OROMA 6 - Nanduk Ngget Tul Pidnak Wene

Meya yugwi elem wosorogolat, Kerisut imin wat luk, at imin unluk wolmomtak wene 6:1-14

¹ Iri ala-ge, nir-e no nde yul-o? Mbal Pem Nagawan-nen we wok ondoso elem iri na nggulok makluk nir-e meya kwat tenak wulmul-a?

² Mondok lag-o! Meya yugwi elem wisirik pogolat wat yidnak nap nit-nen-e nggerak puruk meya kwat tenak wulmul-a?

³ Nir-e Kerisut Yesus imin kundik wolmakluk yi ma ninpiga iri-ge, at nit totno wat yogolat-nen yige-o luk kir-e kenaru bug-a?

⁴ Nde, nit yi ma ninpiga iri-ge at imin totno wat luk, at imin totno yapma nonpogolat-nen yi ma ninpiga-o. Nde, Nineid kek tak woraso amawi-nen-e wat yidnak nap ennggendumu-nen Kerisut uruk tak pid nggal, iri nggal-et nit-nen na ngget mende bem-et waring kujwakluk nunluk tak pij-o.

⁵ Nde, nit nde Kerisut imin misiget nak luk wat yidnak ala-ge, at uruk tak pid iri nggal-et nit na at imin misiget luk nunluk tak puwa-o.

⁶ Nde, wene yu-ge nenaru nar-o. Nit meya kwarugwi nenpage iri na yigisa lak tak peyekluk, nit nenpage nanduk mende iri-ge Kerisut imin e lang pang tak pem worak pamu-o. Iri kwarid iri-ge, nir-e meya kwarugwi elem na ndegel pogolat wolma naru-nen kwarij-o.

⁷ Wat yidnak nab-e meya kwarugwi elem rem-nen wesel yidnak-nen yusu-o.

⁸ Nde, nit nde Kerisut imin totno wat yidnak ala-ge, at imin totno nunlug-et mul-o luk ninndi angin tubu yili-o.

⁹ Kerisut na-ge wat yidnak nap ennggendumu-nen uruk tak pidnak ombol nggwe-ge tuguruk wat ma bug-o luk nir-e nenaru yili-o. Nde, wat yugwi elem-nen-e at urugwe nggwe rak uburag-e mondok meya-o.

¹⁰ At wat yid iri-ge nit meya yidnak pem misik tarem nak wat yij-o. Nde, yawo uruk worasu iri-ge, Mbal Pem Nagawan amanggim uruk worasu-o.

¹¹ Iri nggal-et kit-nen na yu nggal yebet ker-o: An-e wat yugwi elem na wisirik posolar-e, wat yigi nap-nen yusu-o. Nde, Kerisut Yesus imin kwin yosolar-e, Mbal Pem Nagawan amanggim nurug-et worasu-o luk yebet ker-o.

¹² Iri bem-e, kit kenpe-nen ukwe ukwe yugwi mende iri na langgal luk mburugup naru, kit kenpe piri momtak iri-ge meya kwarugwi elem-nen winde luk wolmomtag-e meya-o.

¹³ Kit kenpe iri bem-nen meya kwarosolat wolmaklug-e, meya kwarugwi elem iri na kit kenpe iri kininggi kunuwok min kegera wok turak pug-o. Are, kir-e wat yidnag-et nde, kunluk yaga wok kindidnak pem-e, kenpe kegera Mbal Pem Nagawan nak wok ter-o. Lud tak nak kwarugwi mende kwat kenperenak wolmakluk, kenpe ebis-et kegera Mbal Pem Nagawan wok ter-o.

¹⁴ Nde, kir-e imiri mbarak pidnak wene-nen urugwe nggwe rak kinpidnag-e lag-o. Are, Mbal Pem Nagawan we wok ondoso elem-nen urugwe nggwe rak kinpidnak me, meya kwarugwi elem-ne urugwe nggwe rak kunpurag-e lag-o.

Mbal Pem Nagawan indi-n pidnak nak kwarurak wene 6:15-23

¹⁵ Iri ala, no kwarul-o? Nir-e imiri mbarak pidnak wene-nen urugwe nggwe rak ninpidnak worali-ge lak me, Mbal Pem Nagawan we wok ondoso elem pem worali me-ge, meya kwat tenak wulmul-a? Iri-ge mondok lag-o!

¹⁶ Nde, at-nen yidnak yidnak kwaruwokluk kit na kit-net kenpe kegera ap mbi wok togola-ge, kir-e at iri ndegel ubugwi nap-net yili-o. Meya yugwi elem ndegel ubugup ala-ge, war-et yugub-o. Nde, Mbal Pem Nagawan-nen yidnak yidnak nak wanugup ala-ge, lud tak nak kunpuwa-o luk kenaru buk yili-a?

¹⁷ Nde, nanduk kir-e meya kwarugwi elem ndegel ubugwi nap woraigeb-et nde, yawo-nen-e mul kindidnak ndemeret wene owak iri na wanogolar-e, kinndi min-et wene na wanili ala karuk, Mbal Pem Nagawan wiwa-o luk yak toso-o.

¹⁸ Meya kwarugwi elem na ndegel ubugwi iri inggem-nen weserak kenpamu, yawo-ge lud tak nak kwarugwi elem ndegel ubugwi nap kwat yigeb-o.

¹⁹ Kit-nen kwara yebet kabokluk, an-e ndegel unpugwi wene bem wal kaga yak kundusu-o. Nanduk kir-e meya kwaruwokluk kopkap tobok tak kwarugwi mende min meya kwarugwi mende min ndegel ubuwokluk kenpe ebis-et kegera at eram pigep iri nggal kwarogolar-e, yawo-ge kir-e marak nap kwat yuwokluk, kit kenpe ebis-et kegera lud tak nak kwarugwi elem wok turag-o.

²⁰ Nde, kir-e nanduk meya kwarugwi elem ndegel ubugwi nap woragolar-e, lud tak nak kwarugwi bem-e wendet woraigeb-o.

²¹ Nanduk kwarugwi bem iri nggal kwarige-o luk yawo kinnggiri kali na bem-e, onggo-ge no mende nde lesa wanigeb-o? Lag-o. Iri mende kwarugwi onggo-ge wat yugwi elem-nen yusu-o.

²² Alat nde, yawo-ge kir-e meya kwarugwi elem ndegel ubugwi inggem-nen weserak kinpidnak me, kir-e Mbal Pem Nagawan ndegel ubugwi nap-net yili-o. Iri bem-e, kit-nen onggo wanogolar-e, Mbal Pem Nagawan amanggim nak woragup pem-e kunlug-et woralik nalik woragub-o.

²³ Nde, meya kwarugwi elem na onggo-ge wat yugwi irir-o. Alat nde, Mbal Pem Nagawan-nen we wok nondoso iri-ge Nenagawan Indo Yesus Kerisut ebem-nen pem-et unlug-et woralik nalik elem-nen yusu-o.