OSEA 1 - Nanduk Ngget Tul Pidnak Wene

Osea

¹ Nde, Yewura-ge nagawan nagawan Usia min Yotam min Agas min Isikia min it iri-nen o tenakwi komo woragola tarem, nde, Isarael-e nagawan Yoas ambara Yerobeam-nen tena unpuruk worala tarem-e Nagawan Indo-nen Mberi ambara Osea ebem pidnak wene-ge yu-o.

Osea ogwe min ilirak min onowene 1:2-9

² Mondok mondog-et Nagawan Indo-nen Isarael nap wene yak ondosolar-e, an nemndam tak pij-o. Nagawan Indo-nen yosolar-e: ”Osea wa-e. Kar-e mburugundik, ap inmin terak noso kwe misik wani-o. Kilirak na iniya nggal nag-et kwat ma-o. Nde, an nilirak Isarael nab-e kat kogwe iri nggal nag-et kwarogolar-e, an nimin tugup lak woragit lak, keya nibili-o” luk yij-o.

³ Yosoloma, an-e Ndiplaim ara kwe unu-ge Nggomet iri na wanigi-o. Wanuruk, nenla manggiya ap misik ndaige-o.

⁴ Nde, Nagawan Indo-nen yak norosolar-e: ”Yisiriel iri me-nen at ombo Yeu-nen ap indidnak pem an-nen-e yanem-et Isarael nap nagawan iri-ge angin worak ebem posolat, Yeu-nen wigarak-nen Isarael tena woragwi iri na lak tak posolat kwarimin me, kambara iri unu-ge ’Yisiriel’ yari-o.

⁵ Nde, iri tarem-e Yisiriel Mbirikmu-nen Isarael nap san ombo-nen enmawi yugwi ensan min enmare min-e kala yigisa ligik pimin-o” luk yak nirij-o.

⁶ Iri luk, imbirig-e, an nogwe iri na-ge la kwe misik ndagij-o. Iri yosola, Nagawan Indo-nen yosolar-e: ”Osea wa-e. An-nen-e Isarael nab-e enabuwa kagit lak yosolat, it meya yidnag-e mondok nemberam tak pigit lak yosolat yimin me, kara iri unu-ge ’Abuwa kagwi buk’ yari-o.

⁷ Alat nde, it enlem Yewura nab-e enabuwa kamin-o. Nagawan Indo it Enmbal Pem Nagawan an-nen inmiri yimin iri-ge it inmiri wim mbarosolat, yalawi bem-nen san pem-nen kura wam pem-nen kura wam ombol pem koreluk mburugwi nap enpem-nen inmiri yimin-e lag-o” luk yij-o.

⁸ Nde, nenara iri na kamo mbarak purug-e, nogwe iri na-ge abila yuruk, liap misik ndagij-o.

⁹ Nagawan Indo-nen an yak norosolar-e: ”Isarael nab-e an nilirag-e lak. An na it Enmbal Pem Nagawan-e lak me, la iri unu-ge ’An nilirag-e lak’ yari-o” yak nirij-o.

Isarael nap tuguruk nanduk-nen woragwi nggal tak unpurak wene 1:10–2:1

¹⁰ Nde, Isarael nab-e sisiri nggal kwat yogolar-e, ndak worogolat, wonarogolat yurag-e meya irit ma-o. Nde, yawo Mbal Pem Nagawan-nen it yak ondosolar-e: ”Kir-e an nilirag-e lag-o” luk yak undusu-o. Alat nde, abok at-nen yosolat: ”An-e kit Kenmbal Pem Nagawan nuruk nak woraso-nen yusu-o. Nde, kir-e an nilirak-nen yili-o” luk yurak tarem-e wok ma-o.

¹¹ Nde, enlem Yewura min enlem Isarael min-e tuguruk misiget tak unpuwa-o. It-nen-e ennggendumu nagawan misiget nak mendak puruk, ir-e enmawi yogolat, it unuwi nggweyak pem-e tuguruk kona yamuksa irit wolma-o. Nde, ndemeret hari Yisiriel iri-ge mondok nggok irit yebet kagwi kwat ma-o!