OSEA 14 - Nanduk Ngget Tul Pidnak Wene

¹ Samaria iri-ge an nimin wim mbarogolat, eyak witli iri bem-e angin worak enpem pimin-o. Iri me woragwi nab-e wim pem unduwa-o. Nde, li nggisiya-ge onowak mburuk waga lel eneyagolat, kweyap enabila-ge enmbe ngaril lobok yogolat ma-o” luk yij-o.

Osea-nen Isarael nap kondok yer-o luk enmengen mbaridnak wene 14:2-4

² Isarael nap wa-e. Kir-e tuguruk Nagawan Indo Kenmbal Pem Nagawan eram lobok yer-o. Kir-e meya kwatli ereba-nen ndowaga mboroksa mbud yili-o.

³ Nde, kir-e tuguruk Nagawan Indo eram mborogolat, tepan yu-ge at amanggim pugwi mende pidnak nggal tepan yer-o. Tepan yogolat-nen yogolar-e: ”Nagawan Indo wa-e. Nit-nen meya lugud tak kwarugwi-ge kamberam tak posolat, nit tepan yili-ge kuli-o. Iri yosola, nir-e nit-nen ’Iri nggal kwarul-o’ luk urul pige ndak ndag-et kat kerembel wanul-o.

⁴ Asiut nap-nen-e ninmiri yurag-e meya-o. Wim pugwi kura wam-nen ninmiri yurag-e meya-o. Nit-nen-e nininggi-nen ndak wiridnak ereba na yak togolat: ’Kir-e nit nenmbal pem nagawan-nen yili-o’ yili ereba na-ge mondok tuguruk yul pug-o. Nagawan Indo wa-e. Kat-nen-e ta-nen inmiri yurak nggal inndi kabak woragwi nab-e enabuwa kaso-nen yusu-o” luk tepan yer-o.

Nagawan Indo-nen: ”Kenpage mbena ngget tak pimin-o” luk urul yak indidnak wene 14:5-9

⁵ Nagawan Indo-nen yosolar-e: ”An nilirak lugud tak nggwe mbitli ereba na-ge tuguruk neram tak inpimin-o. It enabuwa mondok kwarat kamin-o. Tuguruk nisilepma inpimin pug-o.

⁶ Nde, talme-nen nggweyak umbuk amburu rak poso nggal an-e Isarael nap amburu rak onposo talme-nen yusu-o. Iri yosola-ge, ir-e engen kerengen isi wigak yoso nggal isi wigak yogolat, e libe emengen arem mberaboso nggal enmengen mberabogolat kwaruwa-o.

⁷ Nde, it iri-ge yak yoso mende isit pud arem mborosolat worasu ereba na nggal wigak yogolat, it enpage konag-e e saitun nggal woragolat, unpubu emben-e e libe ububu emben nggal-nen yusu-o.

⁸ It iri-ge tuguruk neram lobok yuwarik, an nindipma wolma-o. Ir-e nggandum ari nggal lagolat, anggut ari nggal wigak yogolar-e, anggut amburu Libanon woraso anggu obok mboroso nggal it enanggu onpog-e mburuwa-o.

⁹ Nde, Isarael nap-nen-e unkugwiwak ndak wosa pidnak mende ereba na-ge abu mbo buwa-o. An-nen-e it ndegel onposolat, it-nen tepan yuwa-ge an-nen-e enne kulimin-o. E angga pempa miri ludtak woraso nggal, an-nen nindipma rak onposolat woramin-o. An-e it inmbiringgat tak poso elem-net yusu-o. Nagawan Indo an-net yusu-o” luk yij-o.

¹⁰ Inndi nggat nggat worak nab-e yu me mbarak worasu wene yeba-ge enaru yogolat, kwara yebet kagolat kwaruwag-o. Nagawan Indo-nen ”Iri nggal kwarurag-o” luk yidnak wene tu mirik nonposo ereba-ge ndemeret wene-nen yusu-o. Nde, lud tak nak kwarugwi nab-e mirik nonposo wene ereba na ndak ndak kwarogolat worali-t nde, meya kwarugwi nab-e wene ereba na-ge nano nano rak pogolar-e, unuwok mboroksa mbud yili-o.