OSEA 2 - Nanduk Ngget Tul Pidnak Wene

¹ Iri bem-e kat-nen kat kelem Isarael nap unnu yosolar-e: ”Mbal Pem Nagawan ilirak, Nagawan Indo-nen kenabuwa kaso nap” luk unnu yurag-o.

Kwe Nggomet terak waring kaso iri-ge Isarael nap ut mimirik-nen yusu-o 2:2-13

² Nagawan Indo-nen yosolar-e: ”Nilirak wa-e. Kiniya iri-ge yawo-ge an nogwe-ge lag-o. Nde, an-e at un-e lag-o. At iri-ge tuguruk ap inmin mbabi yosolat, ap inmin terak waring kasolat kwaruwa naru, owene mbarer-o.

³ At-nen nde pempa-t mbabi kwat tenak worala-ge, nanduk ndesa mbid nggal-et ngenwa wolmakluk, usum yonggwara keya bimin-o. At iri-ge an-nen-e nggweyak lerak nggal amburu lak sa keya bimin-o. Iri rak pumu, yi nere-nen wat ma-o.

⁴ Kir-e terak noso kwe-nen nderak me, an-e kenabuwa kamin pug-o.

⁵ Kiniya-ge inggiri lak terak waring kaso-nen yusu-o. Nde, at-nen yosolar-e: ’An-e nindi kundik-nen nunggwi mende mak norogolat, yi wok norogolat, yurugwi sum wol min linen min-nen konidnak wok norogolat, saitun amburu min anggut amburu min wok nitli ereba na endam mbirimin-o’ luk yij-o.

⁶ Iri bem-e at iri-ge isile worak pem kut wosa keya bosolat, at urula-ge kerep leget wosa lerak pimin-o.

⁷ At iri-ge at indi kundik ereba na langgal unpuruk, muk iniyujwa-t nde, it endam-e wok ma bug-o. At-nen-e onkore yuwa-t nde, iniyujwa bug-o. Iri ala karuk, at-nen yosolar-e: ’Nandug-e nerem nun min-e yu nggal-e woraso buk, konag-et woraso yu na-t nde! Tuguruk nerem nun eram mbereyeg-a’ luk yuwa-o.

⁸ Kiniya-nen-e an-nen nggandum mbato wok tosolat, anggut engen amburu wok tosolat, saitun amburu wok tosolat, at-nen kugwi Mbaal erembel wanosolat-nen wanurak emas perak oboksa wok tosolat kwaroso ereba na-ge ’At-net wok nirij-o’ luk nam yoso bug-o.

⁹ Iri bem-e yagidnak mbarugwi tarem-nen an-nen wok tidnak mende nggandum min anggut min iri-nen sum wol min linen-nen konidnak sum min at-nen yuruwakluk wok tigi ereba na-ge tuguruk lit yaga wanimin-o.

¹⁰ At inmin nene yugwi nap ereba na inmbiri bem koro nderak ibimin-o. Iri kwarak obosola-ge, at inmin nene yugwi ereba na ennggendumu ap misik-nen mbi ninggem-nen imiri yuwa bug-o.

¹¹ An-nen-e at-nen nggok sagoso ereba na-ge oboksa lak tak pimin-o. Nde, arik tak mbena yosolar-e, olengen misik arem nggogolat, waneya misik arem nggogolat-nen nggok sagoso min we woragwi tarem yebet kasolat kwaroso min ereba kwarosolat-nen kwaroso mende oboksa ereba na-ge lak tak pimin-o.

¹² Kwe at indi-nen perasolar-e: ’Anggut elem min e ara elem min ereba-ge an-e inmin nene yugwi ereba ndegel onposo ereba bem onggo wok niridnag-o’ luk perasu mende an-nen-e ereba oboksa mondok lak tak pimin-o. An-nen nggwija pil ngguwamu, lak tak posolat, anggut yabu min e ara yabu min-e nden yaga wal nde kwarak posolat yimin-o.

¹³ At-nen yi tarem ndi tarem ereba na-ge kugwi Mbaal enmanggim nak emben konak mende kan perenak worasolat, inmin nene yoso nap ereba na langgal unpuruk mbururak pem nak imirik umuruk puruk langgal unpuruk mborosolat, ereba kwarurak nak nggok tak puruk an-e mondok abu abu meme rak noboso bem-e an-e angin worak mende ebem pimin-o. Nagawan Indo an-net yusu-o” luk yij-o.

Nagawan Indo-nen at ilirak enabuwa kaso wene 2:14-23

¹⁴ Nagawan Indo-nen yosolar-e: ”Iri bem-e at iri-ge an-nen nembaga waruk mbirimindik, indi yanggonosolat abuwa min-et wene yak timin-o.

¹⁵ At-nen idnak anggut eyabu ereba na-ge tuguruk wok timin-o. Anggun Panggun Woragwi Mbirik iri-ge inndi ebem wat tak woragwi tumende rak pimin-o. Iri me-nen undugum pem Mesira-nen wesera lobok yosolat wok nibid nggal-et wok nubuwa-o.

¹⁶ Iri yosolar-e, an nimin-e ’An-nen idnak Mbaal-o’ yoso iri na-ge keya buruk, an nimin-e ’An nun-o’ luk yuwa-o.

¹⁷ An-nen-e Mbaal unnu tuguruk yuwa naru, mondok imiri mbarak worasola, ap-nen-e Mbaal unnu-ge meme rak puwa-o.

¹⁸ Nde, iri tarem-e yi mende ndi mende eyak worak oboksa imin-e ’An nilirak sil iniyudtak pug-o’ luk imiri mbarak pimin-o. An-nen-e an nilirak woragwi sa-nen wim lak tak posolat, wim pugwi mende mingin mare oboksa inggi mbara wirik pimin-o. Iri rak unpuruk, yamuksa kona woragwi rak inpimin-o.

¹⁹ Isarael wa-e. Kar-e mondok an nogwe rak kibimin-o. Ndemeret nogwe pem irit woragun-o. An-e pem kabuwa kasolat, kebem nindi kundugu irit woramin-o. An-e tugup lak, mot mot nak kwat kobosolat woramin-o.

²⁰ ’Wok kibimin-o’ luk urul yak kirigi iri na ndak ndag-et wok kibimin-o. Kat-nen na an nimin-e ’Iri-ge an-nen idnak Nagawan Indo-net yusu-o’ luk yugun-o.

^21-22 Iri yugun tarem iri an nilirak Isarael nap-nen tepan yogola-ge, an-nen-e it-nen tepan yuwa-ge kulimin-er-o. Kulurug-e, an-nen mbal nggwe-nen talme mberak pil mbuwasola, nggandum mbato min anggut min saitun amburu min kwarat ma-o.

²³ An-nen-e nilirag-e it unuwi nggweyak pem unpumu, enalen pem irit wolma-o. Nde, it unnu yogolat ’Enabuwa kaso buk’ yugwi ereba na-ge an-nen enabuwa kaso-o luk mirik inpimin-o. Nde, it erep unnu yarogolat, ’At ilirag-e lak’ yugwi ereba na-ge ’Kir-e an nilirag-o’ yak indimin-o. Iri yosola, it-nen onggo yogolar-e: ’Kar-e nit Nenmbal Pem Nagawan-nen yusu-o’ luk yuwa-o” luk yij-o.