OROMA 8 - Nanduk Ngget Tul Pidnak Wene

Konak Indi enarem worasola-nen kwarugwi wene 8:1-17

¹ Iri yidnak pem-e yawo-ge Kerisut Yesus imin kwin yidnak nap nenpem wene mbi mbaruwa bug-o.

² Kir-e Kerisut Yesus imin kundik woragolat kunlug-et wolmomtak elem wok kindid Mbal Pem Nagawan Indi-nen pidnak imiri mbarak pidnak wene-nen-e meya kwarugwi elem min wat yugwi elem min inggiyem-nen weserak kinpij-o.

³ Nde, ki nap enpage ndeyak me, imiri mbarak pidnak wene-nen kwarurag-e meya agaid iri-ge Mbal Pem Nagawan-net kwarij-o. Kwarosolar-e, meya kwarugwi elem lak tak puwakluk, at ambik Ambara ibil lobok yosolar-e, meya kwarugwi nap enaboro worak irit ibil lobok yid iri-nen-e meya kwarugwi elem ki nap enarem worasu iri na urugwe nggwe rak pij-o.

⁴ Mbal Pem Nagawan-nen iri kwarid iri-ge nit ki nap-nen kwarugwi mende kwarigit lak, are, Mbal Pem Nagawan Indi-n pidnak nak kwarugwi nap nit-nen kwarogolat wolmakluk lud tak nak yoso imiri mbarak pidnak wene iri na nit ninndi arem kwat makluk-nen iri kwarij-o.

⁵ Ki nap-nen kwarugwi mende bem worali nap-nen yebet kagolar-e, ki nap-nen kwarugwi mende nak yebet kali-o. Nde, Konak Indi-nen kwaroso mende bem worali nap-nen yebet kagolar-e, Konak Indi-nen kwaroso mende-t yebet kali-o.

⁶ Ki nap-nen kwarugwi mende-t yebet kali iri-ge wat yugwi-nen yusu-o. Nde, Konak Indi-nen kwaroso mende-t yebet kali iri-ge unlug-et woragwi elem min yamuksa woragwi elem min-nen yusu-o.

⁷ Nde, ki nap-nen kwarugwi mende-t yebet kasu nab-e Mbal Pem Nagawan-nen imiri mbarak pidnak wene-nen yidnak yidnak kwaroso buk me, Mbal Pem Nagawan imin sirid nap-net yusu-o. Nde, ndemeret ar-e Mbal Pem Nagawan-nen imiri mbarak pidnak wene-nen yidnak yidnak kwarurag-e meyar-o.

⁸ Ki nap-nen kwarugwi mende nak kwatli nab-e Mbal Pem Nagawan-nen wok unpurag-e meya-o.

⁹ Alat nde, kir-e ki nap-nen kwarugwi mende bem worali-ge lag-o. Konak Indi ndemeret kit kenarem worala-ge, kri-e Konak Indi arem-e worali-o. Nde, Kerisut Indi wanigit lak nab-e Kerisut arengge-ge lag-o.

¹⁰ Alat nde, Kerisut nde kit kenarem worala-ge, kit kenpe-ge meya kwarugwi me, wat yugub-et nde, kir-e Mbal Pem Nagawan imin lud tak nak kinpidnak me, Konak Indi-nen kinndi uruk tak pidnak worasu-o.

¹¹ Wat yidnak nap ennggendumu-nen Yesus uruk tak pid Indi iri na nde kit kenarem worala-ge, Kerisut Yesus wat yidnak nap ennggendumu-nen uruk tak pid nap at-nen-e kit kenpe wat momtak iri na irit uruk tak puwa-o. Iri kwat kunpuwa iri-ge at Indi kit kenarem worasu iri bem-net kwat kunpuwa-o.

¹² Iri bem-e nowe nowosi wa-e. Nit nenpem pidnak wene mbi worasu-o. Alat nde, nenpem pidnak wene iri-ge ki nap-nen kwarugwi mende kwaruwakluk nenpem pidnag-e lag-o.

