NGGOMO WENE 8 - Nanduk Ngget Tul Pidnak Wene

Inndi nggat nggat elem-nen wene mbo onposo wene 8:1-36

¹ Inndi nggat nggat elem-nen ene mbo yosolat, inndi tenggerak elem-nen ene nggoksa yusu ereba koler-o.

² Ar-e tulabiyem ndobo ndobo ereba na min tula nggok nandogol kandogoltak ma min mendak worasu-o.

³ O silmu nggugwi sa pak tumende bem min o silmu nggugwi tulabiyem min ereba me-nen ene mbo yosolat-nen yosolar-e:

⁴ ”Ap oboksa wa-e. Kir-et wene mbo kunpusu-o. Nggweyakma woragwi nap oboksa-nen an-nen kenmengen mbarusu yu kwara koler-o.

⁵ Inndi tenggerak elem tena woragwi buk nab-e inndi tenggerak woragwi elem-e kenaru yer-o. Kit wid kinndi worak nab-e kwara yebet karuk-nen kenaru mer-o.

⁶ An-nen yusu wene-ge ndemeret il pem nak kwat yoso me, mondok kwara koler-o.

⁷ Ennesiget yugwi iri-ge an-e mondok nisili kaso me, an-nen yusu yu-ge oboksa ndemeret nak yusu-o.

⁸ An-nen yusu wene yeba-ge siyag-et ter-o luk mborok tak nggwe yusu bug-o. Oboksa mondok ndemeret mot mot nak yusu-o.

⁹ Ap inndi tenggerak nap enmanggim-e an-nen yusu wene-ge ndemeret mot mot kali-o. Nde, enaru nap enmanggim-e an-nen yusu wene-ge ndemeret lud tag-et yik kali-o.

¹⁰ Perak ndemeret iminep mbarag-et nde, marik tak puruk, an-nen nggomo kindidnak wene-t nggok tak purag-o. Emas kopkap lag-et nde, marik tak puruk, inndi worak tak poso elem enaru yugwi irit nggok tak purag-o.

¹¹ Inndi nggat nggat elem an-e onggo nggok pugwi kerep nggal-e lag-o. Mondok terak minik-net yusu-o. Inndi nggat nggat elem an-e kit-nen ukwe peragwi mende erep min ndak wururag-e mondok lak-nen yusu-o.

¹² An-e inndi nggat nggat elem-nen yusu-o. Yebet kagwi elem min inndi tenggerak elem min enaru yugwi mende elem min-e an-er-o.

¹³ Nagawan Indo kek tak pogolar-e, meya kwarugwi elem iri na kinsili rak pogolar-o. Inndi-nen kek yugwi min enanggup kek yugwi min iri-ge mondok nisili rak pusu-o. An-e enpage meya kwarugwi min ap enmberam lagwi enne amburu min iri-ge mondok nisili-o.

¹⁴ Inndi arem wene mbal ondoso-ge an-net yusu-o. An-net ebe kwarak pusu-o. An-e inndi tenggerak elem min amawi elem min-nen yusu-o.

¹⁵ Nagawan nagawan-e an-net yongga ondosola, o tena worali-o. Enmawi worak nab-e an-net yongga ondosola, mot mot kwarogolat worali-o.

¹⁶ Ap yok nggok min ap enlem kek tak min ereba-ge an-net yongga ondosola, o tena woragolat, mot mot kwarogolat yili-o.

¹⁷ An-nen-e an nabuwa kali nab-et enabuwa kasu-o. An nogore yili nab-e niyujwar-o.

¹⁸ An neram-e yi mende ndi mende min kek tak woragwi mende min mondok ndak woragwi mende min-e mondok lid lud tak worasu-o.

¹⁹ An neram-nen kat-nen wanusu-ge emas kopkap lak nggal-e lag-o. Terak minik ombol nggwe-t wanusu-o. Ndemeret perak onggo nggok iri na nggal-e lag-o. Terak minik ombol nggwe-t wanusu-o.

²⁰ An-e lud tak kwarugwi nggwe-t mboroso-o. An-e mot mor-et kwarugwi nggwe-t mboroso o.

²¹ An-nen-e an nabuwa kali nab-e yi mende ndi mende ombo rak onposo-o. It enma-ge silobulo-nen kobong tak poso-o.

²² An-e ndak wirigit lak awo worala, nanduk nandug-et ndak wat nibij-o. An-e nanduk-net anggul-et ndak wat nibidnak-nen yusu-o.

²³ An-e o nanduk ereba-net kwarak nibidnak-nen yusu-o. Nanduk o yu ndak wirigit lak ma-net kwarak nebamu-o.

²⁴ Yi koma awo kwat yigit lak ma, yi ulusu na pilana wagit lak ma-net ndet nibidnak-nen yusu-o.

²⁵ An-e ndobo yok nggok ereba koreyak pil lobok yigit lak ma-net ndobo marik ereba mendak pil lobok yigit lak ma-net ndesa mbidnak-nen yusu-o.

²⁶ Awo Nagawan Indo-nen o yu min lid karu min ndak worak pigit lak ma, iri-nen ereba ndak wururak nggweyak telak marig-et mbi tet woragit lak ma-net ndesa mbukmu-o.

²⁷ Mbal wigaksa yemarak posola-ge, an nimbiri bem-er-o. Yi koma ombol pem teram nggwe nenasa posola-ge, an-e worakmur-o.

²⁸ Nagawan Indo-nen nggan nggan teram eid me posolat, yi koma urusu pilana womakluk kuwarak posolat,

²⁹ at indi-nen kuri worak pidnak iri na kwidsa nemena wanuwa naru ’Kuri yu bem nak wolmomtag-o’ luk yi koma yak tosolat, o yu mabin posola tarem na an na imin-et iri me-t worakmu-o.

³⁰ Worasolar-e, ambara marik indi kundik irit eram woralar-e, li marik-nen kwarugwi ereba na-t kwat tenak woralar-e, pempa at alen tak posolat woragi-o.

³¹ An-e at-nen idnak o yu na me nalen pem woralat, ki nap inmin kundik nalen pem woragi-o.

³² Iri bem-e ap sujwe wa-e. An nene-t koler-o. An-nen mirik kunpusu yeba-ge kwarogola-ge, kenalen pem-et woragub-o.

³³ An-nen nggomo kundusu wene yu-t kwara koler-o. Iri yogola-ge, kinndi nggat nggat worak ma-o. Mondok lirin lirin tag-e purak pug-o.

³⁴ An-nen nggomo undusu wene kologolat, pempa an nuwi tumende bem koreyak woragolat, an woraso sa pak tumende bem yik karok worali nab-e enalen kagolat wolmag-o.

³⁵ Ta-nen nde an wok nibidnak ala-ge, unluk woragwi elem-et wanarik worasu-o. Nde, at ebem-e Nagawan Indo alen kasu-o.

³⁶ Ta-nen nde an wok nubusu buk nab-e, at ambikpebe erengenwak lak tak pusu-o. An isili rak nobosola-ge, wat yugwi elem iri na abuwa kasolat-nen kwarusu-o” luk inndi nggat nggat elem-nen yij-o.