OROMA 15 - Nanduk Ngget Tul Pidnak Wene

”Kondomok kenmanggim nak kwarurak pug-o. Kenggamirak enalen tak purag-o” yidnak wene 15:1-6

¹ Nit kwara ninndi angin tubu yidnak worali nap-nen-e kwara yebet kagit lak nap-nen kwiye kali mende min nir-e kwara kwaluk kwaluk wolmomtag-o. Nit nondomok nenalen kudtak pem nak kwarurag-e meya-o.

² Are, nenggamirak na kwara inndi angin tubu maklug-e, nit nondomok tak-nen it enalen tak purak mende-t kwaruwog-o.

³ Nde, Kerisut-nen na irit, at ondomok alen tak purak mende na-ge yebet kagit lag-o. Are, Mbal Pem Nagawan engga bem-nen yosolar-e: ”Kat nggweyel kibiga mende an nebem mbij-o” luk yij-o.

⁴ Mbal Pem Nagawan engga bem-nen-e ninndi luruk purak min ninndi tugup lak tak purak min mul nondosola, Mbal Pem Nagawan ebem ninndi mbung mbung tak wolmakluk mul nundusu me, Mbal Pem Nagawan engga bem mbaridnak wene pidsa nit mul nundurak pem mbariga-o.

⁵ Inndi luruk puruk woragwi elem min inndi yanggunugwi elem min-e Mbal Pem Nagawan-net yusu-o. Nde, Kerisut Yesus abage nggal-et kwarobok-nen Mbal Pem Nagawan-nen-e kit kinndi misiget nak worabokluk yongga kunduwag-o.

⁶ Yongga kondosola-ge, kir-e kinndi min kenne min misiget nak woragolar-e, kit pidsa Nenagawan Indo Yesus Kerisut Eid Mbal Pem Nagawan nak erembel wanogolat worabog-o.

Aid wene-ge enlem nin nap endam waruk mbiridnak wene 15:7-13

⁷ Iri bem-e, Mbal Pem Nagawan unu kek tak puwakluk, Kerisut-nen kit wok kinpid nggal-et kit na kit-net wok kerak mber-o.

⁸ Iri bem-e, yu yosolat-nen yigi-o: Kerisut-e Yawuri nap ndegel onposo nap kwat yid iri-ge, Mbal Pem Nagawan-e lud tak nak kwaroso-o mul ondosolat, Mbal Pem Nagawan-nen nit nenlawingga urul paga yak indidnak wene na ndak tak posolat-nen yij-o.

⁹ Nde, Mbal Pem Nagawan-nen it unpud kaidnak pem Yesus-nen-e enlem nin nap min-et Mbal Pem Nagawan kek tak ubugwi rak inpij-o. Mbal Pem Nagawan engga bem-nen yosolar-e: ”Iri bem-e, enlem nin nap ennggendumu-nen an-e kat kerembel wanosolat, ndawi bem kat kunu kek tak posolat woramin-o” luk yij-o.

¹⁰ Nde, misik pem-nen yosolar-e: ”Kenlem nin nap wa-e. Kir-e Mbal Pem Nagawan-nen len inpidnak nap na inmin-e totno kenalen ker-o” luk yij-o.

¹¹ Iri luk, misik pem-nen yosolar-e: ”Kenlem nin nap oboksa wa-e. Nagawan Indo erembel waner-o. Ap kenlem pidsa wa-e. At nak erembel waner-o” luk yij-o.

¹² Nde, Yesaya-nen yosolat na: ”Isai-nen wigarak pem-nen ap misik men yosolar-e, enlem nin nab-e at urugwe nggwe rak unpuwa-o. Iri ala-ge, it inndi-ge at ebem-et mbung mbung tak wolma-o” luk yij-o.

¹³ Ap inndi ebem mbung mbung tak wolmomtak elem-e Mbal Pem Nagawan-nen yusu-o. Kit kinndi-ge at ebem angin tubu yidnak me, at-nen-e enalin enalen kagwi elem min lambuksa woragwi elem min kobong tak kunpuwag-o. Iri ala, Konak Indi amawi bem-e kit kwara Mbal Pem Nagawan ebem kinndi mbung mbung tak worabokluk kobong tak kunpuwag-o.

Wene ebe worala-net Paulus-nen engga yu ene amawi min mbaridnak wene 15:14-21

¹⁴ Nowe nowosi wa-e. Kir-e konak kwarurak nak peragolat, enaru yugwi mende pidsa kenaru yogolat, kit na kit-net nggomo wat kerak mburag-e ndak worali-o luk an-e mondok kenperasu-o.

¹⁵ Alat nde, Mbal Pem Nagawan-nen yabu yu wanurak nebem pidnak me, yu wene-ge ”Yu nggal-o. Iri nggal-o” luk kwiye lag-et engga yu bem yeberak kunpusu-o.

