OROMA 9 - Nanduk Ngget Tul Pidnak Wene

Mbal Pem Nagawan-nen Isarael nap len inpidnak wene 9:1-18

¹ An-e Kerisut arengge me, an-nen yak kundusu wene yu-ge ndemeret yak kundusu-o. Nenesiget yusu-ge lag-o. Konak Indi-nen an nindi mul tosola, an narem yebet kaso iri-nen-e: ”Kar-e ndemeret wene nak yusu-o” luk yak nurusu-o.

² An nowe nowosi, an nelem nap iri enabuwa-nen an nindi puru pera kwarat luk, pempa pempa nindi puru rak worasu-o.

³ An nelem nap iri enabuwa-nen it enmanggim-e an-nen perasolar-e: ”An-e imbiri lamut tak nuburuk, Kerisut eram-nen arik tak nebeleb-o!” luk peraso-o.

⁴ Nde, it Isarael nap iri na-ge Mbal Pem Nagawan-nen len inpidnak nap-nen yili-o. It iri-ge Mbal Pem Nagawan-nen at ilirak tak unpuruk, at unu kek tak nggal unnu kek tak pij-o. It inmin-e: ”Iri nggal kwat kinpimin-o” yosolat, imiri mbarak pidnak wene na wok ondosolat, mot mot nak Mbal Pem Nagawan erembel wanurak elem mirik onposolat, Mbal Pem Nagawan urul yak indidnak wene na it-nen wanogolat yiga-o.

⁵ Isarael nap na-ge na nenlawingga-nen wigarak-net yili-o. Kerisut abage nggweyak ma nap en-page worak iri-ge it Isarael nap-nen wigarak-net yusu-o. Nde, yi mende ndi mende oboksa ombol pem kek tak woraso Mbal Pem Nagawan na-ge unu kek tak woralik nalik irit wolmag-o. Amen.

⁶ Alat nde, Mbal Pem Nagawan-nen urul pidnak wene-ge kwarigit lak ma-o luk yusu-ge lag-o. Nde, Isarael-nen wigarak lolo iri oboksa-ge Mbal Pem Nagawan-nen len inpidnak nap nak-nen yili-ge lag-o.

⁷ Nde, Mbal Pem Nagawan-nen Abaram yak tosolar-e: ”Isak-nen ndaguwa lolo iri nak kat-nen wigarag-o” luk yak tidnak me, Abaram-nen wigarak na rit oboksa Mbal Pem Nagawan ilirak-nen yili-ge lag-o.

⁸ Iri yak tid iri-ge, we ndet inpidnak iri bem Mbal Pem Nagawan ilirak yurag-e lag-o. Are, Mbal Pem Nagawan urul pidnak wene bem ndet inpidnak perak nde, ndemeret Mbal Pem Nagawan ilirak-nen yili-o luk yurag-o.

⁹ Nde, Mbal Pem Nagawan-nen urul posolat-nen yosolar-e: ”Iri tarem-o luk lud tak pidnak tarem an-e tuguruk lobok yimindig-e, Sara-nen ambara mbi ndaguwa-o” luk urul pid nar-o.

¹⁰ Alat nde, iri nag-e lag-o. Iribeka-nen li ap kambara ndagaid na-ge nenlawingga ineid Isak nak-nen ndagaij-o.

^11-12 Li ap ereya ndesa na mbigit lak ma, it-nen-e konak min meya min mondok kwarigit lak ma-net Mbal Pem Nagawan-nen it iniya yak tosolar-e: ”Owe-ge owot ndegel oboso nab-et ma-o” luk yak tij-o. Iri yid iri-ge yu bem-nen yij-o. Mbal Pem Nagawan-nen ap len onposolar-e, it-nen kwarugwi bem len onposo-ge lag-o, Are, Mbal Pem Nagawan at indi-n pidnak pem-et ap wene mbo unpuruk, len onposo-o.

¹³ Mbal Pem Nagawan engga mbarak pem-nen yosolar-e: ”Yakub-e nindingen tak pigi-t nde, Esau-ge nisili rak pigi-o” luk yij-o.

¹⁴ Iri yidnak ala-ge, nir-e no nde yul-o? Mbal Pem Nagawan-e mot mot kwaroso buk-nen-o yul-a? Mondok lag-o.

¹⁵ Nde, Mbal Pem Nagawan-nen Musa yak tosolar-e: ”An-nen unpud kamin nap iri-ge an-nen unpud kudtak peramin iri na-t unpud kamin-o. Nde, an-nen imin konak yimin nap iri-ge an-nen imin konak yurak peramin iri na-t imin konak yimin-o” luk yak tij-o.

¹⁶ Nde, iri kwaroso iri-ge ap inndi-n pidnak pem-nen na, ap-nen kwaridnak pem-nen kwaroso-ge lag-o. Are, Mbal Pem Nagawan-nen unpud kaso elem pem-net kwaroso-o.

¹⁷ Mbal Pem Nagawan engga mbarak pem at-nen Pireon yak tosolar-e: ”An-nen mendak kibigi yu-ge an namawi kat kebem-nen nam tak posolat, an nunu yi wi ndi wi wigarak posolat yonokluk-nen mendak kubukmu-o” luk yij-o.

