OROMA 10 - Nanduk Ngget Tul Pidnak Wene

¹ Nowe nowosi wa-e. An nindi mbung mbung tak lombog-e an nelem nap inmiri yuwakluk, an-e kiri keresa it enmanggim Mbal Pem Nagawan emengen mbaroso-o.

² It-nen enmawi min-et Mbal Pem Nagawan erembel wanili-t nde, iri kwatli iri-ge ir-e ndemeret Mbal Pem Nagawan enaru-nen yili-ge lag-o luk an-nen yak kundusu-o.

³ Mbal Pem Nagawan-nen ap lud tak nak unpurak kwaroso iri-ge ir-e nenaru buk me, it inndi-n pidnak pem lud tak nak unpuwa-o luk peragolar-e, ir-e Mbal Pem Nagawan indi-nen pidnak na kwatli bug-o.

⁴ Musa-nen imiri mbarak pidnak wene na-ge Kerisut-nen ndak tak pidnak me, inndi-ge at ebem angin tubu yuwa nap pidsa-ge lud tak nak unpuwa-o.

Inmiri yurak iri-ge ap pidsa enmanggim-nen yusu-o 10:5-21

⁵ Imiri mbarak pidnak wene-nen yidnak yidnak kwarugwi bem lud tak nak unpuwa nap onowene Musa-nen engga mbarosolar-e: ”Imiri mbarak pidnak wene-nen yidnak yidnak kwaruwa nab-e, iri bem-net unlug-et wolma-o” luk mbarij-o.

⁶ Alat nde, inndi angin tubu yidnak pem lud tak nak inpidnak nap yak ondogolar-e: ”Kinndi-nen peragolar-e: ’Ta nde aid arem lujwa-o?’ luk purak pug-o. (Iri yogolar-e, Kerisut waruk mbumomtak yogolar-o.)

⁷ Nde, kinndi-nen peragolar-e: ’Ta nde nggweyak urugwe nggwe mbuwa-o?’ luk purak pug-o.” (Iri yogolar-e, Kerisut na wat yidnak nap ennggendumu-nen waruk lumomtak yogolar-o.)

⁸ Iri-ge yu nggal yosolar-o: ”Mbal Pem Nagawan-nen yidnak wene iri-ge kit kendam worasu-o. Kit kenemende bem, kit kenarem na worasu-o.” Nde, iri-ge nit-nen yak kindili inndi angin tubu yugwi wene nde yigi-o.

⁹ Kat kemende nggwe-nen: ”Yesus-e Nagawan Indo-nen yusu-o” luk nam-et para yosola, nde, ”Mbal Pem Nagawan-nen wat yidnak nap ennggenggerak-nen Yesus uruk tak pij-o” luk wene na bem kindi angin tubu yosola-ge, kimiri yuwa-o.

¹⁰ Nde, inndi-nen angin tubu yidnak pem-nen lud tak nak onposo-o. Nde, enemende nggwe-nen-e: ”Yesus-e Nagawan Indo-nen yusu-o” luk yidnak pem inmiri yoso-o.

¹¹ Mbal Pem Nagawan engga mbarak pem-nen yosolar-e: ”Inndi-ge at ebem angin tubu yuwa nab-e innggiri mondok wuruwa bug-o” luk yij-o.

¹² Nde, Yawuri nab-e arik nggal, enlem nin nap na arik nggal-e lak me, ap pidsa innggiri wuruwa bug-o. Mbal Pem Nagawan misiget iri-ge ap pidsa-nen idnak Nagawan Indo-nen yusu-o. Ap pidsa-nen at ebem nggi yogola-ge, imbiringgat mende kwarat nggilara wok ondoso-o.

¹³ Mbal Pem Nagawan engga mbarak pem-nen yosolar-e: ”Nagawan Indo unu luk, at wene mbo buwa nap oboksa-ge inmiri yuwa-o” luk yij-o.

¹⁴ Alat nde, it inndi angin tubu yigit lak woragolat-nen-e nggerak puruk-nen at wene mbo uburag-o? Nde, at obok kuligit lak woragolat-nen-e nggesa-nen at ebem inndi angin tubu yurag-o? Nde, aid wene yak undurak nab-e lak-nen-e nggesa-nen kulurag-o?

¹⁵ Nde, ap nde wirik inpigit lak ma-ge, nggesa-nen aid wene yak undurag-o? Mbal Pem Nagawan engga mbarak pem-nen yosolar-e: ”Aid wene waruk mbitli nap iri-ge mondok konak lombog-o” luk yij-o.

¹⁶ Alat nde, it oboksa-nen aid wene wanili-ge lag-o. Nde, Yesaya-nen yosolar-e: ”Nagawan Indo wa-e. Nit-nen yidnak wene bem-e ta-nen nde inndi angin tubu yij-o?” luk yij-o.

¹⁷ Iri bem-e, wene kulidnak pem-net inndi angin tubu yugwi-o. Nde, wene na kulugwi iri-ge ap-nen Kerisut owene yak ondogola-net kulugwi-o.

¹⁸ Alat nde, ”Ir-e wene kuligit lak yiga, lak?” luk an-nen kin waneyeg-o. Lag-o. Kuliga irir-o. Engga mbarak pem-nen yosolar-e: ”It enne-ge yi wi ndi wi wigak yij-o. Nde, it-nen yidnak wene-ge ap lak kuri wok yij-o” luk yij-o.

¹⁹ Nde, an-nen tuguruk kin waneyeg-o. It Isarael nab-e enaru bug-et woraiga, lak? Lag-o. Nandug-et Musa-nen-e Mbal Pem Nagawan-nen yosolar-e yu nggal yij-o: ”Kir-e enlem nin nap inmin kenlengen ale yugwi rak konposolat, inndi kabak nap inmin kinsilepma enpem pugwi rak konposolat yimin-o” luk yij-o.

²⁰ Alat nde, Yesaya na-nen kwiye lag-et yosolar-e: ”An nogore yugwi buk nap-nen-e an neyaiga-o. An kin wok nibigit lak nap inmbiri bem-e an nondomok nam yaga mirik inpigi-o” luk Mbal Pem Nagawan-nen yij-o.

²¹ Nde, Mbal Pem Nagawan-nen Isarael nap inmin yidnak Yesaya-nen yosolar-e: ”An ninggi-ge it enambigit nggwe pempa sambok tenak woragi-t nde, ir-e inndi amawi, eneyanggo lak wene tarugwi-o” luk yij-o.