¹⁶ Enlem nin nap ndegel unpuwakluk, Mbal Pem Nagawan-nen Kerisut Yesus ndegel oboso nap kwarak nibij-o. Nde, an-e tepan ombo nggal yosolar-e, enlem nin nab-e wam eyuruk Mbal Pem Nagawan amanggim pidnak nggal makluk, Mbal Pem Nagawan indingen kaso mende pidnak nggal Konak Indi-nen Mbal Pem Nagawan amanggim len inpidnak makluk, an-e Mbal Pem Nagawan-nen idnak aid wene ap yak indil nusu-o.

¹⁷ Iri bem-e, an-e Kerisut Yesus imin kundik woralar-e, Mbal Pem Nagawan amanggim yabu wanusu iri bem an nalen kasu-o.

¹⁸ An-e kwiye lag-et wene yusu yu-ge, yu bem-nen yusu-o. Kerisut an narem worala-nen-e enlem nin nap iri-nen Mbal Pem Nagawan-nen yidnak yidnak kwarugwi nap makluk, nene bem-nen na, kwaroso bem-nen na,

¹⁹ kwaril nosolar-e, yenggerak purak mende amawi min kwiye worak mende amawi bem-nen na iri pidsa Konak Indi amawi bem-nen kwaril nigi-o. Iri nggal kwaril nosolar-e, o Yerusalem-nen Kerisut-nen idnak aid wene na-ge kwara timbiril timbiril Ilirikum kuri pigi-o.

²⁰ An-nen peraso-ge yu-o: Kerisut unu kulugwi buk sa nak aid wene yak indil nurak peraso-o. An-e nin nap-nen o ugwi pidnak pem o wirimin naru-nen irit kwaroso-o.

²¹ Mbal Pem Nagawan engga bem-nen yosolar-e: ”At obok kulugwi buk nap-nen-e eyujwa-o. Nde, it kulugwi buk nap-nen-e enaru ma-o” luk yij-o.

Paulus Oroma mbururak peragaid wene 15:22-33

²² Iri bem-e an-e pempa kendam lobok yurag-e nari wari rak me, lobok yoso bug-o.

²³ Alat nde, yawo o yu me-nen an-nen wanurak yabu-ge ndak yamu nde, olengen kwarat pem an-e kit kendam lobok yurak nindi nak peragirik me,

²⁴ an-e Spaniol mborosolar-e, kit kenma nggwe wok yimin-o. Wok yosolar-e, kit kinmin lambuk luk, totno nenalen min yek ngek mbul-o. Mburug-e, an Spaniol nggwe mborosola, ndimirik nibil-et mburugub-o luk perasu-o.

²⁵ Alat nde, yawo-ge an-e Mbal Pem Nagawan-nen len inpidnak nap yongga indidnak mende waruk Yerusalem mburusu-o.

²⁶ Nde, lambuk tak inpidnak nap Makeronia woragwi min Akaya woragwi min-nen-e Yerusalem woragwi Mbal Pem Nagawan-nen len inpidnak nap ennggendumu insilobulo lak nap iri na yongga undurak uwang ndok wurul-o luk inndi misiget luk, wene mbariga-o.

²⁷ Iri kwarurag-e it ondomok inndi peraruk wene iri mbariga-t nde, iri kwarurak iri-ge it-nen kwarurag-er-o. Nde, Yawuri nap-nen-e it-nen idnak aid wene-ge enlem nin nap tembesa wok indidnak pem, it enlem nin nap-nen-e it enarengge nggweyak ma mende na Yawuri nap tembesa wok undurak iri-ge ndag-er-o.

²⁸ Nde, an-e neyabu yu lak tak puruk, it enmanggim ndok wiridnak uwang pidsa wok undurug-e, Spaniol mborosolar-e, kit kendam nggwe rak pimin-o.

²⁹ Nde, kit kendam wok yosolar-e, Kerisut-nen imbiringgat kobong tak nibidnak iri na min-et wok yimin-o luk an-e naru-o.

³⁰ Nowe nowosi wa-e. Nenagawan Indo Yesus Kerisut ebem na, Konak Indi-nen enabuwa kaso elem wok nindidnak pem na, an-e kit kenmengen mbarusu-o. An totno-t an namanggim Mbal Pem Nagawan eram tepan kwara yogolat wolmog-o.

³¹ An namanggim tepan yogolar-e, Yurea woragwi inndi angin tubu yigit lak nap ininggem-nen mengga keya nobosolat, yongga indidnak mende Yerusalem waruk mborosola, Mbal Pem Nagawan-nen len inpidnak nap-nen konag-et wanuwakluk tepan namanggim yurag-o.

³² Nde, iri-ge Mbal Pem Nagawan indi-nen nde ”Irit mag-o” yosola-ge, an nalen min-et kit kendam lobok yimindik, kit kennggendumu woralar-e, nindi yamuk ma-o.

³³ Ap lambuk tak onposo elem Mbal Pem Nagawan iri-nen-e kit oboksa kinmin wolmag-o. Amen.