NGGOMO WENE 24 - Nanduk Ngget Tul Pidnak Wene

- 19 -

¹ Meya yugwi nap-nen kwarugwi ereba na ”An nggal kwatleb-a!” luk yurak pug-o. It inmin yagiga kundurak kindi yurak pug-o.

² It iri-ge enlengen lamburak-nen kwarugwi mende nak yebet kagolat, ap lak tak unpurak mende wene nak mbarogolat kwarugwi-o.

- 20 -

³ Onkwela inmin lombok-nen konak o tugup lak wiridnak nggal woragwi iri-ge kwara yebet kagolat, indi nggat nggat elem iri bem-net kona tugup lak woragwi-o.

⁴ Nde, enaru yugwi mende worala-ge, o kuri worak ereba na-ge silobulo mondok mondok konak onggo kek tak ereba na yat ma-o.

- 21 -

⁵ Inndi nggat nggat worak nab-e enarong worak nab-e teberak unpuruk, ir-et kek tak-nen yusu-o. Enmawi iri-ge te nggal-nen yusu-o. Enaru yugwi mende irit nggok-nen yusu-o.

⁶ Wim nggwigit lak ma-net ”Iri nggal kwarurag-o” luk wene kona mbarogolat, ”Yu nggal, iri nggal” yugwi nap na kwarat ala-ge, ombol nggwe yurak nde ma-o.

- 22 -

⁷ Ap wid-nen-e inndi nggat nggat elem iri-ge yebet kudtag-e meya me, ap-nen nggok wene ereba na yogola-ge, at-nen erep wanurag-e meya-o.

- 23 -

⁸ Meya kwarurak nak wene mbal tenak woraso nab-e unu-ge ap laga mbaga rak onposo nap-nen yusu-o.

⁹ Ap wid-nen kwarurak yebet kaso iri-ge meya elem-nen yusu-o. Nde, ap-nen pempa ap erep insili rak onpogolat woragwi iri-ge ap-nen indingen kagwi bug-o.

- 24 -

¹⁰ Kirimbi kebem mbidnak tarem kindi kabak yoso nde ala-ge, kar-e kamawi lag-et yoso-o.

- 25 -

¹¹ Unduwakluk undurak sa wok unpuruk mbitli nab-e mondog-et inmiri yurag-o.

¹² Erep-nen-e kat-nen yosolar-e: ”Iri-ge an neyabu-ge lag-o” luk yugun-et nde, Mbal Pem Nagawan-e yik keyarok worasu-o. Ar-e kat kindi-ge oboksa aru me, kat kebem wene mbaruwa-o. At-nen kemnggo posolar-e, ap-nen kwaridnak ndak ndag-et puwa-o.

- 26 -

¹³ Nambara wa-e. Tamuk amburu iri-ge mondok konak me, min-o. Tamuk amburu engen arem norak undu konak worasu iri nggal-et

¹⁴ inndi nggat nggat elem iri-ge kat kindi amanggim-e konak-nen yusu-o. Kat nde kindi nggat nggat worak woralar-e, o kibi nda yidnak nggal irit abog-e woragun-o.

- 27 -

¹⁵ Meya yugwi nap-nen mot mot kwaroso nap iri na arengge ndena wanogolat, uwi mengga wanogolat yurak pem wene mbarugwi nap nggal-e wolmomtak pug-o.

¹⁶ Mot mot woraso nab-e wosa mberenak wolma-t nde, pempa men yik tenag-et wolma-o. Alat nde, meya yugwi nab-e lak tak onposo mende-nen mondok yigisa lak tak unpuwa-o.

- 28 -

¹⁷ Kimin sirid nap nde lak tak onposo mende ebem mbosola-ge, kalen yurak pug-o. Nde, wosa mbosola-ge, igid purak pug-o.

¹⁸ Kat-nen nde iri kwarosola-ge, Nagawan Indo-nen-e ndemeret kat-nen meya iri kwarugun iri na kwara lombot purug-e, kimin sirid nap iri na-ge onggo angin worak mende-ge ebem mberak puwa bug-o.

- 29 -

¹⁹ Meya yugwi nap enpem kinsilepma pilik, it-nen kwarugwi ereba na ”An nggal kwatleb-a!” luk yilik yurak pug-o.

²⁰ Meya yugwi nab-e at abok-nen wolmomtak na lak, at-nen indi ebem mbung mbung tak wolmomtak na lak-nen yusu-o.

- 30 -

²¹ Nambara wa-e. Kar-e Nagawan Indo indi aye worak woralat, nagawan nak kek tak posolat wolmomtag-o. It inmin eyak witli nap inmbirik mbururak pug-o.

²² Iri nggal kwarugwi nab-e enlengen sambok yidnak nggal nak lak ma-o. Mbal Pem Nagawan-nen lak? Are, nagawan-nen lak? lak tak unpurak mende kwarak puwa iri-ge wene marig-e lag-o.