinlirak na an-nen-e an-nen idnak tepan ombo luk enperamin pug-o.

⁷ Nde, kit tepan ombo-ge kit kenpe kwarat yogolar-e, meya na kwarat an nimin kwatli-o. Iri bem-e kit-nen kek tak woragwi-ge an-nen teberak kunpumu, enlengenma nggal tak kunpuwa-o.

⁸ Kir-e an nilirak-nen meya kwarugwi bem yi mende ndi mende ombo yogolat me, kit-nen-e an nilirag-e meya nak kwat tenak wolmag-o luk perali-o.

⁹ Kit na an-nen-e kit-nen kwatli ndak ndag-et angin worak kenpem pumu, we nap-nen andi bandi kali nggal-et andi bandi kagolat woragub-o!

¹⁰ Kir-e pidnak mende ereba na nunggub-et nde, nere irit woragub-o. Kit-nen-e ap ijak worak onposo amburu worak kugwiwak ereba na erembel wanogolat woragub-et nde, kit kennggendumu ab-e kwarat ma bug-o. Iri kwaruwa iri-ge kir-e an-e abu keya nuburuk, kugwiwak ereba na erembel wanogolat worali iri bem-nen kwat ma-o” luk yij-o.

Nagawan Indo-nen kugwiwak erembel wanugwi nap ereba na enpem angin worak pidnak wene 4:11–5:3

¹¹ Nagawan Indo-nen yosolar-e: ”Nilirak wa-e. Anggut amburu pi mende-nen na irit, anggut amburu ngget-nen na irit, ereba-nen-e kinndi kona yebet kagwi kinndi-ge mondok mbereksa lak tak pusu-o.

¹² Nde, ir-e tu mirik kunpurak kore yogolar-e, e abare mbarak ereba na min wangun min yak kunduwakluk kin wok ibili-o! Kir-e kweyap-nen ununtak keya unpuruk, terak waring kagwi nggal, kir-e an keya nuburuk, kit kenpe-ge kegera kugwiwak ereba na wok tili-o.

¹³ Kugwiwak erembel wanugwi sa ndobo anggul pem min ndobo wolak pem min ereba na me-ge kir-e kugwiwak amanggim wosa pogolat, e engga angin lud tak ereba indipma-ge konak wesarak ala karuk, indipma emben konak mende kugwiwak amanggim kan pogolat kwatli-o. Alat nde, iri kwatli iri-nen ndowaga no kwat ma-o? Kinlirak kwami ndugum-nen terak waring kagolat, kinlirak onkwerak-nen na ap erep inmin mbabi kwarogolat yili-o.

¹⁴ Alat nde, an-nen-e it-nen kwatli iri bem-e angin worak enpem pimin pug-o. Iri kwatli iri-ge kit-nen na kugwiwak uwi ereba me yabu wanogolat, mbabi yugwi kweyap ereba na endam mborogolat, it inmin totno kugwiwak ereba na amanggim wam wosa kan pogolat kwatli iri bem-nen it enpem wene pimin pug-o. ’Mbal Pem Nagawan-nen yidnak wene kwara yebet kagwi buk enlem ereba-ge mondok lag-et ma-o’ luk yugwi na-ge ndemerer-o.

¹⁵ Isarael nap wa-e. Kir-e tugup lak an-nen yidnak yidnak kwatli bug-o! Alat nde, an-nen-e it enlem Yewura nab-e kit-nen lugud tak kwatli yeba nggal-e meya kwarigit lak mag-o luk perasu-o. Nggilnggal min Mbetel min ereba me-nen-e Nagawan Indo erembel wanogolat, iri me-nen na Nagawan Indo uruk nak woraso iri na unu bem-e owak mbarurak pug-o.

¹⁶ Isarael nap wa-e. Kir-e mondok wene kulugwi buk, keneyanggo lak-nen yili-o. An-e ngge sa-nen lomba tusuangge taroso sa worasu ereba nggal kit yeba-ge ndegel kinpimin-o?” luk yij-o.

¹⁷ Nde, Isarael nab-e kugwiwak-nen mbeyapngen enparik inndi ebem nambena keya bidnak me, it iri-ge keyap tak unpurag-o.

¹⁸ Ir-e anggut engen kwarat nuruk, inndi nden kaidnak me, mondok enalen pem mbabi kwaril nili-o. Ir-e it kek tak unpurak iri na-ge insili rak puruk, pesel unpurak irit indingen tak pili-o.

¹⁹ Iri kwatli bem-nen it iri-ge o wija-nen puk yaga lak tak poso nggal lak tak unpuwa-o. It-nen kugwiwak ereba na amanggim wam wosa kan pili iri bem-e it ereba-ge innggiri kujwa-o.