NGGOMO WENE 31 - Nanduk Ngget Tul Pidnak Wene

Nagawan nggomo wiridnak wene 31:1-9

¹ Yu-ge Nagawan Lemuel ija-nen ambara min yidnak wene-o. At-nen yak tosolar-e:

² ”An-nen tepan yigi bem-nen wok niridnak nambara nindi pungen wa-e. An-e no nggal nde yak kirimin-o?

³ Kar-e kweyap enpem kamawi mbo mbosolat, karong lak tak posolat yurak pug-o. Kweyap enpem nak-nen nagawan kwarat mondok pusa lak yikma-o.

⁴ Lemuel wa-e. Anggut engen amburu nonggolat, inndi nden kaso yi norak nggal nak yogolat yugwi iri-ge nagawan-nen kwarurag-e, meya-o.

⁵ Nagawan-nen nde inndi nden kaso yi nonggolar-e, imiri mbarak pidnak wene na meme rak pogolat, iri-nen ap enmawi lak kwat unpurak ereba na kwat inpigit lak yugwi-o.

⁶ Inndi nden kaso yi iri-ge pempa andi bandi woragwi min min inndi puru bera woragwi nap min iri perak norag-o.

⁷ Iri nonggolar-e, it-nen enlengenma lak woragwi min it-nen anggun panggun woragwi min inndi meme rak puruk wolmakluk norag-o.

⁸ It ondomok-nen onowene mbarurak meya nab-e kat-nen onowene mbarosolat, it-nen kwarurak enmawi lak nab-e kat-nen nggetlel onposolat wolmin-o.

⁹ It enmanggim-et kamawi kondosolat, ap enpem mot mot wene mbenaroso nab-et kwat yosolat, insilobulo lak nap min anggun panggun arem woragwi nap min onowene-ge kwara-t konosolat wolmin-o” luk yak tij-o.

Un worak kwe abage konak, iminep mbarak 31:10-31

¹⁰ Un worak kwe abage konak, iminep mbarag-e ndag-et kudtag-e meya-o. Kerep abinal worak onggo nggok pugwi iri-ge teberag-et nde, kwe yu nggal-e mondok kek tak-net yusu-o.

¹¹ Kwe iri nggal un-e indi-ge ogwe bem-et wat tak woraso me, ar-e yi mende ndi mende bem-e ukwe lak, ndak nak irit wolma-o.

¹² Kwe iri-nen-e un imin-e mondok meya mbi kwarigit lak, pempa uruk woralar-e, un imin-e konak nak kwat tenak woraso-o.

¹³ Kwe iri na-ge perari yigit lak sum yakwi mende nggandum mbato ariwak min lomba usu min pempa eram puruk, sum yagosolat woraso-o.

¹⁴ Silobulo wene wiril nugwi nap-nen silobulo waruk koma yi ombolwak pem waruk lobok yugwi nggal at-nen-e nunggwi mende-ge nin sa-net waruk lobok yoso-o.

¹⁵ Nde, o nda yekluk yosola, lumugumu menluk, ar-e un min ilirak min enmanggim nunggwi mende lid lud tak poso-o. Iri rak purug-e, at ndegel ubugwi kweyap ereba na-ge yabu tembesa enpem poso-o.

¹⁶ Ar-e nggweyak siyak mbenatlug-e, onggo buruk, at inggi-nen yabu wanidnak iri na bem tol wanurug-e, anggut uwi yagurak yabu onggo boso-o.

¹⁷ At-nen yabu wanosolar-e, mondok ubugulwak kere kamarak puruk, yabu arem mbiring yosolat woraso-o.

¹⁸ At-nen yebet kasolar-e: ”An ninggi-nen kwarosolat woramin iri bem-net an-e ndak woramin-o” perarug-e, kubu-nen lengge-nen yabu arem nak mbinggirik woraso-o.

¹⁹ Kere larosolat, aid sum abak yagosolat kwaroso-o.

²⁰ Ar-e ininggem lak nap na wok ondosolat, inndi kabak yidnak nap na indi konag-et yongga ondoso-o.

²¹ At un min ilirak min enmanggim-e embem sum-e lid lud tak pidnak me, o toro wok yosola-ge, ar-e umud lak irit woraso-o.

²² Ar-e at ondomok inggi-nen konosolar-e, yemarugwi mende konak min konosolat, iri-nen at usum konak linen-nen yagidnak wiyungen sum (ungu) irit yoroso-o.

²³ At un-e unu worak, o siri ereba-nen enne kulugwi nap ennggendumu woraso-o.

²⁴ Kwe iri-nen-e yurugwi sum yaguruk, unpugulwak logoksa yururak mende konuruk, silobulo wene wurugwi nap enpem onggo wanoso-o.

²⁵ Oboksa kwe na inggem nak worala, kek tak ubugwi irit woraso-o. Ar-e abok-nen wolmomtak pem-e mondok umud lak irit woraso-o.

²⁶ Wene yosolat na indi-net yebet karuk, umbuwa wene nak yoso-o.

²⁷ Ar-e perari yigit lak, pempa tebeluk yabu wanosolat woraso-o. At un min ilirak min ndegel unpurak nak nggok tak poso-o.

²⁸ At iri-ge ilirak-nen na kek tak pogolat, at un-nen na erembel wanosolat irit kwarugwi-o.

²⁹ At un-nen yosolar-e: ”Kweyap erep na konag-e worali-t nde, kat perak nde ereba ennggendumu-nen mondok konak lombok-net yusu-o” luk yoso-o.

³⁰ Inndi wanugwi enpage iri-ge ap onmbol pem laso-nen yusu-o. Nde, entare konak iri na lag-et ma-t nde, Nagawan Indo indi aye worak kwe iri perak erembel wanurag-e ndak-net yusu-o.

³¹ At-nen konak nak kwaroso ereba na bem kek tak obogolar-e, at iri-ge ap oboksa-nen erembel wanurak kwe-net yusu-o.