OSEA 13 - Nanduk Ngget Tul Pidnak Wene

Nggaruk tak posolat Isarael nap angin worak enpem purak mbaridnak wene 13:1–14:1

¹ Nde, nandug-e it enlem Eperaim iri-ge kek tak onpogolat, it enlem Eperaim iri-nen nde wene wirik pogola-ge, Isarael nap ennggendumu enlem erep ereba na-ge kwiye-nen tebek yugwi-t nde, enlem Eperaim iri na-ge kugwi Mbaal iri na erembel wanogolar-e, meya yiga-o. Iri bem-e it enlem iri-ge lak ma-o.

² Nde, yawo-nen na Eperaim nab-e meya nag-et kwat tenak worali-o. It-nen-e perak pem sapi ut mimirik irit erembel wanurak ndak witli-o. Iri ndak witli iri-ge ki nap inndi nggat nggat-nen ndak worogolat, ki nap ininggi-net ndak worak puruk, it-nen yogolar-e: ”Ndak worak pidnak mende yeba amanggim wam wosa purag-o!” luk yili-o. Ki nap-nen sapi marik ut memera ndak wiridnak iri na-ge erabengen porok nili iri-ge kwarugwi bug-et kwatli-o!

³ Iri kwatli iri bem-e it ap iri na-ge o age min lilangen min kuplila lak yoso nggal mondok lak ma-o. It iri-ge nggandum mbato aboro mbilarugwi sa-nen nggandum abaral o wija-nen puk kuruk mboroso nggal ap ereba-ge lak ma-o. Kule uru nggwe-nen kule mboroso luk, lak yoso nggal lak ma-o.

⁴ Nagawan Indo-nen yosolar-e: ”An-e Nagawan Indo, Kenmbal Pem Nagawan Mesira-nen wok kunpuruk lobok yigi iri na-nen yusu-o. Kit Kenmbal Pem Nagawan-e nin mbi worasu-ge lag-o. An nak worasu-o. Kinmiri yoso-ge an narig-et nak worasu-o.

⁵ Nggweyak amburu lak sa nembaga ereba-net an-e kir-e ndegel konposolat woragi-o.

⁶ Alat nde, kir-e o konak ma woragolat, yi mende ndi mende ndak kinmbitsa woragolar-e, kir-e kinndi kek yogolat, an-e meme rak nibigeb-o.

⁷ Iri bem-e singa-nen at naso mende yomndoso nggal yemen kinpimin-o. Ndakngge masan tutul-nen tulabiyem pak toso nggal kenabuwok tulabiyem pak timin-o.

⁸ An-nen-e mberuang ndakngge-nen amarik lak yosoma-nen kwaroso nggal kit kenpem mbud yimindik, leben kinpimin-o. Singa ndakngge-nen kwaroso nggal, woragup sa iri na me-net nok kinpimin-o. Isilepma worak ndakngge-nen kwaroso nggal lebena liring keneyamin-o.

⁹ Kenlem Isarael nap wa-e. An-nen-e kir-e yigisa lak tak kinpimin-o. Iri kwat konposola-ge, ta-nen yongga kunduwa-o?

¹⁰ Kit-nen-e nagawan min enne kulugwi nap min wok kunduwakluk nggi yigeb-et nde, it ereba oboksa-ge yawo-ge ngge me worali-o? It-nen-e kit kenlen nab-e ndak inmiri yuwa-a?

¹¹ An-nen nagawan wok kondosolar-e, nisilepma min-et wok kunduruk, mondok nisilepma kwiye worak pem-et tuguruk kendam-nen lit eneyaso-o” luk yij-o.

¹² Nagawan Indo-nen yosolar-e: ”Isarael nap-nen meya kwarugwi min lugud tak kwarugwi min-e engga bem mbatluk, ndok worak pigirik worasu-o.

¹³ Nde, Isarael-e ndag-et at uruk wolmomtak worasola-t nde, ar-e wid me, at-nen nanongga-nen-o luk ereya na bem-et kwarigit lag-o. Isarael iri-ge li nggisiya iniya arem-nen ndesa mburak tarem panggosa wok yidnag-et nde, ija arem-nen wurungsa mburak larok yoso nggal-nen yusu-o.

¹⁴ It enlem yu-ge wat yugwi elem ininggiyapma-nen inmiri yimin pug-o. Wat yugwi elem wa-e. Kat-nen idnak wat momtak kugwi-ge wigari-o! Kat keyabu yigisa lak tak poso iri na mondok wanosolat wolmin-o! An-e it enlem yu-ge tuguruk enabuwa yimin pug-o.

¹⁵ Isarael-e enalen pem ndak nak tusuangge miri nggal wolma-t nde, mo luwaso nggwe (timur) nembaga nggwe-nen o wija embem worak pil lobok yumu-ge, yi ulusu min yi emnde mbaridnak min oboksa eberek tak puwa-o. Iri yosolar-e, yi mende ndi mende mondok onggo nggok pugwi ereba na-ge oboksa lak ma-o.