¹³ Kir-e ki nap-nen kwarugwi mende nak kwarugup nde ala-ge, wat yugub-o. Alat nde, Konak Indi bem-nen kit kenpe-nen kwarugwi mende worak pugup nde ala-ge, kunlug-et woragub-o.

¹⁴ Nde, Mbal Pem Nagawan Indi-nen ndemil unpuruk waring kaso nab-e Mbal Pem Nagawan ilirak-nen yili-o.

¹⁵ Mbal Pem Nagawan-nen wok kindidnak Indi iri-nen-e ndegel ubugwi nap tak kunpuruk, kwiye yugwi nap tak kunpusu bug-o. Are, Konak Indi iri-nen-e Mbal Pem Nagawan ilirak tak konposolat, Konak Indi iri amawi bem nit-nen wene mbo bogolar-e: ”Neid wa-e! Kar-e an Neid-nen yusu-o!” luk yili-o.

¹⁶ Mbal Pem Nagawan Indi-ge nit ninndi imin kundik woralat-nen mirik nonposolar-e: ”Kir-e Mbal Pem Nagawan ilirak-net yili-o” luk yusu-o.

¹⁷ Nde, nir-e at ilirak nde ala-ge, Mbal Pem Nagawan-nen at ilirak tembesa wok undurak lid lud tak pidnak mende iri-ge nit na winde mul-o. Nde, Mbal Pem Nagawan-nen Kerisut wok turak lid lud tak pidnak mende na nit na at totno winde mul-o. Nde, Kerisut yane worosola, at totno yane wurul nde ala-ge, at unu kek tak posolar-e, nit na irit totno nunnu kek tak puwa-o.

Abok pem-et kek tak wolmomtak wene 8:18-30

¹⁸ Nde, an nindi-n perasolar-e, nit yawo andi bandi kali iri-ge marig-o. Nde, abok-nen mirik nunpuwa abinal iri min ndak ndag-e lag-o. Terak minik-net yusu-o.

¹⁹ Ndak worak inpidnak mende oboksa-nen-e: ”Mbal Pem Nagawan ilirag-e mepme-n nam tak unpuwa-o!” luk yik karok inndi mbung mbung tak worali-o.

²⁰ Ndak worak inpidnak mende iri-ge ebe lak mende makluk, keya bij-o. It inndi-n pidnak pem ebe lak mende yusu-ge lag-o. Are, Mbal Pem Nagawan indi-n pidnak pem-ner-o. Iri rak inpidnag-et nde, it enmanggim inndi mbung mbung tak wolmomtak wene yu worasu-o:

²¹ Misik tarem-e ndak worak inpidnak mende-ge lak tak unpurak amawi ndegel ubugwi inggem-nen mengga keya onposola-ge, Mbal Pem Nagawan ilirak inmin totno wisirik unpuruk kek tak unpuwa-o.

²² Ndak worak inpidnak mende oboksa-ge kwami-nen li ndaguwokluk yane wurugwi nggal, iri nggal nanduk-net yawo kuri yane wat tenak worali-o luk nir-e nenaru-o.

²³ Alat nde, ndak worak inpidnak mende it nak yane witli-ge lag-o. Nit-nen na ninndi arem-nen yane witli-o. Nde, Mbal Pem Nagawan-nen nandug-et we wok nindid Konak Indi wanige nap nir-e nenpe ebis-et weserak nunpuruk, Mbal Pem Nagawan ilirak tak nunpuwakluk yik karok woragolar-e, yane witli-o.

²⁴ Nit ninndi mbung mbung tak woraidnak pem ninmiri yij-et nde, kaidnag-et nde, inndi mbung mbung tak woragwi iri-ge inndi mbung mbung tak woragwi-ge lag-o. Ta-nen kaidnak mende bem indi mbung mbung tak woraso-o?

²⁵ Alat nde, nenlengen-nen kagit lak mende bem ninndi mbung mbung tak woragolar-e, ninndi luruk puruk, yik karok woragwi-o.

²⁶ Iri nggal, nit ndeyak woragola-ge, Konak Indi na lobok luk yongga nondoso-o. Nir-e tepan mot mot yurak nenaru buk woragola-ge, Konak Indi at-net nit nenmanggim Mbal Pem Nagawan emengen mbarosolar-e, mondok kiri keresa mbaroso me, ap-nen wene yurag-e meya-o.