¹⁸ Iri ala-ge, Mbal Pem Nagawan indi-n peraidnak pem-net ap unpud kasolat, at indi-n peraidnak pem-net ap inndi amawi rak posolat yoso-o.

Mbal Pem Nagawan-e isilepma yosolat, ap unpud kasolat yoso wene 9:19-29

¹⁹ Iri bem, kit-nen na yak norogolar-e: ”Iri ala-ge, Mbal Pem Nagawan indi-n pidnag-e ap-nen lak tak purag-e meya me, Mbal Pem Nagawan-e noluk-nen ’Kit meya kwatli-o’ luk nit nenpem wene mbarusu-o?” luk yak nurugub-o.

²⁰ Alat nde, naptak wa-e. Kir-e Mbal Pem Nagawan imin eyak wururag-e ndag-a? Nde, nggweyak yimbe-nen at ndak worak ibid nap na yak tosolar-e: ”Kar-e noluk-nen yu nggal ndak wat nibigen-o?” luk yak turag-e ndag-a?

²¹ Nggweyak yimbe konoso nap-nen-e ndangen nggweyak iri-ge at indi-n puruk nak-nen konoso-o. Nggweyak lubarak misik-nen-e yimbe mberen konosolar-e, misig-e yimbe konak irit konosolat, nde, misig-e we meya nggal konoso nar-o.

²² Nde, iri nggal-et Mbal Pem Nagawan-nen kwaroso-o. At isilepma-ge nam tak posolat, at amawi na mirik onposolat eyekluk yij-et nde, at isilepma rak pili nab-e lak tak enpeyekluk lid lud tak pij-et nde, it inmin-e indi luruk puruk woragaij-o.

²³ Nde, Mbal Pem Nagawan-nen nunpud kaso nap, nunnu kek tak purak pem len inpidnak nap nit mirik nenpeyekluk yosola-ge, at nunpud kaso elem iri nggilara nenpem pil mbuwasola-ge, nit-nen yi lik ndi lik yurag-e meya-o.

²⁴ Nde, at-nen yonggo ninpid iri-ge Yawuri nap ennggendumu nak-nen-e lag-o. Enlem nin nap ennggendumu-nen na yonggo-t ninpij-o.

²⁵ Mbal Pem Nagawan ene lomboksa yoso nap Osea-nen mbaridnak engga arem-e Mbal Pem Nagawan-nen yosolar-e: ”An nelem nab-e lag-et nde, ’An nelem nab-o’ luk yak indimin-o. An-nen unpud kaso buk nab-et nde, ’Unpud kaso nab-o’ luk yimin-o.

²⁶ Nde, ’Kir-e an nelem nap-nen yili-ge lag-o’ yak indidnak sa iri me-nen-e ’Kir-e urug-et woraso Mbal Pem Nagawan ilirak-nen yili-o’ luk yak unduwa-o” yij-o.

²⁷ Nde, Yesaya-nen Isarael nap onowene ene amawi min yosolar-e: ”Isarael nap iri-ge yi sisiri nggal kwarar-et nde, marig-et nak nde inmiri yaga wok unduwa-o.

²⁸ Iri yuwa iri-ge Nagawan Indo-nen-e nggweyak ma nap pidsa enpem ndag-et nak wene at-nen yid iri ndak ndag-et mbaruwa-o” luk yij-o.

²⁹ Nde, abuwok ma-net Yesaya-nen yosolar-e: ”Wim Wari Nagawan Indo-nen nit-nen wigarak lolo erep nit nondolma keya inpigit lak yid nggal-e, Sorom min Nggomora min kwat inpid nggal, nit na kwat nenpeleb-o” luk yij-o.

Isarael nap-nen aid wene keya biga wene 9:30–10:4

³⁰ Iri ala-ge, nir-e no nde yul-o? Yu nggal yuwog-o. Enlem nin nap iri-ge lud tak nak kwarugwi elem-e langgal luk mbirigit lak yiga-t nde, it inndi angin tubu yidnak pem-e Mbal Pem Nagawan imin-e lud tak nak inpij-o.

³¹ Alat nde, Isarael nap-nen-e imiri mbarak pidnak wene langgal luk mborogolar-e, lud tak nak nunpuwa-o luk peraiga-t nde, lud tak nak inpigir-e lag-o.

³² Ngge bem-nen lud tak inpigit lag-o? Iri-ge it-nen inndi Mbal Pem Nagawan ebem angin tubu yigit lak-nen it-nen kwaridnak pem-e lud tak nak unpuwa-o peraiga bem-nen lud tak nak inpigit lag-o, Unuwok pijaksa mbugwi kerep iri na bem pijaksa mbiga-o.

³³ Kerep iri wene-ge Mbal Pem Nagawan engga bem-e yu nggal mbarak worasu-o: ”Kwara yebet ker-o. O Sion iri me-ge ap unuwok abis pijaksa mburak kerep an-nen pusu-o. Kerep nggulok na bem-e ab-e pijaksa mbud yuwa-o. Alat nde, kerep na ebem inndi angin tubu yuwa nab-e abog-e innggiri wuruwa bug-o” luk yij-o.