NGGOMO WENE 25 - Nanduk Ngget Tul Pidnak Wene

Salomo-nen mbaridnak nggomo wene erep 25:1–27:27

¹ Nde, ya-ge Yewura nap nagawan Isikia eyabu wanugwi nap-nen Salomo-nen mbaridnak nggomo wene erep ereba na tuguruk mbaridnak wene-o.

² Mbal Pem Nagawan-nen kura bidnak mende bem-e nir-e at unu kek tak pugwi-o. Nde, nagawan-nen ”Iri nggal-o” luk mbena yugwi bem-e nir-e it kek tak unpugwi-o.

³ Nagawan-nen yebet kaso-ge mbal teram eid nggal, yi koma mondok yubuk tak arem nggal, nagawan-nen yebet kaso-ge ombol nggwe me, ap-nen yebet kudtag-e meya-o.

⁴ Perak ebem kopkap ereba na kora keya bosoma-net perak konoso nap iri inggi-nen-e konak iri na-ge kwarak poso-o.

⁵ Nagawan wene mul tugwi nap meya ereba-ge inggi mbara nagawan woraso sa-nen wirik onpogola-ge, nagawan-nen tenagidnak wi iri-ge mot mot tugup lak ma-o.

⁶ Nagawan eram lobok yogolar-e, kinndi tebe luk lobok yurag-o. Ap kek tak nggal ija bija yurak pug-o.

⁷ Kat kimin yogolar-e: ”Kondoro iri-ge ap nggok kek tak iri wok ti-o” luk yak kururak iri-ge meya-o. Alat nde, konag-e: ”Kar-e kek tak-nen kore yugwi sa yu me kore yi-o” yak kururak iri perak ob-o.

⁸ Wene worala-ge, ndag-et nak lubungsa wene mbarugwi sa waruk lobok yurak pug-o. Kat-nen kwarugun iri na mbenatluk, ”Meya-t kwarigen-o” yak korogola-ge, kar-e no kwarugun-o?

⁹ Yebet kagit lak-nen nde kanggam-nen kwaridnak ala-ge, at iri na imin nak wene lak tak purag-o. Alat nde, ap nin-nen yidnak kura wene-ge mondok nam tak purak pug-o.

¹⁰ Kat-nen iri kwarosola-ge, ap-nen kat yak korogolar-e: ”Kemnde uru barag-o” yak korogolat, ”Iri yoso na” luk, kunu-ge meya nak irit woragun-o.

¹¹ Enarem-nen yebet kagwi wene yurak tarem-net yili iri-ge perak-nen konidnak piring pem pidnak nggal emas amorok ndak wosa pidnak nggal-nen yusu-o.

¹² Enaru nap-nen nggomo ondogola, kulurak indingen nap ereba na yak indili iri-ge emas ininggi bem pugwi min unmuruk pugwi emas min nggal-nen yusu-o.

¹³ Wirik ibidnak nap-nen yidnak yidnak nak kwaridnak pem-e at wirik oboso nap iri na-ge alen tak oboso iri-ge yapmu yagidnak mende ereba na mbarugwi nap yi kol enpem yamuksa mak indidnak nggal-nen yusu-o.

¹⁴ ”Irit kwarimin-o” luk urul pidnag-et nde, kwat yigit lak yugwi iri-ge nggan nggan min e kemereya min-e puk kasolar-et nde, talme mboso buk iri nggal-nen yusu-o.

¹⁵ Inndi-net tebe luk wene kona umbuwa wene nak yogola-ge, enmawi yidnak nab-e inndi unlugom lobok yosolat, konak yebet kagwi-o. Iri-nen kuri worak woragwi mende oboksa ndamera lak yoso-o.

¹⁶ Kindi limi leme mbuwa naru, tamuk amburu kwarat norak pug-o.

¹⁷ Kat keram woragwi nap endam pempa lobok yik tenak wolmomtak pug-o. Kat iri kwarosola-ge, it-nen-e insili rak kubuwa-o.

¹⁸ Ennesiget wene ap enpem pugwi iri-ge lak tak onposo mende kabo min ndonggwid min mare anggat worak min nggal-nen yusu-o.

¹⁹ Lak tak unpurak mende komo enpem mbidnak tarem-nen enesiget yoso nap iri na ene-t kulugwi iri-ge eneyak lup lup pem tarogolat, unuwok landok tak iri na bem nak-nen tu mbiridnak nggal-net yusu-o.

²⁰ Tabun pem inndi puru pera worakmu-t nde, inkid pogolat ndawi yugwi iri-ge toro bem-et nde usum yonggora keya bogolat, ngari worak ud pem pogolat kwarugwi nggal-nen yusu-o.

²¹ Kat kuwim nap nde nunggwi mende min yi min nere ala-ge, yi min nunggwi mende min irit mak undurag-o.

²² Kat-nen nde iri nggal kwat onposola-ge, ir-e innggiri nde ma-o. Nde, kar-e Nagawan Indo-nen-e imbiringgat kebem puwa-o.

²³ O wija abare abam (utara) nggwe-nen nde lobok yosola-ge, ndemeret talme pil lobok yoso-o. Iri nggal-et onpok pugwi mende iri-nen-e insilepma yugwi mende nam tak poso-o.

²⁴ Onkwerak yuk puk mbugwi ereba na inmin yuk puk tenak o misiget me wolmomtak nggal o ngguwa bem unggut nggwe ereba wolmomtak iri-ge mondok enalen pem woragwi-o.

²⁵ O erepma-nen wene konak enmanggim wene wosa bugwi iri-ge yi nere indi eberek yidnak tarem-nen yi kol eyak worak ninggidnak nggal-nen yusu-o.

²⁶ Konak nap-nen meya kwarugwi nap enaye-nen tebek yili iri-ge yi ulusu min yi emnde mbaridnak min unggul kopkap tobok tak ereba na nggal-nen yili-o.

²⁷ Tamuk amburu norak iri-ge meya-o. Iri nggal-et it kek tak unpurak nak kore yugwi iri-ge meya-o.

²⁸ Ap ondomok-nen kwaluk nili buk nab-e o siri pak leger-e ndamera ngguru rak nggal-nen yusu-o.