NGGOMO WENE 27 - Nanduk Ngget Tul Pidnak Wene

¹ Abok-nen kwat ma iri-ge kar-e karu buk me, kup-nen kwarurak ereba na ”Iri nggal kwarimin-o” luk kek yurak pug-o.

² Kat kondomok-nen-e kerembel wanurak pug-o. Nin nap-nen kerembel wanogolat, iri-nen kat-nen eneyaso buk nap-nen kerembel wanurak iri-ge konag-o.

³ Kerep min sisiri min-et nde, iri-ge angin-e marig-et nggal-nen yusu-o. Alat nde, ereya angin min ndak worogolar-e, ap wid-nen inndi andi bandi rak pugwi iri-ge ereya angin nggal-e lag-o. Terak minik-net yusu-o.

⁴ Insilepma yugwi iri-ge enlengen lamburak nak kwarogolat, yigisa lak tak onposo mende-nen yusu-o. Alat nde, enlengen ale yugwi iri-ge ta-nen mamak puruk wolma-o?

⁵ Enarem nak-nen enabuwa yugwi iri-ge marik-nen yusu-o. Nde, nam-et met unpugwi iri-ge mondok konak lombok-nen yusu-o.

⁶ Ennggamirak-nen-e enabuwa kagolar-e, undugwi-t nde, sirid nap-nen-e ninggis mende enpem pogolar-et nde, paluksa wa yak undugwi-o.

⁷ Inmbit pem-e tamuk amburu undu konag-et nde, keya bugwi-o. Nde, nere bem-e undu meya ngari worag-et nde, undu konak nak yoso-o.

⁸ Towe-nen at uwi iri na keya buruk noso nggal-et ab-e it unuwi keya buruk, nugwi-o.

⁹ Ububumben worak amburu min emben konak mende min-nen inndi alen tak poso iri nggal-et, ennggamirak-nen konak nak kwat unpugwi bem-net ennggamirak inndi konak tak pogolat enalen tak pugwi-o.

¹⁰ Kar-e kat kenggamirak min keid enggamirak min-e keya unpurak pug-o. Anggun panggun kebem mbidnak tarem-e kowe kowot ereba na-ge ”Yongga nerer-o” luk yak undurak pug-o. Kat winde erepma worali-ge te-t nde, kenggamirak kat keralu worali ereba-ge mondok ija lombok-nen yusu-o.

¹¹ Nobok pogola, an-e wene onggo te-t yak ondosolat worayek-nen, nambara kar-e mondok kindi nggat nggat worak irit wolmin-o.

¹² Ap indi worak nap-nen-e enare burak mende nde karug-e, abuwok ma-net mondok inggi mbaroso-o. Alat nde, ap wid-nen-e iri na nggwe-t lasoma, lak tak onposo mende-ge ebem mboso-o.

¹³ Ta-nen nde nin nap namat uwi yagurak yosola-ge, uwi yagurak yusu nap iri na arengge-ge uwi yagosola-nen wok turak wanuruk tena wolmomtag-e ndak-nen yusu-o.

¹⁴ Ta-nen nde kubu kabu ene nggoksa enggamirak wa yak ondosola-ge, iri-ge imbiri lamut tak onposolat-nen yidnak nggal yik kujwa-o.

¹⁵ Ap ogwe-nen nde yuk puk tenak nak woraso iri-ge pempa talme nasolat tarem-nen tot ndung ndung tenak woraso iri nggal-nen yusu-o.

¹⁶ Kwe iri nggal-e ene lak tak purag-e meya-o. Kwe iri-ge o wija kondok tak purak na meya, yi ininggi bem-nen tenagurak na meya iri nggal-nen yusu-o.

¹⁷ Posid yinggi bem-net posid anggat marugwi iri nggal ennggam-nen ennggam inndi eyak wurugwi-o.

¹⁸ Ta-nen nde engen yoso e ereba na umut mbal tenak woralar-e, engen-e mbaruwar-o. Ta-nen nde at onggo ibidnak nap iri na kwara ndegel obosolat wolma nab-e ombo iri na-nen-e at nak kek tak ubuwa-o.

¹⁹ Yi ugupmu entare mirik onposola kagwi nggal, inndi-nen-e ”Kar-e iri nggal worasu-o” luk mirik onposo-o.

²⁰ Ap watluk ndok wurugwi sa-ge ondoro o-ge terak nak woraso-o. Iri nggal-et ki nap-nen ukwe ukwe yugwi iri-ge kuri wat tak purag-e meya-o.

²¹ Emas min perak min-e kanduk pem-nen mbenarogolat abut mbarugwi-o. Iri nggal-et ap enabut mbarogolar-e, ap-nen at kek tak obogola, abage iri bem-net abut mbarugwi-o.

²² Ap wij-e kwiye worak puk pak wuruwa-t nde, at-nen wid indi nggal woraso iri na-ge lak ma-ge lag-o.

²³ Kat kowam-e mondok kwara ndogorosolat wolmin-o.

²⁴ Kek tak onposo yi mende ndi mende iri-ge mondok pem-e wolma bug-o. Iri-nen nagawan-nen o tena woragwi na pem irit o tena wolma bug-o.

²⁵ Nde, tusuangge keyapmu min ndobo nggwe min ereba-ge mbara kowam iri amanggim ndok wururag-o. Iri kwasa mbarugunmu-ge, tusuangge-ge arok ngget tuguruk lujwa-o.

²⁶ Kolomba wam usu bem-net kusum yururag-e yakun-o. Kagambing wam erep onggo wanugun pem-net konggweyak ki-ge onggo pugun-o.

²⁷ Nde, kagambing wam erep ereba na agamo amburu-ge kat min kogwe min kilirak min ndegel kubugwi min-nen nonggolat woragub-o.