²⁷ Nde, nggweyak ma nap inndi lombot poso Mbal Pem Nagawan-nen-e Konak Indi-n peraidnak iri-ge aru yusu-o. Konak Indi-nen len inpidnak nap nenmanggim Mbal Pem Nagawan emengen mbarosolar-e, Mbal Pem Nagawan indi-n pidnak ndak ndak irit emengen mbaroso-o.

²⁸ Mbal Pem Nagawan abuwa kagwi nap, at indi-n pidnak kwaruwakluk yonggo ninpidnak nap nenmanggim-e Mbal Pem Nagawan-nen yi mende ndi mende oboksa kwat nonposolar-e, nit konak nak kwat nenpeyekluk yusu-o luk nenaru yili-o.

²⁹ Nanduk-net Mbal Pem Nagawan-nen it len inpid iri-ge at Ambara Yesus Kerisut abage nggal kwat mag-o luk obi-net lud tak pid iri bem-nen at anggamirak kwarat ennggendumu at Ambara na manggu nderak makluk len inpij-o.

³⁰ Nde, nanduk-net len inpidnak nap iri na-t Mbal Pem Nagawan-nen yonggo inpij-o. Nde, yonggo inpidnak nap iri na-t lud tak nak inpij-o. Lud tak nak inpidnak nap iri na-t kek tak inpij-o.

Yesus Kerisut ebem Mbal Pem Nagawan-nen ap enabuwa kaso wene 8:31-39

³¹ Iri bem-e, nir-e no nde yul-o? Mbal Pem Nagawan-e nit ninmin worasola-ge, ta-nen nde nit sil niniyujwa-o?

³² At ambik Ambara abuwa kagit lak, nit pidsa nenmanggim iminep wisirik pamu-o. Nde, at Ambara-t nde, wok nendarik me, yi mende ndi mende pidsa wok nundurak iri-ge nggog-a?

³³ Mbal Pem Nagawan-nen len ninpidnak nap nir-e ta-nen nonpok puwa-o? Mbal Pem Nagawan-nen lud tak nak ninpidnak me,

³⁴ ta-nen nenpem wene mbaruwa-o? Kerisut Yesus na wat yij-et nde, uruk tak pamu, Mbal Pem Nagawan inggi kigit nggwe woralar-e, nit nenmanggim Mbal Pem Nagawan emengen mbal tenak worasu-o.

³⁵ Kerisut-nen nit nenabuwa kaso iri na arem woragola-ge, ta-nen kuri worak nunpuwa-o? Inndi kabak yugwi mende-nen na, angin worak mende-nen na, lel mberel unpugwi mende-nen na, nere-nen na, enarengge lak woragwi bem-nen na, kwiye kagwi mende bem-nen na, wim-nen na, iri-nen-e Yesus nenabuwa kaso iri na arem-nen kuri worak nunpuwa-a?

³⁶ Mbal Pem Nagawan engga mbarak pem-nen yosolar-e: ”Kat kebem ala, pempa nir-e wat yidnak waring kali-o. Wururak lomba wam kwat ubu nggal kwat ninpili-o” luk yij-o.

³⁷ Alat nde, iri mende pidsa bem-e nit nenabuwa kaso nap iri-nen mondok ombol nggwe rak nunpusu-o.

³⁸ Nde, Yesus nenabuwa kaso iri na arem-nen kuri worak nunpurak mende-ge mondok lag-o. Wat yugwi mende-nen na, unluk woragwi mende-nen na, aid nap-nen na, teram woraso amawi-nen na, yawo worasu mende-nen na, abok wok ma mende-nen na,

³⁹ teram woraso mende-nen na, nggweyak ma woraso mende-nen na, ndak worak pidnak mende erep obok-nen na, oboksa-nen-e Nenagawan Indo Kerisut Yesus ebem Mbal Pem Nagawan-nen nenabuwa kaso iri na arem-nen kuri worak nunpurag-e meya-nen yusu-o luk an nindi angin tubu yusu-o.