OSEA 3 - Nanduk Ngget Tul Pidnak Wene

Osea min ogwe terak noso iri na min onowene 3:1-5

¹ Nagawan Indo-nen yak norosolar-e: ”Kar-e tuguruk mburugundik, kwe mbabi yoso kwe misik wanurak kindi ebem pi-o. Isarael nap-nen an keya nuburuk, mbal pem nagawan nin ereba na erembel wanogolat, kismis engen pem konidnak oroti kugwiwak amanggim pogolat yili-t nde, an-nen-e Isarael nap enabuwa kasu nggal-et mbabi yoso kwe irit abuwa ki-o” luk yak nirij-o.

² Nde, an-nen-e perak tol lima belas min nggandum mbato angin-e 150 kilo min kwe iri onggo pigi-o.

³ An-nen kwe iri yak tosolar-e: ”Kar-e an yik neyarok kwarat woragun-o. Nde, an yik neyarok woralar-e, mondok terak yeba waring kagit lak yosolat, mbabi yigit lak irit wolmomtag-o. An-nen na kat kimin-e nene yimin pug-o” yak tigi-o.

⁴ Iri nggal-et kwasa Isarael nap na kwarat irit woragolar-e, nagawan na ennggendumu lak, it tu lit iniyudtak nap na lak, Nagawan Indo amanggim wosa pugwi na lak, erembel wanurak kerep sindik pigit lak, kugwiwak na lak, abok-nen kwat unpurak nam tak poso mende na lak irit wolma-o.

⁵ Alat nde, it enlem Isarael nap nden karuk, tuguruk Nagawan Indo Enmbal Pem Nagawan eram lobok yogolat, it-nen idnak nagawan Ndaut-nen wigarak iri na eram lobok yogolat yurak tarem-e wok ma-o. Iri lug-e, ir-e Nagawan Indo aye worak woragolat, kek tak pogolat woragolar-e, at-nen enpem puwa imbiringgat wanogolat wolma-o.