NGGOMO WENE 3 - Nanduk Ngget Tul Pidnak Wene

Ap sujwe nggomo indidnak wene 3:1-35

¹ Nambara wa-e. An-nen nggomo korosolat mul kurusu wene-ge meme rak purak pug-o. ”Iri kwari-o” luk an-nen kebem pusu wene-ge pempa kindi yeberak wolmin-o.

² Iri kwarosola-ge, kar-e kuruk mot pem-et woralat, yamuksa konak woragun-o.

³ Kar-e tugup lak kindi-ge Nagawan Indo ebem-et wat tak puruk woralat, Nagawan Indo min ki nap min inmin-et kundik tugup lak irit wolmomtag-o.

⁴ Iri kwarosola-ge, Mbal Pem Nagawan-nen na irit, ki nap-nen na irit indingen tak kobogolat, kek tak kobogolat ma-o.

⁵ Ndemeret kindi misiget tak puruk, Nagawan Indo ebem nak wat tak wolmin-o. Kat-nen yebet kaso iri na bem kindi wat tak puruk wolmomtak pug-o.

⁶ Kat-nen yi kwatlik ndi kwatlik kwarosolar-e, Nagawan Indo-ge meme rak purak pug-o. Iri kwarosola-ge, konak wolmomtak tula-ge at-nen mirik kubuwa-o.

⁷ Kat kambikpebe ”An-e nindi nggat nggat worag-o” luk yebet kudtak pug-o. Are, meya kwarugwi iri keya buruk, Nagawan Indo indi aye worak wolmin-o.

⁸ Kat-nen iri kwarugun iri-nen-e obat nggal kebe ki rak kobosolat, kindi alen tak posolat ma-o.

⁹ Kat-nen Nagawan Indo kek tak posolar-e, kat karengge mende kinggem woraso min kab-nen yagidnak min lena mondok konak nak irit Nagawan Indo amanggim purag-o.

¹⁰ Kat-nen nde iri kwarosola-ge, kat-nen nggandum mbato mbara poso sa min anggut engen amburu poso ondoro min-e mondok kobong yosolat, erep purak ondoro nggesa nggal ma-o.

¹¹ Nambara wa-e. Nagawan Indo-nen nde kindi wanonokluk nde korosola-ge, ”Iri-ge an nindi wanuwakluk-nen nurusu-o” luk kindiyabu nak yurag-o. ”A! Yu-ge ngge kwat nubusu-o?” luk karem nggowaru yurak pug-o.

¹² Ap-nen inlirak enabuwa kagolar-e, inndi wanuwakluk undugwi ereba na nggal-et Nagawan Indo-nen-e at ilirak indi kundik iri-ge inndi wanuwakluk ondoso-o.

¹³ Indi nggat nggat worak kwat yosolat, kwara yebet kaso yosolat yusu nab-e alen kujwag-o.

¹⁴ Nde, at-nen lesa wanidnak iri-ge onggo kek tak perak min emas min pem-nen lesa wanugwi-ge nggog-et nde, at-nen lesa wanusu iri-ge mondok terak minik ombol nggwe-net yusu-o.

¹⁵ Kerep abinal worak iri-ge onggo nggog-et nde, inndi nggat nggat elem iri-ge terak minik nggok-net yusu-o. Kat-nen ukwe perasu ereba-ge iri min ndak ndag-e lag-o.

¹⁶ Inndi nggat nggat elem iri-nen-e kar-e kuruk wolmomtak mot tak posolat, karengge worak tak kobosolat, kek tak kobosolat ma-o.

¹⁷ Inndi nggat nggat elem iri-nen-e enalen pem yamuksa woragwi elem wok kuruwa-o.

¹⁸ Inndi nggat nggat elem iri na puksa tena wolma nab-e ndemeret unluk enalen pem konak irit wolma-o.

¹⁹ Nagawan Indo-nen-e indi nggat nggat pem-et o yu-ge ndak worak pamu-o. Indi-net kwara yebet karuk, mbal-e worasu sa yu-t yemara nenasa bij-o.

²⁰ At indi tenggerak pem-et yi urusu-ge nggweyak arem pil lobok yamu, pilana mborosolat, nggan nggan-nen-e talme mberak pil mbuwasolat worasu-o.

²¹ Iri bem-e, nambara wa-e. Inndi nggat nggat elem min inndi-nen kwaluk kwarugwi min iri-ge mondok keya burak pug-o.

²² Kat-nen nde puksa tena worala-ge, kar-e kimiri mbarak woralat, mondok konak kalen min-et woragun-o.

²³ Kat waring kasolat na kuwok abis pijaksa mbud yigit lak, konak irit nugun-o.

²⁴ Iri-nen kar-e kwiye lag-et nene yosolat na, yamuksa nggaruksa ereba-t tag-et nene yosolat woragun-o.

²⁵ Lak tak onposo mende-ge wijakni nggal mimo meya yugwi nap enpem mbud yoso ereba na ”Nebem mbuma-o” luk kat-nen kwiye yurag-e lag-o.

²⁶ Nagawan Indo-net yik keyarok wolma-o. At-nen-e: ”Sabu arem ngonok mag-o” luk keya kubuwa bug-o.

²⁷ Ap-nen nde kat-nen konak kwat unpurak nggi yak korogola-ge, kat-nen konak kwat unpurak ala-ge, kwar-et unpurag-o.

²⁸ Kanggamirak erep yak ondosolar-e: ”Pug-o. Kup-nen wok kindimin-o” luk waruk lud tak pug-o. Are, iri na tarem-et yongga undurag-o.

²⁹ Kanggam indi kebem wat tak puruk, kimin worasu iri indi andi bandi rak purak pug-o.

³⁰ Kat meya rak kibigit lak nap enpem puk yurak pug-o.

³¹ Ap enpem mbud yugwi nap inmin-e it-nen kwarugwi nggal kwarurak puruk, kerengen ale yurak pug-o. It-nen kwarugwi enpage na mondok wanurak pug-o.

³² Nde, iri-ge Nagawan Indo-nen-e meya yugwi nab-e isili rak onposolat, nde, inndi mot mot woragwi nab-e mondok inmin panggarak woraso-nen yusu-o.

³³ Nagawan Indo-nen-e meya kwarugwi nap unuwi-ge imbiri lamut tak poso-t nde, at-nen yidnak yidnak kwarugwi nap unuwi-ge imbiringgat tak poso-nen yusu-o.

³⁴ Nagawan Indo-nen-e ap indi kek tak woragwi nab-e isili rak onposo-o. Alat nde, ap inndi teberak woragwi nab-e at-nen inmbiringgat tak onposo-o.

³⁵ Ap inndi nggat nggat worak nab-e unnu konak iri-ge wigak yosolat wolma-o. Alat nde, ap wij-e unnu-ge mbilaro ngin ma-o.