NGGOMO WENE 6 - Nanduk Ngget Tul Pidnak Wene

Nggomo wene ereb-e 6:1-19

¹ Nambara wa-e. Erep-nen-e kar-e ap mbi inmin yosolar-e: ”Kat-nen ap enarengge namat wanigen iri-ge an-nen uwi yagimin-o” luk yak tidnak woraso nde ma-o.

² Iri nde ala-ge, kat-nen yigen wene ereba-ge kambik kare bigendik me, kat-nen ”Kwat kibimin-o” luk urul yak tigen iri na-net ngonok tak kobosola-ge,

³ nambara wa-e. Kat nde ndemeret iri kwarugundik nde ala-ge, kar-e ap iri inggiyapma worasu-o. Kat nde ininggiyapma-nen wesera labuk yurak pem-e yu nggal kwarurag-o. Kar-e ndag-et nak ap iri na eram mbutluk: ”Ndak lerak keya nuburag-o” luk mondok lembesa emengen mbarurag-o.

⁴ Mondok nak nok mbutluk yak turag-o. Nenelik, ar-e, kababok kwatlik kwarurak pug-o.

⁵ Towe min nggwija min-nen sabu logo boso nap-nen are pidnak arem ngonok yidnag-et nde, lerak poso nggal, sabu arem ngonok tak kibidnak iri-ge mondok lerak purag-o.

⁶ Ap perari worak nab-e at kurip-nen woralat-nen kwaroso iri kwara karuk, enaru yuwag-o.

⁷ Kurip iri-ge it ennggendumu enanggulwak na lak, nagawan na lak, yik eneyarok woraso na lag-et nde,

⁸ mbarugwi tarem-e o sumbat mbud yosola-nen norak laro nunggwi mende ndok wosa poso-o.

⁹ Keberari worak nap wa-e. Nene yik tenak nak worasu iri-ge mepme-nen-e men yugun-o? Mepme-nen nde men yugun-o?

¹⁰ At ababok kwarosolar-e, inggi manggo logoksa keya buruk, koreyak woralat-nen yosolar-e: ”A! An-e nerengen lamburusu-o” luk yanem-et neneluk, menluk kwat tenak woraso-o.

¹¹ Alat nde, at nene yosolat worala, nde, enlengenma lak woragwi mende min enarengge lak woragwi mende min nde ap nden unpugwi nap-nen san kundugu enpem mbud yugwi nggal ebem mbud ma-o.

¹² Meya yugwi nap, mondok ebe lak mende ereba-ge nin me nan me ennesiget yil nili-o.

¹³ Ir-e ap enmberam lagolat-nen kwarogolar-e, enlengen sambok pem ininggi warok pem nak-nen enmberam lali-o.

¹⁴ Nde, it inndi arem-e meya kwarurak nak kobong tak worasolat, ap enpem yuk puk mbugwi mende ap ennggendumu nin me nan me uwi yagil nili-o.

¹⁵ It-nen ereba kwaruwa ereba na-nen ndowaga, lak tak onposo mende-ge mimo it enpem mbosolar-e, mondok yigisa lak tak unpuwa-o.

^16-19 Wene tuju ya perak Nagawan Indo-nen mondok isili me, keya buwa bug-e yar-o: Inndi-nen kek yugwi enpage min ennesiget yugwi enemnde min meya kwarugwi buk nap undugwi ininggi min meya kwarurak yumnugwi inndi min meya kwarurak sa ndag-et mburugwi unuwok min ennesiger-et nde, kaidnak nggal ap enpem ennesiget wene pugwi nap min anggamirak ennggendumu sirid worak tak onposo nap min iri mende kwarugwi iri-ge Nagawan Indo-ge mondok isili-nen yusu-o.

Unun onkwe worak-net nde, mbabi kwaruwa naru nggomo indidnak wene 6:20–7:5

²⁰ Nambara wa-e. Keid-nen yak kuruwa ndak ndag-et kwarurag-o. Kiya-nen nggomo kuruwa na mondok meme rak purak pug-o.

²¹ It-nen yak kiridnak wene-ge kindi arem ndok worak puruk pempa yebet yebet tak wolmomtag-o.

²² It-nen mirik kibidnak wene iri-net kat mborosola-ge, ndemel kuburuk mburuwa-o. Kubu-ge yik keyarok woralat, kuplila kat men yosola-ge, tu mirik kobosolat kwaruwa-o.

²³ Keid kiya-nen nggomo kiridnak wene iri-ge kat kamanggim tal-nen yusu-o. It-nen nggomo korogolat met kibidnak ereba na-nen-e kat konag-et wolmomtak mirik kubusu-o.

²⁴ Nggomo iri nggal kiridnak pem-e kar-e kweyap terak nugwi inggiyapma-nen wisirik kobosolat, ap onkwe enne amburu tamuk nggal iri na inggem-nen wisirik kobosolat kwaruwa-o.

²⁵ It entare konak iri-nen kindi lak tak purak pug-o. It enlengen kebem puwa iri na bem-nen kindi enpem mbutlurak pug-o.

²⁶ Kweyap terak waring kagwi kweyap inmin nene yurak pem onggo wok ondogolar-e, onggo-ge nunggwi mende misiget pem norak onggo pugwi ndak ndak wok indili-t nde, ap onkwe min mbabi kwatli iri onggo-ge ap inndi-t weserak pili-o.

²⁷ Ap-nen kanduk inmidwak pem kud turuk mbiridnag-et nde, unsum-e kan naso bug-a?

²⁸ Ap unuwok mil milmu unuwok pidnag-et nde, unuwog-e turok yoso bug-a?

²⁹ Mondok lag-o. Ap onkwe min nene yugwi iri-ge iri nggal-net yusu-o. Ta-nen nde ap onkwe min nene yosola-ge, mbela mburuwa bug-o.

³⁰ Ap-nen nere-net nunggwi mende yariya wanuwa-t nde, yariya wanuwa nab-e unu mbilaro ngin tak pogolat wolma-o.

³¹ Nde, ap iri nde yariya wanosoma, tenaguwarig-e, at-nen onggo posolar-e, tugurug-et pilik, tugurug-et pilik kwarosolar-e, tuju bem-e purag-o. Iri nggal posolar-e, at arengge mende-ge mondok ondoro ma-o.

³² Alat nde, ap-nen ap onkwe tenaguwa nab-e ambikpebe erengenwak lak tak pusu-o. At iri-ge indi lak wid-nen yusu-o.

³³ At iri-ge andi bandi rak obogolat, nggweyel obogolat ma-o. Nde, at unu-ge pem emben to rak nap irit wolma-o.

³⁴ At-nen iri kwaruwa iri na bem-e kwe iri na un-e erengen ale yosolar-e, isilepma-ge mondok kwiye worak irit ma-o. Iri luk, at-nen onggo posolar-e, mondok indi angin lag-et kwaruwa-o.

³⁵ At iri na-ge tol pem indi yanggunurak na mondok meya ma-o. Silobulo kwarat wok tuwa-t nde, isilepma-ge yanggo yuwa bug-o.