OROMA 11 - Nanduk Ngget Tul Pidnak Wene

Mbal Pem Nagawan-nen Isarael nap unpud kaso wene 11:1-12

¹ An kin waneyeg-o. Mbal Pem Nagawan-nen at winde nap amberam tak inpid, lak? Mondok lag-o! Nde, an na irit Isarael nap, Abaram-nen wigarak, nelem-e Mbenyamin nap-nen yusu-o.

² Mbal Pem Nagawan-nen-e at winde nap nanduk-net len inpidnak na-ge amberam tak inpigit lag-o. Mbal Pem Nagawan engga mbarak arem-nen Elia-nen kwaridnak wene iri-ge kir-e kenaru buk yili-a? Isarael nap enpem wene mbaruwakluk Elia-nen Mbal Pem Nagawan emengen mbarosolar-e, yu nggal yij-o:

³ ”Nagawan Indo wa-e. It-nen-e kat kene lomboksa yugwi nap ondogolat, kat kamanggim wam wosa pugwi sa mijarak pogolat yiga-o. Nde, an nariget nak worala nuruwokluk yili-o” luk yij-o.

⁴ Nde, wene na erep nggarosolar-e, Mbal Pem Nagawan-nen-e ngge yak tij-o? ”Kugi Mbal iri erembel wanuwokluk endaru yunggusa kore yugwi buk nab-e an namanggim lenak inpigi-ge tujuribu irit worali-o” luk yak tij-o.

⁵ Nde, yawo na iri nggal-et worasu-o. Mbal Pem Nagawan-e it enabuwa kaso me, at amanggim len inpidnak nap erep na woralir-o.

⁶ Nde, it len inpid iri-ge it-nen kwaridnak mende bem-e lag-o. Are at-nen it unpud kaso bem-net len inpij-o. Nde, it-nen kwaridnak mende bem len inpidnggal-e, it unpud kaso elem iri-ge ebe lak yeleb-o.

⁷ Iri ala-ge, no nde yul-o? Isarael nap-nen kore yogolat woraiga mende iri-ge wanigit lak yiga-o. Mbal Pem Nagawan-nen len inpidnak nap wonarak nggal nak-nen perak nde waniga-o. Nde, it erep iri-ge inndi amawi-t yiga-o.

⁸ Mbal Pem Nagawan engga mbarak pem-nen yosolar-e: ”Mbal Pem Nagawan-nen it inndi min yebet kagwi min yimil mbid tak enpamu, yawo na it enlengen-nen kagit lak, it eneyanggo-nen na kuligit lak irit worali-o” luk yij-o.

⁹ Nde, Ndaud-nen yosolar-e: ”It-nen nunggwi mende nggulok sakwi-ge it ondomok enare purak kere logo bidnak nde kwat yosolat, it yoboksa abapno sa mburak mbun nde kwat yosolat mag-o.

¹⁰ It enlengen-e kagit lak makluk, ndamuk mag-o. Nde, onmbolwag-e pempa tumbu yosolat wolmag-o” luk yij-o.

¹¹ Iri ala-ge, an kin waneyeg-o. Yawuri nab-e unuwok pijaksa mondog-et wosa mbiga-a? Mondok lag-o! It-nen mborok tidnak pem it Yawuri nap-nen enlengen ale enlem nin nap enpem puwakluk, enlem nin nap inmiri yij-o.

¹² Nde, Yawuri nap-nen lugud tak kwaridnak pem-e, Mbal Pem Nagawan-nen enlem nin nap oboksa-ge imbiringgat tak inpij-o. Nde, it Yawuri nap na-ge tuguruk Mbal Pem Nagawan-nen at imin kundik onposola-ge, Mbal Pem Nagawan-nen imbiringgat terak minik irit wok unduwa-o.

Enlem nin nap inmiri yid wene 11:13-24

¹³ Yawo-ge kit enlem nin nap yak kundusu-o. An-e enlem nin nap kit kendam wirik nibidnak nap woralar-e, an neyabu iri-ge nggok tak pimin-o.

¹⁴ An iri kwarusu iri-ge an nelem nap enlengen ale rak posolat, it erep inmiri yekluk-nen iri kwarusu-o.

¹⁵ Nde, it Isarael nap na Mbal Pem Nagawan-nen amberam tak inpid pem-e nggweyak ma nap oboksa-ge Mbal Pem Nagawan imin kundik inpij-o. Iri ala-ge, Mbal Pem Nagawan-nen Isarael nap wok onposola-ge, ngge nde ma-o? Lag-o. Iri-ge wat yidnak nap unluk yidnak nggal-nen yusu-o.

¹⁶ Nandug-et mbaridnak oroti-ge Mbal Pem Nagawan amanggim lenak pidnak nde ala-ge, oroti erep konidnak pidsa na irit Mbal Pem Nagawan wok tidnak-nen yusu-o. Nde, e emengen iri-ge Mbal Pem Nagawan amanggim lenak pidnak nde ala-ge, inggi ngga min-et ndoksa at arengge-net yusu-o.

¹⁷ Nde, yakwi e saitun inggi erep mbarak puruk, yakwi buk mbepme woraso e saitun inggi mbarak iri-ge eraret iri na bem kundik pij-o. Kit enlem nin nab-e mbepme woraso e saitun nggal-nen yili-o. Nde, kir-e yakwi e saitun min kundik kinpidnak me, elem amburu-ge Yawuri nap inmin totno wanili-o.

