OROMA 12 - Nanduk Ngget Tul Pidnak Wene

Mbal Pem Nagawan amanggim nak wolmomtak wene 12:1-21

¹ Iri bem-e, nowe nowosi wa-e. Mbal Pem Nagawan-nen nit nunpud kwarat kaso bem an-e kit kenmengen mbarusu-o. Wam wosa Mbal Pem Nagawan amanggim pugwi nggal, kit kenpe kunlug-et ebis-et kegera Mbal Pem Nagawan wok turag-o. Iri kwarogolar-e, kit kenpe-ge marak me, at alen tak ubugub-o. Mot mor-et Mbal Pem Nagawan erembel wanugwi-ge irir-o.

² Nggweyak ma nap-nen kwarugwi mende kwarurak pug-o. Are, kenpage nin luk, kinndi ngget tak pogola-ge, Mbal Pem Nagawan indi-n pidnak mende-ge konak mende, at alen kudtak iminep mbarak mende irit kenaru yugub-o.

³ Nde, Mbal Pem Nagawan-nen we wok ondoso elem wok nirid iri na bem-nen kit oboksa nggomo kindimin-o. Woragwi ndak ndak kek yurak na keya buruk, kit na kit-net terak mena kek yurak pug-o. Are, kat woraso kabage na yebet karuk, kinndi tebe luk, kit kondomok tak-nen Mbal Pem Nagawan-nen kinndi angin tubu yugwi mende wok kindidnak na ndak ndag-et ”An-e iri nggal worasu-o” luk yebet ker-o.

⁴ Nit nenpe misiger-et nde, nininggi nunuwog-e kwarar-o. Nde, nininggi nunuwok iri-nen-e eyabu arik tag-et wanoso-o.

⁵ Iri nggal, nir-e ap kwarar-et nde, Kerisut imin kundik worali me, nenpe misiget nak-nen yusu-o. Nit na nit-net kundik woragolar-e, ebe misiget inggi ijok-nen yili-o.

⁶ Mbal Pem Nagawan-nen we wok ondoso mende nenarik tak nin tak nan tak wok nindid iri-ge at-nen nit nunpud kaso bem-net wok nindid mende iri na-ge nir-e iri na bem-nen yabu wanogolat wolmomtag-o. We wok ondoso mende aid wene yurak wok tidnak nap-nen-e at indi angin tubu yidnak ndak ndag-et yosolat wolmag-o.

⁷ Nde, we wok ondoso mende ap yongga undurak wok tidnak ala-ge, ap yongga ondosolat wolmag-o. Nde, we wok ondoso mende ap mul undurak wok tidnak ala-ge, ap mul ondosolat wolmag-o.

⁸ Ap inndi eyak wururak wok tidnak nde ala-ge, ap inndi eyak worosolat wolmag-o. Nde, at arengge ap tembesa wok undurak wok tidnak nde ala-ge, indi mbek tak pem-et wok ondosolat wolmag-o. Nde, ap lit eneyaruk nurak wok tidnak nde ala-ge, eberari lag-et ap lit eneyaruk nosolat wolmag-o. Nde, ap enabuwa kudtak wok tidnak nde ala-ge, alen min-et ap enabuwa kasolat wolmag-o.

⁹ Ap enabuwa kagolar-e, ndemeret kinndi min-et enabuwa kudtag-o. Meya mende kinsili rak puruk, konak mende iri nak tena wolmomtag-o.

¹⁰ Enambik onowe onowot enabuwa kagwi nggal nabuwa kabuwa yogolar-e, kit na kit-net kek tak pegerak mbogolat wolmer-o.

¹¹ Yabu kwara wanogolar-e, perari yurak pug-o. Kinndi embem pem-net Nagawan Indo eyabu wanogolat wolmer-o.

¹² Kenalin kenalen pem-et kinndi-ge at ebem mbung mbung tak wolmer-o. Anggun panggun kenpem mbosola-t nde, kinndi luruk puruk, tepan nak kundugu yogolat wolmer-o.

¹³ Inndi angin tubu yidnak nap-nen ukwe peraidnak mende-ge yongga ondogolat wolmer-o. Ap sal na kinndi mbek tak pem-et kinmin tak unpuruk kenma rak enper-o.

¹⁴ Kit lel mberel kunpugwi nab-e Mbal Pem Nagawan-nen imbiringgat tak unpuwakluk at emengen mbarer-o. Imbiri lamut tak unpurak pug-o. Are, imbiringgat tak unpurag-o.

¹⁵ Enalin enalen kali nap inmin-e kit-nen na kenalin kenalen ker-o. Nde, yip tili nap inmin-e kit-nen na yib-et turag-o.

¹⁶ Kit kinndi misiget lambuksa wolmer-o. Kit kondomok kek yurak pug-o. Are, teberak yik kagwi mende iri na nggal-et tebe yurag-o. ”An-e nindi tenggerak-nen yusu-o” luk purak pug-o.

¹⁷ Ap-nen meya rak konpogola-ge, onggo it meya rak unpurak pug-o. Ap oboksa-nen: ”Konak kwarugwi-ge irir-o” luk peragwi mende iri nak kwarogolat wolmer-o.

¹⁸ Nde, kit-nen-e ap oboksa inmin lambuk tak nak wolmomtak iri nak peragolat wolmer-o.

¹⁹ Nenggamirak kenabuwa worak wa-e. Kit-nen onggo purag-e mondok lag-o. Are, Mbal Pem Nagawan isilepma-ge ap na ebem mbuwakluk, at eram nak keya burag-o. Mbal Pem Nagawan engga mbarak pem-nen yosolar-e: ”Onggo purak nab-e an-net yusu me, onggo an-net pimin-o luk Nagawan Indo-nen yij-o” luk yij-o.

²⁰ Irit nde, engga wene misik-nen yosolar-e: ”Kat kimin sirid nap nere ala-ge, mburu mak turag-o. Nde, yi nere ala-ge, yi mak turag-o. Iri nggal kwat obosolar-e, at anggul pem kan mil mil ndok worak pugun-o” luk yij-o.

²¹ Meya kwarugwi elem-nen urugwe nggwe rak kunpuwakluk, nggeyok nak yurak pug-o. Are, konak kwarugwi mende iri bem-nen meya kwarugwi elem iri urugwe nggwe rak per-o.