OROMA 7 - Nanduk Ngget Tul Pidnak Wene

Kwe min ap min wok kerak mbili iri nggal-nen yusu-o yidnak wene 7:1-6

¹ Nowe nowosi wa-e. Imiri mbarak pidnak wene kenaru nap kinmin yusu-o. ”Ab-e unluk woragolat nak imiri mbarak pidnak wene urugwe nggwe woragwi-o” yidnak wene-ge kir-e kenaru bug-a?

² Iri nggal yosolar-e, un worak kwe-ge at un uruk worala-ge, imiri mbarak pidnak wene-nen un imin kamarak woraso-t nde, at un wat yosola-ge, imiri mbarak pidnak wene-nen un min kamarak pidnak iri-ge lak yusu-o.

³ Iri ala-ge, un-e uruk worala-t nde, kwe iri na nin nap wanosola-ge, ”Kar-e mbabi yoso kwe-o” luk yak tuwa-o. Alat nde, un iri wat yosola-ge, imiri mbarak pidnak wene-nen un min kamat ibidnak na wosok yidnak me, kwe iri-nen ap misik wanosola-ge, ar-e mbabi yidnak kwe-o luk uburujwa bug-o.

⁴ Nowe nowosi wae. Ap misik arengge kwat yobokluk, kit na iri nggal-et Kerisut ebe min kwin luk, imiri mbarak pidnak wene inggi wesera wat yigeb-o. Nde, nir-e Mbal Pem Nagawan amanggim engen puwakluk, yawo-ge kir-e wat yidnak nap enngendumu-nen uruk tak pidnak nap arengge-net yili-o.

⁵ Nde, nanduk nit-nen-e ki nap-nen kwarugwi mende langgal luk mborogolar-e, meya kwaruwakluk ukwe ukwe kagwi mende iri ninndi arem-nen luwasolar-e, Mbal Pem Nagawan-nen ”Iri kwaru bug-o” luk imiri mbarak pidnak wene na tarurak ninndi wok yidnak-nen ndowaga ebe yosolar-e, wat yugwi elem nenpem mboso-o.

⁶ Alat nde, kamat nunpuruk woraso imiri mbarak pidnak wene na inggi wesera wat yigerik me, nit yawo-ge imiri mbarak pidnak wene inggem-nen weserak ninpidnak worali-o. Iri bem-e, nir-e nanduk ininggi-nen mbaridnak imiri mbarak pidnak wene na ndegel ibili-ge lag-o. Are, Konak Indi-nen mirik ninpidnak ngget mende iri ndegel ibili-o.

Imiri mbarak pidnak wene min meya kwarugwi elem min pem yidnak wene 7:7-13

⁷ Iri ala-ge, nir-e no nde yul-o? Imiri mbarak pidnak wene iri-ge meya mende-nen yusu-o luk yul-a? Mondok lag-o! Irit nde, imiri mbarak pidnak wene lak nggal-e, an-nen-e iri-ge meya kwarusu-o luk, naru yelep pug-o. Imiri mbarak pidnak wene-nen yosolar-e: ”Ukwe ukwe yurak pug-o” luk yigit lak nggal-e, ukwe ukwe yugwi iri-ge no mende-o luk an-e naru yelep pug-o.

⁸ Nde, imiri mbarak pidnak wene iri bem-nen-e meya kwarugwi elem iri-nen-e pibisa-o luk ukwe ukwe nin tak nan tak an narem nam tak pij-o.

⁹ Nanduk, imiri mbarak pidnak wene naru buk worasolar-e, an-e nurug-et woragi-t nde, imiri mbarak pidnak wene na wok yosola-ge, meya kwarugwi elem iri uruk yosola,

¹⁰ an-e wat yigi-o. Nde, imiri mbarak pidnak wene iri-nen-e unluk tak poso wene-t nde, an worak nuburak wene nde kwat yij-o.

¹¹ Nde, imiri mbarak pidnak wene iri na bem meya kwarugwi elem-nen pibisa-o luk an nombol pem laruk, imiri mbarak pidnak wene bem an worak nibij-o.

