OROMA 5 - Nanduk Ngget Tul Pidnak Wene

Lud tak nak nonposolar-e, iri nggal wok nunduwa wene 5:1-11

¹ Iri bem-e, nit ninndi angin tubu yidnak pem lud tak nak ninpidnak me, Nenagawan Indo Yesus Kerisut ebem nir-e Mbal Pem Nagawan imin lambuk tak ninpidnak worali-o.

² Nit ninndi angin tubu yidnak pem nir-e Mbal Pem Nagawan-nen idnak we wok ondoso elem pem worali-o. ”Mbal Pem Nagawan unu kek tak pogola, at ondok yul-o” luk iri kwarurak pem ninndi mbung mbung tak woragolar-e, nenalen kali-o.

³ Nde, iri kwarurak pem nak nenalen kali-ge lag-o. Nit andi bandi kali na bem nenalen kali-o. Nde, andi bandi mende iri-nen ninndi tugup lak uwi yaboso iri-ge nenaru me,

⁴ ninndi tugup lak uwi yaboso iri-nen ombol nggwe rak poso-o. Nde, ombol nggwe rak onposo iri-nen-e inndi ebem mbung mbung tak woragwi rak poso-o.

⁵ Mbal Pem Nagawan-nen Konak Indi wok nindid iri na bem-nen enabuwa kaso elem nggilara nit nenarem yebet tak pidnak me, ninndi ebem mbung mbung tak woragwi iri na wolma me, ninndi nggwirik yul pug-o.

⁶ Nit nanduk ndeyak woragola, Mbal Pem Nagawan indi-n pidnak tarem ndak ndag-et yosolar-e, Kerisut-e Mbal Pem Nagawan ene tarugwi nap nenmanggim wat yamu-o.

⁷ Lud tak nak kwaroso nap amanggim ap misik wat momtag-e meyar-o. Alat nde, konak nak kwaroso nap amanggim ap misig-e wat momtak indi te worasu nde ma-o.

⁸ Alat nde, nir-e meya yugwi nap woragola, Kerisut-e nenmanggim wat yamu me, iri bem-nen Mbal Pem Nagawan-nen nit nenabuwa kaso elem mirik ninpij-o.

⁹ Yawo-ge Yesus eyabi bem-nen lud tak nak ninpidnak worali iri-ge ija-t nde, Mbal Pem Nagawan isilepma-ge nit nenpem mbuma naru, Yesus-nen ninmiri yuwa iri perak nde ija lombog-o.

¹⁰ Nir-e Mbal Pem Nagawan imin wim mbarak woraige-t nde, at Ambara wat yid na bem-nen nir-e Mbal Pem Nagawan imin lambuk yige iri-ge ija-t nde, Mbal Pem Nagawan imin kundik nunpuruk, Yesus uruk woraso bem nit ninmiri yuwa iri perak nde ija lombog-o.

¹¹ Nde, ninmiri yurak iri nag-e lag-o. Are, Nenagawan Indo Yesus Kerisut ebem-nen Mbal Pem Nagawan ebem-e nenalin nenalen kali-o. Yesus ebem-net Mbal Pem Nagawan imin kundik ninpij-o.

Aram min Kerisut min enpem yidnak wene 5:12-21

¹² Ap misik-nen kwaridnak pem-e meya kwarugwi elem-e nggweyak ma yu me ngguwagaij-o. Nde, at-nen meya yidnak pem-e wat yugwi elem na ngguwagaij-o. Iri kwarid pem-e, ap pidsa meya na kwarugwi me, wat yugwi elem na-ge ap pidsa enpem ndi wat agaij-o.

¹³ Musa-nen imiri mbarak pidnak wene na wok indigit lak ma-ge, meya kwarugwi elem-e nggweyak ma yu me worala-t nde, imiri mbarak pidnak wene na lak me, it-nen meya yidnag-e enpem pigit lak yij-o.

¹⁴ Alat nde, Mbal Pem Nagawan-nen we wok ondoso elem min Aram-nen meya kwaridnak min iri-ge ndak ndag-e lag-o. Ap misik iri-nen meya kwaridnak pem ap mondok kwarat wat yiga iri-ge ija-t nde, Mbal Pem Nagawan-nen we wok ondoso elem iri perak nde terak minik nggulog-o.

¹⁵ Nde, ap misik Yesus Kerisut-nen lud tak nak kwaridnak pem Mbal Pem Nagawan-nen-e at we wok ondoso elem-e ap mondok kwarat wok indij-o.

¹⁶ Mbal Pem Nagawan-nen we wok ondoso elem iri-ge ap misik iri-nen meya yidnak iri nggal ndak ndag-e lag-o. Ar-e wene misiget nak kuruk tidnak pem-et nde, ap pidsa enpem wene mbarosolar-e, angin worak mende-ge nenpem pij-et nde, ap pidsa-nen Mbal Pem Nagawan-nen yidnak wene kuruk tenak woraidnag-et nde, Mbal Pem Nagawan-nen onggo lak we irit lud tak nak ninpij-o.

¹⁷ Ap misik-nen meya yidnak-nen ndowaga ap pidsa wat yugwi elem urugwe nggwe woraiga iri-ge ija-t nde, misik nap Yesus Kerisut-nen kwaridnak pem-e we wok ondoso elem kwarat min onggo lag-et lud tak nak onposo min wok nunduwa nab-e Yesus Kerisut ebem-et nunluk woragolar-e, kek tag-et wulmul iri perak nde nggulok lombog-o.

¹⁸ Ap misik-nen meya yidnak pem-e ap pidsa nenpem angin worak mende pid iri nggal-et ap misik-nen lud tak nak kwaridnak pem-e, ap pidsa lud tak nak nunpuruk, nunluk wolmomtak elem wok nundusu-o.

¹⁹ Nde, ap misik-nen yidnak yidnak kwarigit lak pem-e, ap kwarat meya kwarugwi nap tak inpid iri nggal-et ap misik-nen yidnak yidnak kwaridnak pem-e ap kwarat lud tak nak unpuwa-o.

²⁰ Alat nde, wene kuruk tugwi iri ligik lujwakluk, Mbal Pem Nagawan-nen imiri mbarak pidnak wene nambena pij-o. Nde, meya kwarat yugwi sa-ge Mbal Pem Nagawan-nen we wok ondoso elem na kobong kobong lasu-o.

²¹ Iri ala-ge, meya kwarugwi elem urugwe nggwe woragolar-e, wat yugwi nap woraige nggal, iri nggal-et we wok ondoso elem urugwe nggwe woragolar-e, lud tak nak nunpuruk, Nenagawan Indo Yesus Kerisut ebem-e nunlug-et woralik nalik momtak elem wok nundusu-o.