¹⁸ Iri bem-e kit na kit-net kek yogolar-e, mbarak pidnak inggi iri na te rak unpurak pug-o. Kir-e no bem-nen kondomok kek yili-o? Kir-e inggi-nen yili-o. Nde, inggi-nen-e emengen ki wolmomtak amburu wok toso bug-o. Are, emengen-nen inggi na ki wolmomtak amburu wok toso-o.

¹⁹ Alat nde, kit-nen yogolar-e: ”Ye. Irit nde, eraret pem an kundik nebeyekluk-nen inggi ereba mbarak pij-o” luk yugub-o.

²⁰ Iri-ge ndemeret nde, it iri na-ge inndi angin tubu yigit lak pem-nen mbarak inpij-o. Nde, kit kinndi angin tubu yigep pem-e, kundik tugup lak worali-t nde, iri bem kit kondomok kek yurak pug-o. Are, mondok kwiye min-et wolmer-o.

²¹ Nde, Mbal Pem Nagawan-nen Yawuri nap ndemeret e at inggi nggal-et nde, indi angin lak mbo inpidnak me, kit mbo kunpurag-e indi angin ma-o luk peragub-o.

²² Iri bem-e, Mbal Pem Nagawan-nen ap unpud kaso min isilepma enpem poso min kwara yebet ker-o. Meya yidnak nap enpem-e isilepma unpusu-t nde, kit-nen nde kunpud kaidnak pem woragola-ge, kit kunpud kasolat wolma-o. Nde, iri kwarigit lak yugup pem-e, kit na irit mbara mbo kunpuwa-o.

²³ Nde, it Yawuri nap na-ge inndi angin tubu yigit lak woraidnak na keya bogola-ge, tuguruk e elem na min kundik unpuwa-o. Mbal Pem Nagawan-nen-e it waga e elem min kundik unpurag-e ndak-nen yusu-o.

²⁴ Nde, kit enlem nin nab-e yakwi buk mbepme woraso e saitun inggi mbarak pidnak nggal-nen yusu-o. Nde, iri nggal kwarugwi bug-et nde, yakwi e saitun eraret min kundik kinpij-o. Nde, Yawuri nap na-ge yakwi e saitun min kundik woragwi-t nde, mbarak inpidnak me, enlem min tuguruk kundik unpurag-e te lombog-o.

Mbal Pem Nagawan-e ap pidsa unpud kaso wene 11:25-32

²⁵ Nowe nowosi wa-e. Kit-nen-e: ”Nir-e ninndi nggat ponok tak-net yili-o” luk peragup naru-nen kit kenaru tobok-nen kura wene misik yak kendeyeg-o. Isarael nap ereb-e inndi amawi irit worakmu, enlem nin nap abu ndegera Mbal Pem Nagawan eram wok yogola-net inndi ndeyak ma-o.

²⁶ Iri lug-e, Isarael nap oboksa inmiri yuwa iri-ge Mbal Pem Nagawan engga mbarak pem-nen yosolar-e: ”Inmiri Yoso Nab-e o Sion-nen lobok yuwa-o. Lobok yosolar-e, Yakup-nen wigarak-nen meya yidnak pidsa-ge lak tak puwa-o.

²⁷ An-nen it meya yidnak lak tak posolat-nen-e: ’Iri nggal kwat kinpimin-o’ luk urul paga yak indimin-o” luk yij-o.

²⁸ Yawuri nab-e aid wene wanili buk iri bem-nen ir-e Mbal Pem Nagawan imin wim nap-nen yili-o. Nde, iri kwatli iri bem kit enlem nin nap kenmanggim nanongga kwat yusu-o. Alat nde, Mbal Pem Nagawan-nen len inpidnak me, it enlawingga-nen ndowaga Mbal Pem Nagawan-nen-e it enabuwa kasur-o.

²⁹ Mbal Pem Nagawan-nen ap len unpuruk, imbiringgat tak inpidnak nde ala-ge, at-nen iri kwaridnak na-ge tuguruk nden kaso bug-o.

³⁰ Enlem nin nap kir-e nanduk Mbal Pem Nagawan-nen yidnak wene kuruk togolat woraigeb-et nde, yawo-nen-e it Yawuri nap-nen Mbal Pem Nagawan-nen yidnak wene kuruk tidnak pem, Mbal Pem Nagawan-nen kit kunpud kasu-o.

³¹ Nde, iri nggal-et yawo-ge it-nen Mbal Pem Nagawan-nen yidnak wene kuruk tili iri-ge, Mbal Pem Nagawan-nen kit kunpud kaidnak iri bem it na irit unpud kujwakluk-nen iri yili-o.

³² Mbal Pem Nagawan-nen ap oboksa unpud kayeklug-e, ap pidsa-ge yidnak yidnak kwarugwi buk iri na arem nggitlik keya enpamu-o.

Mbal Pem Nagawan erembel wanurak wene 11:33-36

³³ Mbal Pem Nagawan-e yi mende ndi mende winde iri-ge wir-o! At indi nggat nggat min at aru yidnak min iri-ge nggok ija lombog-o! At-nen mbaridnak wene iri-ge ta nggal-nen nde lumbunuwa-o? At-nen kwaroso iri-ge ta nggal-nen yebet kujwa-o?

³⁴ Mbal Pem Nagawan engga mbarak pem-nen yosolar-e: ”Nagawan Indo indi-ge ta nde aru-o? Ta nggal-nen at nggomo wuruwa-o?

³⁵ Nde, at-nen onggo ndak ndak puwakluk, ta-nen nde silobulo wok tij-o?” luk yij-o.

³⁶ Nde, yi mende ndi mende pidsa-ge at nak-nen ndak worak posolat, at-nen nak yidnag-o, nde, at amanggim nak worasu-o. At unu-ge kek tak irit woralik nalik mag-o. Amen.