¹² Nde, imiri mbarak pidnak wene-ge marak-nen yusu-o. ”Iri nggal kwaru-o” yidnak wene-ge marak, mot mot, konak-nen yusu-o.

¹³ Iri ala-ge, konak wene iri-nen-e wat momtak elem nebem pij-a? Mondok lag-o! Meya kwarugwi elem iri-net worak nibij-o. Konak iri na bem-nen meya kwarugwi elem iri-nen-e an worak nibij-o. Iri kwat nibid iri-ge meya kwarugwi iri-ge ndemeret meya kwarugwi elem-nen yusu-o luk yenggerak puwakluk-nen kwarij-o. Iri bem-e, ”Iri nggal kwaru-o” yidnak wene iri na bem-nen-e meya kwarugwi elem iri-ge meya mondok nggulok pare nam tak pusu irir-o.

Ap enpage mberen wim mbaroso wene 7:14-25

¹⁴ Imiri mbarak pidnak wene iri-ge Mbal Pem Nagawan Indi-nen pidnak wene-nen yusu-o luk nenaru yili-o. Alat nde, an-e ki nap-nen yusu-o. Nde, meya kwarugwi elem-nen nonggo posola an-e meya kwarugwi elem ndegel oboso-nen yusu-o.

¹⁵ Nde, an-nen kwaroso mende-ge an nindi yebet kasu bug-o Nde, an-e irit kwareyeg-o luk yidnak mende keya buruk, an nisili kaso mende na-t kwarusu-o.

¹⁶ Nde, an-nen-e iri kwarimin pug-o luk peraidnak mende nak kwarosolar-e, imiri mbarak pidnak wene-ge konak wene-nen yusu-o luk yebet kasu-o.

¹⁷ Iri bem-e, an-nen kwarusu mende yu-ge ndemeret an-nen kwarusu-ge lag-o. Are, an narem worasu meya elem iri-net kwarusu-o.

¹⁸ Ki nap-nen kwarugwi mende-ge an narem worasu me, konak kwarurak elem-e an narem worasu bug-o luk an-e naru yusu-o. Nde, konak nak kwareyeg-o luk, narem perasola-t nde, kwarurag-e meya yusu-o.

¹⁹ Konak mende irit kwareyeg-o luk peraidnak mende na-ge an-e kwarusu bug-o. Are, meya mende kwarimin pug-o luk peraidnak mende iri na kwarusu-o.

²⁰ Nde, an-nen-e iri kwarimin pug-o luk peraidnak mende na kwarusu iri-ge an-nen kwarusu-ge lag-o. Are, an narem worasu meya elem iri-net kwarusu-o.

²¹ Iri bem-e, an-e wene ebe-ge yu nggal yidnak kasu-o. An-nen-e konak mende-t kwareyeg-o luk perasola-t nde, meya mende nak an narem-nen nam yusu-o.

²² Nde, an nindi arem-nen-e Mbal Pem Nagawan-nen idnak imiri mbarak pidnak wene wanurag-e nindingen-et nde,

²³ an ninggi nowak arem-e imiri mbarak pidnak wene nin worala kasu-o. An nindi-nen iri mende-t kwareyeg-o luk peraidnag-et nde, imiri mbarak pidnak wene nin iri-nen an nindi imin wim posolar-e, an ninggi nowak arem worasu meya kwarugwi elem iri-nen kamat nuburuk, urugwe nggwe rak nubusu-o.

²⁴ E! Ije! An-e meya kagi! Wat momtak nebe yu-ge ta-nen minggik nubuwa-o?

²⁵ Nenagawan Indo Yesus Kerisut ebem-nen Mbal Pem Nagawan nak wiwa-o yak turag-o. Iri ala-ge, an-e yu nggal kwarusu-o. An nindi-nen-e Mbal Pem Nagawan-nen idnak imiri mbarak pidnak wene na ndegel ubusu-t nde, nebage ki nap iri-nen kwarosolar-e, meya kwarugwi elem irit ndegel ubusu-o.