OSEA 11 - Nanduk Ngget Tul Pidnak Wene

Nagawan Indo-nen at ilirak at imin eyak wurugwi iri na enabuwa kaso wene 11:1-11

¹ Nagawan Indo-nen yosolar-e: ”Isarael-e marik pem-net an-nen abuwa kaso-o. Nambara iri-ge wene mbo uburuk, Mesira-nen lesa pil lobok yukmu-o.

² Alat nde, an nambara iri-ge wene mbo obosola-t nde, ar-e nuruk nuruk nde mborosolat woraso-o. Nde, ar-e kugi Mbaal amanggim wam wosa kan posolat, kugwiwak erep ereba na amanggim emben konak mende kan posolat woraso-o.

³ Isarael nap ereba-ge an-net tula mburugwi mirik inpigi-o. An-net enabuwa-nen kambok indigi-t nde, it-nen-e: ’At-nen ndegel nunpusu-o’ luk perali bug-o.

⁴ An-e enabuwa kwarat kasolat-net waga an neram tak inpigi-o. An-e kamboksa nindi kumburak ma rak onposolat, nindingen min-et nunggwi mende mak indigi-o.

⁵ Nde, Isarael nab-e tuguruk an neram lobok yurak insili yili me, mondok tuguruk Mesira mbururag-o. Iri yogola, Asiut nap-nen tena unpuruk wolma-o.

⁶ Wim iri na nggog-et yosolar-e, it unuwi silmu nggosolar-e, pak tumende ereba na meya rak pogolat, an nilirak ondogolat kwaruwa-o. Nde, iri kwat unpuwa iri-ge ir-e ondomok inndi-n pidnak nak kwatli ereba na bem-nen kwat unpuwa-o.

⁷ Ir-e mondok an keya nuburak lembe yili-o. Ir-e anggun panggun tak onpogola, ’Yongga nundurag-o’ luk enne mbo yuwa-t nde, ap mbi-nen yongga unduwa bug-o” luk yij-o.

⁸ Nagawan Indo-nen yosolar-e: ”Isarael wa-e. An-nen-e meme rak kobosolat, keya kobosolat kwarurag-e meya-o. Atma iri na lak tak pigi nggal lak tak kibimin-a? Semboim kwat ibigi nggal kwat kibimin-a? An-e kat kabuwa-ge mondok kwarat kasolat me, iri nggal-e mondok kwat kibimin pug-o!

⁹ An-nen-e nisilepma bem kebem angin worak mberak pimin pug-o. Mondok tuguruk yigisa lak tak kibimin pug-o. An-e nggweyakma nab-e lag-o. An-e Mbal Pem Nagawan-net yusu-o. Marak an-e kat kimin-et woralat, tuguruk nisilepma kebem pimin pug-o” luk yij-o.

¹⁰ Nagawan Indo-nen yosolar-e: ”An-nen singa ndakngge-nen kwaroso nggal nurum ene ngol yosolat it unuwim nap kwiye rak onposola-ge, an nilirag-e an nimbirig-et mburuwa-o. An nilirag-e mo mboso (barat) nggwe-nen an nerembel wanurak pem ndag-et ndag-et lobok yuwa-o.

¹¹ Ir-e towe nggal ndag-et nak Mesira nggwe-nen lobok yuwa-o. Iri-nen Asiut nggwe-nen towe merepati nggal ndag-et lobok yuwa-o. Nde, lobok yogola-ge, an-nen-e wok unpuruk, tuguruk enma inpil mbirimin-o. Nagawan Indo an-net yusu-o” luk yij-o. 11:12–12:15 Pasal ya arem-e Nagawan Indo-nen-e at ilirak enpem wene mbarosolat, enpem angin worak posolat wolmomtak wene mbarak worasu-o.